雙子男生

歡迎對號，哈哈！

口水多多又多心，
口甜舌滑無句真；
口是心非無良心，
口沒遮欄乞人憎。

晴陰雨天

早排音語兄講開佢個名嘅由來，咁我就响佢個blog度話好鍾意一首歌。

「晴天陰天雨天，你在何地，代表我天氣。」

聽歌啦。

點解咁架

响MS Word整到，但複制唔到落blog度。

妖妖妖妖妖！

人像攝影

Sara講得啱，人像攝影係好廣，男性、女性，而男女亦分小孩、年青、中年、老人家，而當中亦分生活、大頭、結婚、商業等等。

喜歡影相嘅，大部份都係年青女性。正所謂趁青春留倩影，所以呢一群少女可以好有耐性咁化妝梳頭換衫擺pose，毫無半點忸怩及怨言。而上咗年紀嘅女性，你試吓話同佢影輯相丫？佢哋實耍手擰頭話自己又老又多皺紋，一定唔肯。男性？肯同你座低一粒鐘先算啦，更莫講話擺pose。所以，基於需求，有年青美女做模特兒唔難。從商業角度看，少女人像攝影，賣錢亦係賣得最多。賣錢，唔係賣番俾模特兒，而係賣俾時裝雜諗等等。小孩攝影呢，哈哈，呢家嘢屈人水屈得最勁，火火媽媽有無嘢想分享？

影小孩，的確係難影好多。一張人像相影得好唔好，係睇攝影師同模特兒有無交流。之前同貓頭鷹傾過呢個話題，要影得好，就要投入，响最短時間內暫時愛上模特兒。而模特兒望就唔係望住個鏡頭，而係要望穿個鏡頭，望穿攝影師個心，咁影出嚟嘅效果先會好，唔會俾人感覺到空洞冷冰。所以呢，我主張一對一影，而極其討厭一個模特兒擺姿勢，然後成班麻甩佬响度影呀影，咁影出嚟係無意思嘅。小孩子呢，係唔識得同攝影師交流，所以，影小孩相係較為單向。而攝影師又要用好多間接嘅方法去引導小孩子點做點做，聽話嘅都好，唔聽話嘅就影成日都影唔到一張好嘅相。所以，火火媽媽，如果個攝影師可以影到你想要嘅感覺，一定唔會收千五呢個價錢。而去影樓呢，佢哋通常都有D古惑招去屈你錢。最常見係俾一個價錢好吸引嘅Package你，但只限一個pose。但當影相時，梗係唔會淨係影一個pose就收工啦，實會影多好幾十個。到揀相時，嘿嘿，無論你嘅定力係幾咁好，你都會有所動搖，乖乖咁做條快樂的水魚，任人宰割。

影樓相靚啲，好多人都以為係部相機嘅問題。其實，相機只係佔好少部份，影樓相之所以靚啲，秘密係燈光。我哋日常影相，多數都唔會點睇光線來源。嘩果邊有陽光喎，去果邊影咯。但係日光直接射落塊面度，係最差嘅lighting，除非你想影到自己成隻熊貓咁啦，否則，盡可能唔好响太陽底下影人。而室內或夜間影相，用閃光燈在所難免。一般相機嘅閃光燈係直打，直打落人臉嘅唔好處係塊臉出唔到陰影位，出嚟嘅效果當然係成塊包咁啦，所以好多時我哋都會覺得啲人上鏡肥過真人就係咁解。影樓相呢，有好多種唔同燈光嘅setting，側光頂光斜光等等，加上化妝效果，可以加強需要highlight嘅部份同埋增強陰影，令人臉影得更立體，就好似第一張相咁。而柔光箱（soft box）側可以減輕hard shadow同埋模特兒臉上皮膚嘅質感紋理。基本上，影樓相無乜秘密可言，只要有好嘅燈光set up，就算用儍仔機都可以影到好靚嘅人像相。我相信，上影樓做一次模特兒，可以學到好多嘢，兵姐，對嗎？市面上好多護膚品廣告，除咗燈光效果外，模特兒塊面多數係經過photoshop矇化處理，先至可以整到皮膚又白又滑。一張相放到幾層樓咁高仲要睇唔到半條紋，跟本無可能。

