星期六, 1月 01, 2011

個人影評

新曆元誕夜煲咗呢套電影,「非诚勿扰2」。

故事都係圍繞秦奮同笑笑嘅(愛)情線兜圈,試婚試到要分,到分開後經歷過香山嘅死別後,才以「人生太短,將錯就錯」為由再度復合作為完結。我總覺得,好似係有啲揾故仔嚟講嘅感覺。一開始,笑笑只係對秦奮有好感,試婚到底係想試吓大家嘅生活習慣夾唔夾,抑或係培養感(愛)情呢?呢一點秦奮都有提過。兩個人响無愛情或感情嘅基楚下試婚,而且大家想尋找嘅嘢唔同,最後都係失敗收場。睇完成套戲,由始至終,我都唔覺得秦奮同笑笑嘅感情有幾深厚,反而香山同芒果、秦奮同香山呢兩段男女同男人之間嘅感情總精彩。香山同芒果嘅離婚,「散買賣不散交情」,離婚後是親人而不是陌路人。秦奮在香山人生嘅尾段時仍尊重香山嘅尊嚴,男人間嘅互信同肝膽相照,比起秦奮同笑笑嘅男女之情,對我來說總有感染力。

香山嘅人生告别會係講人生哲理,「活著是一種修行」、「死是另一種存在,相對於生,只會生活是一種殘缺」、「婚姻怎樣選擇都是錯,長久的婚姻就是將錯就錯」,不特别感動,只有香山女兒為爸爸唸的那首詩觸動到我。人生告别會呢個意念幾特別,死前同親朋摯友道別,比起死後由親朋摯友搞悼念會來得有意義得多。

「非2」故事唔多吸引,吸引到我有三點,一係舒淇。舒淇唔算靚,但舉手投足同說話語氣吸引死人。二係孫紅雷同姚晨繼「潛伏」後再續戲緣,孫紅雷响劇中最搶戲。三係秦奮山上租住果間獨立屋,入屋先經懸空鐵索橋,相信建造此屋佔去大部份製作費。但又有乜所謂吖,除票房外,呢間屋最後都係有賺。

「非2」片尾總留有條小尾巴,如果真係有「非3」,我就完全無期望啦。