悠閒假日

十月嘅一日假期，當其他人四圍揾地方去時，我就選擇留响屋企。

今日係長周未嘅最後一日，天氣雖然好，陽光白雲，氣温仲竟然有廿多度，以十月嚟講，係罕有。但我知道今日嘅交通情況一定好煩忙，好多去完度假嘅人都會返家，所以我都係留响屋企過一個悠閒嘅下午。

我覺得，放假有時都未必要揾節目嘅。對我呢講，朝早起身食啲嘢，然後睇吓電視上吓網，攰嘅就攤响張梳化度瞓吓晏覺，有陽光有微風，仲有兩條靚女（小虎、楚楚）陪我一齊瞓，幾咁爽呀。所以呢，都係咪講咁多，快快一拖二揾呀周公子風花雪月一番先。

藍牙耳筒

可能係用得太多嘅原故，跟咗我三年嘅藍牙耳筒終於壞咗，依家要用返有環迴立體聲嘅有線耳塞講電話。當初揀呢隻藍牙，係因為我唔鍾意扣耳仔果種款式，可能我細個時頑皮成日俾老師扭耳仔，所以當有嘢扣起隻耳仔時就好似有受罰嘅感覺咁，好唔舒服。呢隻藍牙都有條線跟耳塞，設計都幾型，試過好多次有人以為呢隻係MP3 Player。唔用嘅時候係夾响件衫度，聽電話時就用耳塞，我幾鍾意架，雖然壞咗但又唔捨得將佢棄置堆填區，有感情嘛。

發明咗手提電話之後，已經帶俾人多咗好多方便。依家再發明個藍牙耳筒，簡直係偉大，唔駛拎起隻電話，多咗隻手嚟做其他嘢。科技真好，可以俾勤力嘅人方便，但同時又可以方便懶人。

手寫板

用手寫板已經用咗三年，都係同一塊無換過。有用手寫板嘅人都知，如果用支筆寫得多，塊版就會越刮越花，咁認字能力就會退減，出錯字嘅機會就越多。依家寫中文字，有時要重寫好幾次先至出到個正確字，都幾煩吓。朋友曾提議我學九方輸入法，易學又方便快捷，適合我呢亭懶人。不過呢，人一懶起上嚟，就會連學新嘢都懶，即係懶得去練精學懶。寧願煩啲一筆一畫去寫一隻字，都唔願學篤兩粒掣去打一隻字。如果向好果一方面諗，起碼我唔會忘記每隻字嘅筆畫先，或者又响不知不覺間，練得一手好嘅楷書呢。

查實我覺得，我手字未必算得上靚，但會係工整咁囉。

下次回港，再買塊手寫板。

Best Ball

每年公司都會有一個高爾夫球日，邀請我哋呢個分公司上上下下所有員工一齊去打番場波。呢個高爾夫球日嘅目的，除咗比賽鬥低桿數鬥打得遠鬥打得最近洞之外，最重要係俾公司啲員工有個聯誼嘅機會，所以，就算有啲同事唔識打，都會一齊去玩，傾吓偈享受吓陽光綠草又一日。

公司呢個高爾夫球日，賽制係玩best ball。即係話四個人輪流發球，然後選落點最好果一個位置繼續打。呢種比賽方式係團體賽，同一組嘅人係隊友，與另外咁多組人比賽。我覺得，呢種玩法係需要一種平衡戰略，要隊友佩合先至會打得好。個戰略係要有兩個唔識死嘅隊友玩得進取啲，而另外兩個隊友就要玩得保守啲。譬如前面有水障礙响二百至二百三十碼處，進取嘅隊友就可以用木桿打過水障礙，風險係大啲但可以搏得birdie嘛。而保守嘅隊友就玩得安全啲，可以用鐵桿打去水障礙之前一百八十碼處，雖然咁樣好難搏到birdie，但好在唔會咁易輸bogey，而且更可以讓進取型隊友更放心去搏。我呢，當玩呢種賽制時，都係做保守型個角色。