影黑白「灰」人像照呢，就有啲唔同。影老人家時，多數會影黑白「灰」，因為以側光打落塊面度，皺紋同膚色既對比就更加強烈，可以營造出滿面風霜嘅滄桑感。而美少女，因皮光肉滑嘅關係，如果就咁影黑白「灰」相呢，塊面就會白晒，成隻碟咁，毫無立體感。用側光加強陰影得唔得？

就如美少女一號咁

效果其實唔係咁好，雖然側光可以增強面部立體感，但係依家影美少女喎，無理由要將美少女塊面用陰影遮鬼住格，黑白「灰」相仲要遮半塊面，會唔會怪異咗啲？所以呢，功夫就响化妝度。影美少女黑白「灰」相，個妝要濃，唇色要深，加重面脥鼻樑眼影，增強對比度，令面部輪廓更突出。用正面頭頂光，減少面部陰影，出到嚟嘅效果就會好好多。咁以上五張彩色美少女相，邊張變黑白相會好睇呢？

我就認為係呢張。

噢，要清潔sensor囉…

因題材太廣，容許我，分幾次同你哋一路傾一路講... 或唔再講...

黑白照

「抱抱到了我進睡
獨自就像沒伴随
背對鏡去抹眼淚
年月逝去

慣了說我太安靜
學習著獨立過程
發覺了也太鎮定
未夠感性…」

撈啦撈啦，今次唔係深宵點唱節目，唔好意思，尤其CK兄。

個人唔係黑白照愛好者，响大師傅面前談論黑白照，實在汗顏。

黑白照，跟字面意思，實有誤導成份。一幅真正嘅「黑白照」，理應如下圖：

攝影高手光圈先決先生曾撰文講及呢種「文字」場境模式，除去色彩及灰度，把相片變成白紙黑字，係方便閱讀。

淨用黑與白看世界，一切都係白紙黑字，會唔會太尖銳、太冷冰、大沉悶呢？

再看看同一張照片，一幅非真正嘅「黑白照」：

加番灰度，照片少了尖銳冷冰嘅感覺，和諧咗，而且更可以清楚睇到城堡磚牆嘅detail位。加番灰度嘅照片，確實係清楚過非黑即白嘅照片。

依家新型嘅數碼相機，响睇相時都會顯示有無曝光不足或曝光過度從而令相片某些部份影出全黑或全白嘅情況。全黑或全白嘅唔好處係失去detail位，呢樣係攝影師最唔想見到嘅效果，一定會避免呢種事情發生。相機係中立，可惜係死嘅。但攝影師係生嘅，跟據自己嘅意思去避免全黑或全白嘅情況發生，係對世界及眼中事物載有無限感情。

再看看呢兩張真偽黑白照片，究竟個天係咩色？

原圖在此。

今晚冇節目

接CK


網友乙：「你講真架？」

網友甲：「係呀！去啦去啦。」

網友乙：「咦！可能撞正空姐喎。」

網友甲：「係架。唔知真係撞見認唔認得呢？」

網友乙：「未必，哈哈，唔知乜樣。」

網友甲：「真人唔知靚唔靚呢？又話時話，呢幾次搭Cathay，我都特別留意下D空姐個name tag。」

網友乙：「哈哈我都有。佢化咗妝，應該ok。」

網友甲：「點呀，去唔去啫？我想溝吓女，揾番初戀呀！妖…」

網友乙：「初戀？要學生妹喎。」

網友甲：「學生妹？好丫，我鐘意鄧麗欣響十分愛裡面果個學生妹look。」

網友乙：「叫Stephy扮丫。」

網友甲：「哈，好呀。」

網友乙：「俾你講兩講，我都好悶呀~」

網友甲：「我要溝女呀~」

網友乙：「上網溝住先囉。」

網友甲：「溝邊個先。」

網友乙：「响fb點個囉。」

網友甲：「嘩，得唔得呀？你試過呀？我要初戀果隻喎？」

網友乙：「無喎, 我都無玩。」

網友甲：「妖！咁去唔去呀？」

網友乙：「去！幾大都去！」

網友甲：「做乜突然間又咁堅決嘅？」

網友乙：「因為今晚我… 反轉個老蘭都要揾到空姐出嚟！」

公幹奇遇

狹小的經濟艙座位，隆隆的引擎聲，要好好的酣睡一會，很艱難。

從來也未曾可以在飛機上熟睡的我，喜歡靠窗而坐，不能睡，便看看地面的燈光和天上的繁星來打發時間。正當人人倒頭大睡，而我也看星看得出神的時候，那位樣子甜美的空姐走過來，著我掩上窗子。那飛出了地球正向著土星進發的思緒，一下子被拉了回來。

