單車鍛鍊

除非係想Hae住玩，否則，如果想加強踩單車體能、力量同耐力，我建議使用單車訓練器。

購入單車訓練器係一次好偶然嘅決定，如果冬天無雪落，我一定唔會諗呢件嘢，出街踩足一年四季唔好？點解要响室內踩先？如果真係咁，我就無機會接觸呢件訓練器、無機會體會到佢嘅威力、更加無機會提昇我踩單車嘅力量，從而只有在樽頸位徘徊。

使用呢部訓練器嘅運動量，係大約响街踩單車嘅一倍。即係你响街踩兩小時單車，運動量就大約等於用訓練器踩一小時。由於訓練器嘅阻力係一致，所以你可以憑雙腳嘅轉數同所用嘅齒輪去知道自己嘅力量有無提昇。譬如上星期你只可用六波踩，但今個星期可以用七波喎，咁你就知你雙腿增加咗力量。訓練器另一個好處係，你可以長時間用同一阻力鍛鍊耐力，令腿肌得到持續鍛鍊，呢一點係响街踩單車鍛鍊唔到嘅。因為街道或單車徑，總有高低起伏，上斜阻力係大，但落斜時阻力又減少。總有彎多路窄，加速不久又要減速，速度上嘅限制又不能完全鍛鍊到肌肉。還有，在街上訓練，亦不能踩出150RPM以上的轉數，呢點亦局限咗腿肌爆炸力嘅鍛鍊。所以，如果想提昇體能力量，訓練器係一個好好嘅選擇。

訓練器好容易用，扣架單車上去，調較飛輪緊貼單車後輪就可以了。但唯一麻煩嘅，係要將後輪換上訓練器專用嘅輪軩。之前嘅相片，可以睇到駕單車後輪換上咗橙色輪軩。訓練器專用輪軩無軩紋，而且物料比較軟，可以完全緊貼飛輪。使用專用輪軩，可以減少磨蝕街用輪軩，同減少訓練時嘅嘈音。

訓練器已用了一個月，維持每星期不少於五日鍛鍊。每次鍛鍊完畢，全身都濕到透，連抹汗嘅大毛巾亦可以擠出汗來。我相信，响五個月後重回單車徑時，速度及耐力一定有進步。