唔好忘記，响足球場上，我都係擔當把關嘅角色。

呢種策略，如果用响日常生活上，都會有同樣嘅好處。

隊友，有我包底，放心吧。

Thanksgiving

公司規舉，做夠五年，上司便會用公數請個員工食餐晏。做夠五年嘅我，當然唔放過呢個機會，捉上司去咗一間高級食府飲茶。上司係香港人，飲茶都啱佢口味。食完晏後就可以收工返屋企，有得早走，幾好。

揀今日食晏嘅原因，除咗係星期五之外，今個周未亦係感恩節（Thanksgiving）長假期。响呢個節日，通常都會食餐好嘅嚟慶祝，感謝一年嚟嘅豐收。

我想講：
Thank you for your giving.

命名‧期望

大概响一年多之前，有一位我好敬佩，自稱為怒火眼睛嘅博客寫咗一篇文章，其中有一段係咁嘅：

「你們有人叫我火火，有叫我火媽媽，有叫我怒火媽媽，甚至叫我媽媽的也有。名是你們給的，期望也是你們給的，我談及孩子的時間不算太多，當然也不太少，但既沒有自稱媽媽，就是說，我是獨立的一對眼睛，看到的除了丈夫兒子，還有很多，雖然，還不夠多。你們的稱呼，令我不單在現實中成了媽媽，連網上也逃不掉了。只好，努力做媽媽，哈哈。」

怒火眼睛所表達嘅意思係，如果你知道有人稱呼你做好媽媽，那麽，你就係活咗响別人嘅期望之中。就因為咁，你就會更加努力去做好「好媽媽」呢個角色，就算你跟本就唔想去做一個好媽媽。

當然，我唔係話怒火眼睛跟本就唔想去做好呢個角色啦，我都係打個比喻咁啫，唔好當真。

响現實之中，我哋好多時會遇到呢種情況。但係，呢種情況對自己嘅影響，就未必會係正面。

以我自己為例，譬如有同事放工前有嘢未做完，見到我個樣好恰啲，於是同我講「喂鶴仔，你陣間得閒架呵？幫幫手搞掂呢單嘢佢啦，你又咁好人又咁易話為…」就咁，雖然我一百萬個唔願意，好想準時收工返屋企，但係為咗做好「好人」同「易話為」呢兩個來自人哋嘅期望角色，咁我就唯有將就吓，做埋呢單工作遲啲先走。雖然，我外表睇嚟無乜嘢，因為要扮好人同易話為，但係我心裡，就忟到七彩，只係唔好意思發洩。

好喇，做完晒嘢揸車返屋企，點知遇上大塞車。有個驚驚青青嘅司機，車又開得慢，切線又騰雞，我收工已經收得遲架喇，依家仲要阻慢我返屋企。終於到最後，我頂唔順响車內喪爆粗，不停咁咀咒個驚青司機，連佢祖宗十八代都唔放過。

响一片漫罵聲中返到屋企，至親嘅人知我今日嘅心情超唔掂，就問我咩事。我答話依家啲人都唔知點揸車嘅，驚就搭巴士啦，响條街到阻乜住晒，個牌都唔知係咪俾錢買返嚟咁咁咁咁…