「真係唔好意思…」我說。

再看看她掛在胸口上的名字牌…

「ER…」

「我有乜可以幫到你？」

「可唔可以俾杯蘋果汁我呀？」

「可以，我轉個頭攞俾你呀吓。」

「唔該晒你呀，Elaine。」

「唔好客氣啦。」

坐飛機的時候，我喜歡有一杯滿滿的蘋果汁安放在餐桌上，待必要時飲用。機艙裡空氣極為乾燥，喉嚨常常也覺不適。呷一口蘋果汁，可舒緩喉部的痛楚。

如是般要Elaine來來回回，蘋果汁換完一杯又一杯，不知不覺間，飛機已準備降落。

跟據統計，空難事件，最常在降落時發生。每當降落時，我也緊張得雙脚發冷掌心冒汗，直到飛機轉入副跑道駛向停機坪時，我才鬆一口氣。

排隊步出機艙時，站在太平門旁邊的Elaine向我說了一句：「再見，希望可以再見到你。」

「哦…」

全程機也睡不著的我，已疲倦得不能自控。面對這位誘人的空姐，竟說不出半句話來。

唉！

踏入大堂，工作緩慢的海關，差點兒讓我站立也能睡覺。

一輪公式的問題，一輪公式的回答，他們想要的，是稅收。我想避免的，是交稅。

行李遲遲還未運出，我站在行李輸送帶前，左顧右盼。看見不遠處有一對金童玉女也正等待行李。男的風度翩翩，貌似方力申。女的嬌俏可人，七分似鄧麗欣。沒多久，那女子可能也見等得太久了，便拿出手提袋中的手提電腦，不知是「facebooking」，還是工作中。

終於，行李出來了。看見一件件從眼中溜過的行李，疲憊不堪的我也開始頭暈了。怎麽我的行李還未出來？怎麽我的行李還未出來？等等等，等了又等，究竟，人一生到底花了多少時間在「等」呢？等人等車等船等飛機等電話等電腦開機等食飯等天光等日落等花開等葉落等工開等運到等等等等… 如果我們不用等，我們到底可以騰出多少時間去做自己喜歡的事呢？