將滿肚子嘅怨氣歸究於個驚青司機度。

咁，事實又係咪真係咁呢？

如果响平時，有個驚青司機塞住我，我又未必會發脾氣果喎。

即係話，當時果個驚青司機只不過係一個借口俾我去發洩。

諗深一層，我當時嘅怨氣，其實係因為遲咗返屋企，呢樣係我最唔想嘅。但係為咗要做好「好人」同「易話為」呢個人哋對我嘅期望，我唯有死忍。

所以，我因乜嘢最基本嘅事而發脾氣，跟本就無人知。所有人都以為個驚青司機係罪魁禍首。其實，佢只係一隻代罪羔羊，或者係一個借口。

有幾多人會了解呢？

百寶袋

從細到大都鍾意叮噹漫畫，無錯，我只認同果隻藍色機械貓叫叮噹，而唔係多啦A夢，大雄、技安、靜宜、牙擦仔等等主角名字亦深深印入腦中，無法改變。喜歡叮噹嘅原因，係除咗漫畫裡流露出最純真嘅人情味之外，仲因為有叮噹個百寶袋。叮噹個百寶袋，可以話係故事嘅靈魂，因為叮噹每一個故事，都會出動到呢個百寶袋。每當大雄闖禍或需要求救時，叮噹總係會响個百寶袋之中攞件法寶嚟幫大雄。而佢嘅每件法寶，都係可以好順利好恰到好處咁幫到大雄度過難關。雖然有時叮噹嘅法寶會搞到大雄哭笑不得，但呢啲都係一種幽默，為漫畫故事加入一啲笑料，咁樣人人都睇得開心。鍾意睇叮噹嘅人，內心少不免都會有啲童心，總會幻想吓如果自己有個百寶袋就好了，一支考試時一攞上手就會自己自動答問題嘅考試筆；可以回到過去及未來嘅時光機；帶人飛天嘅竹蜻蜓等等，都係對滿足自己慾望幻想嘅一種嚮往。

叮噹個百寶袋只係存活响幻想裡面，而現實中，一個聰穎、閱歷豐富兼且能言善辯嘅女子就好似一個活生生百寶袋。同一個咁樣嘅女子傾談，都會有無限嘅樂趣。佢見識之廣，就好似有無窮無盡嘅法寶，每每都令人有所驚喜；佢見解之精僻獨到，就好似一件意想不到嘅法寶，往往令人眼前一亮；佢隨手拈來嘅比喩可以將一件複雜難明嘅事情簡單化，就好似一件度身訂造嘅法寶，精確得令人心服口服。雖然，咁樣嘅一個女子因為聰明且能言善辯嘅關係而好多時會令人哭笑不得，但不得不承認，能夠同咁樣嘅一個女子同行又會好有趣味，就算成日俾佢窒到啞口無言，都覺得開心。

Red Hot Hits

讀書期間係聽歌聽得最瘋狂嘅時期，我讀書果陣，最紅嘅係四大天王。响九十年代初，當時嘅唱片可以有煙草商贊助，於是就有一系列數張Red Hot Hits嘅唱片誕生。唔知點解，唱片封套上有個Red Hot Hits Label，就好似好有質素保証咁，攞上手都好似重啲，想買嘅話仲要預訂添。當時老翻未流行，買襯都係正版貨，廿幾蚊張仲要加稅，唔嘢少架。

Red Hot Hits我有兩張，分別係張學友嘅「愛火花」同黎明嘅「I Love You OK？」。我自己就鍾意「愛火花」多啲，當時果首「還是覺得你最好」簡直聽到爛咁滯，一上車就不停咁煲。如果「每天愛你多一些」係張學友翻生之作，那麽「還是覺得你最好」就將張學友嘅事業推上高峰。當然，呢隻唱片嘅質素真係好高，雖然多改篇歌（果期好流行），但耐聽，首首歌都好正。

而黎明隻「I Love You OK？」，就食正無記電視劇「都市的童話」條水，初出道嘅朱茵，加上主題曲「傻癡癡」，仲唔昆到班少男買呢隻碟？當時我個老友為黎明而瘋狂，彈得一手好琴嘅佢，成日彈「傻癡癡」冧女之外，仲成日上堂時响課本上抄歌詞，練得一手靚字，人見人讚。

Red Hot Hits响當時嚟講，係質素保証。依家攞番隻「愛火花」嚟聽，都覺得好正。

置諸死地

五樓一間四百多平方呎嘅密室，中間只得一張長枱，有十條大漢圍住長枱而坐。十個人之中有八個煙民，兩個二手煙癮君子，密室中並無空氣流動，佢哋响呢個密室之中，坐咗四個鐘頭。

呢十個人原本係親密戰友，响戰場上同生共死。但係當呢十個人囚咗响呢個密室坐埋同一張枱嘅時候，就各懷心事，務必要响最短時間內，從戰友身上得到最大利益。

你虞我詐、虛張聲勢、皮笑肉不笑等等陰暗招式都可以响呢度大派用場。

佢哋係玩緊德州撲克。

每人買五十元籌碼，「小盲」兩毫半，「大盲」五毫，無限落注，輸晒可以再買籌碼，五十元一底。

二手煙癮君子甲玩得保守，攞唔到好牌都唔會去，但攞到好牌時又搏唔到大牌，手頭上五十元嘅籌碼就慢慢咁貢獻俾人。

望吓牆上嘅大鐘，係時候散水。二手煙癮君子甲手頭上只淨十三元籌碼，於是把心一橫，底牌都唔睇就晒冷，有一煙民捨命陪君子。當然，佢肯捨命陪君子，二手煙癮君子甲又點會唔成全佢呢？二手煙癮君子甲拿回二十六元籌碼。

二手煙癮君子甲見只得二十六元，計數仲要輸二十四元，於是又再接再厲，底牌唔睇又去晒光二十六元。今次竟然有又四人誓死跟從。

開牌，大家嘅底牌都係差唔多。最後，二手煙癮君子甲又符符碌碌咁贏咗，攞番一堆籌碼。

計過數，共值九十九元，減去五十元籌碼本，贏咗四十九元。

二手煙癮君子甲見揾夠一個星期嘅晏仔，即刻割禾青兌現走人。

二手煙癮君子甲嘅故事，係想講如果思前想後都走唔出個囚局時，不如把心一橫，置諸死地而後生，有時或者會有意想不到嘅驚喜。

當然，德州撲克嘅戰術並唔係咁。驚喜驚喜，驚先於喜。

所以，都係唔好信二手煙癮君子甲所講嘅道理。

因為，有一煙民，捧走了三百五十元。

懶‧逃避

「你懶。」
「咩懶喎，係悠閒。」
「懶。」
「呢度生活係咁悠閒架嘛…」
「懶就懶啦。」
「OK，咁滋油淡定嘞。」
「係滋油，唔係淡定。」
「…… 無你符。」

我承認，我有懶嘅基因。一單工作需時十天完成，我會响頭五天做晒八成嘅嘢，而以後嘅五天，就會做吓然後hae吓，他他條條咁歎。無錯，我係會選擇先苦後甜。或者，我可能會俾人笑我蠢，理由係今日唔知聽日事，捱完苦之後可能一聲唔該就講拜拜。不過世事又係咪咁絕對呢？如果先甜後苦，要捱嘅苦就會更加苦。所以，我寧願早早開行馬力做完大部份嘅嘢先，都唔想拖到最後臨急抱佛腳。歎，都要歎得舒服啲嘛。之又咁，諗諗吓，我都唔算係懶果喎，起碼我係勤力完先至去偷懶。

哈哈，我勤力，係因為我懶。

「錯！你勤力，係因為你想懶。」
__________

有問題出現，你會選擇即時解決問題，抑或逃避呢？

我會睇情況，如果有啲問題係有得逃避嘅話，我會選擇逃避。

縮頭龜？

Oh well，我咁講，係因為有啲問題，如果要即時解決嘅話，可能會有好壞嘅效果。逃避嘅目的就係想拖延個問題，到咗某個時候，當時機成熟時，問題可能會容易啲解決。又或者，唔去解決就已經係最好嘅解決方法。

釣魚臺群島主權問題，中國一直逃避。

海峽兩岸問題，台灣一直逃避。

如果要即時解決呢兩個問題，後果會如何呢？

所以我認為，逃避問題唔係縮頭龜，因為逃避嘅背後，其實可能經過好多嘅計算。
__________