好不容易，才等到我的秀麗行李匧。二話不說便把它扯出來，當然，對著不懂說話的死物，又有何話說呢？

咦？那對金童玉女呢？大概是走了吧。如此碧人，不上前結識著實可惜，只怪自己人緣未夠。

乘的士回家，司機咕嚕咕嚕想和我談話。大腦已噹機的我，只能給他哦哦兩聲敷衍了事。

回到家中，打開水龍頭，熱水從花洒中徐徐流出，一身的疲累，彷彿隨著熱水和皂液，一同被沖走。

突然間，聽見同居女友一聲尖叫，我即時光著身子衝出浴室，看看發生甚麼事。

衝到房間，看見我的行李打開了，再望望同居女友，她用極其憤怒的眼神厲著我，手上則拿著一堆色彩豔麗的比堅尼，有天藍色、純白色及桃紅色等等…

「你… 又話去公幹！其實係去風流快活！」

「Oh.. My.. God…」

只見一隻桃紅色比堅尼上衣擲到我的眼前，我，即場昏倒不省人事。

兒時玩意

小息鐘聲響起，小朋友們便一窩蜂地跑到操場嬉戲。

不遠處一角落，有三位小朋友靠牆而立。在他們面前的，是一條長長的人龍。

當時，八歲的我，便站在這條人龍中。我們，正玩著猜皇帝。

猜皇帝的玩法很簡單，包剪。包贏，贏剪，剪贏包。一個做皇帝，然後選兩個左右護法。

想做皇帝，首先要猜贏左青龍，一盤定勝負。勝進級，敗滾蛋。

猜贏左青龍進級後，便可和右白虎猜。兩盤過，連勝兩盤才可進級。

僥倖猜贏右白虎後，便可挑戰皇帝。猜三盤，連勝三盤便可當皇帝，再挑選新的左右護法。

一加二加三，要連勝六盤方可做皇帝，這並不是一項容易的遊戲。在六年的小學生涯裡，可明正言順地稱自己為朕的機會，屈指可數。

猜皇帝這種玩意，最白痴就是當皇帝，悶得發慌。這正和職場上一些關乎工作量不平衡的情況一樣，有些人做死，而有些人則歎死。

可是，基於虛榮心及唯我獨尊的自我陶醉驅使下，人人也得想謀朝篡位。

年少氣盛，或年少愚昧的我，一當上皇帝，便挑選兩位精壯猛男當我左右手。

真笨！當皇帝，何不當風流皇帝？挑兩位相貌標緻的女同學來當妃嬪，待雙手空閒時，左右手同時輕擁兩位妃子的纖腰，然後情深款款地說句：「辛苦你兩位啦，抵我咁在乎偏愛你哋…」剎那間，兩位妃子淘氣地一踭搥在朕的胸口上，還嬌呻一句：「吃我豆腐丫嗱，批死你…」今次真是… 做鬼也風流。

估不到，兒時的小玩意，現在竟然有錦標賽。

昨天，體育台播出早前在拉斯維加斯舉行的包剪錦標賽，冠軍有五萬美元獎金。

西方人天性愛玩，打扮古靈精怪，比賽時雖然緊張，但他們也享受過程，勝的固然開心，但敗的也能盡興，一於齊齊玩足一個晚上。

不看也不知，跟據正式規例，出包時手一定要水平地出，直立地出包會被判為敗的。

觀看時我也喜歡代入參賽者的心情。猜度對手的心思，就如一對男女，在未正式確認為戀人身份前，大家你猜我我猜你、知道被揭穿還極力隱藏和想說還不說的心情一樣，都是那麽的驚險刺激。

嗯，久違了的心跳。

嘿

序 OCT 2007

「嘿」呢樣貨品原產於德國既一間樹上小店
個店主仲有潔癖
成日洗地

（70F）

~ ~ ~ ~ ~ ~ ~ ~ ~ ~

樹上小店其實好整潔
只係水渠去水位間中會有點小問題
每當水渠瘀塞嘅時候
樹上小店店主都會請隔鄰嘅通渠佬過嚟修理
但係呢位通渠佬就有佢自己嘅一套整法
唔容許別人加插不同嘅意見
由於通渠佬剛愎自用
死用過時嘅技術用在新科技上
所以通渠佬成日攪到樹上小店一鑊泡
成地污水不特止
仲將原本屬於通渠舖嘅一陣酸宿味帶到樹上小店來
樹上小店店主心地好
唔想俾人知道呢位成日見面嘅通渠佬係如何不濟
於是成日洗地
洗走果陣酸宿味
免得影嚮呢位通渠佬嘅生意同聲譽

~ ~ ~ ~ ~ ~ ~ ~ ~ ~

喜歡寫隱喻故事


請容許我引用樹上小店店主的故事裡的一句話：

「你應該知道，世界就是由隱喻所組成。」

如果
世界是由隱喻所組成
那麽
世間事就得由隱喻故事說起

~ ~ ~ ~ ~ ~ ~ ~ ~ ~

火無熄滅
依舊熾熱
更不比一車鐵芬妮遜色
怒火撩原
繼續燃亮自己喜歡的人和事
燒焦自己痛恨的人和物

特別回應

請對號：

孩童時還未懂得容下別人，內心不知空洞滋味。

隨著孩子成長，便學曉把別人放在心上，先是父母，再而是兄弟姊妹親戚朋友。

孩子再長大點，便不捨得把放在心上的人放低。心，便覺重。

當孩子長大時，便醒覺到人生原是虛無，從而有了放低別人的準備。心，便覺輕。

輕，是空虛寂寞。

我的心，也開始輕。

內心曾經重過，輕過，便是活在當下的証據。

人生路上有位好朋友可以互相為大家平衡輕重，多好。

希望你們安好。