鬚

年幼時每朝都見老豆剃鬚，用個電鬚刨「嗤嗤」聲咁剃，心諗剃鬚呢個動作幾man，我又幾時開始需要剃呢。

已經唔記得幾時開始剃鬚了，初初剃鬚，應該只係得幾條毛仔，借咗老豆個電鬚刨學佢咁剃，三兩吓就剃完。老豆呢部樂聲牌電鬚刨呢，依家應該有大約三十年歷史，佢仲用緊，真係唔講得笑。後來，我自己又有一部電鬚刨，剃吓剃吓，鬍鬚就越長越多越長越硬。

又唔記得幾時，响偶然嘅機會下用過剃鬚刀之後，從此就同電鬚刨講拜拜。濕剃除咗比電鬚刨剃得更乾淨滑溜之外，從剃鬚膏果種微涼到剃鬚刀刮落嚟果種灼熱再到鬚後水果吓冰涼，簡直就係一種享受，不過平價嘅鬚後水真係好難頂。以前，我用有兩塊刀片嘅剃鬚刀。後來，某剃鬚刀牌子嘅研究人員花咗幾千萬去研究點樣可以令把刀更貼面剃得更徹底，研究結果就係加多一塊刀片。依家市面上更有五層刀片嘅剃鬚刀賣添。不過我覺得，三層刀片就夠，再研究嘅話，不如研究更耐用嘅刀片仲實際。

見一啲意大利男子留一條幼幼嘅鬚根好鬼有型，就好似巴治奥咁。不過呢，中國男子留鬚根通常都唔係咁好睇，始終中國男子唔多係粗獷型。又不過呢，又有啲女仔又鍾意男人留鬚根果喎…

有幾會嘅話，聽蔡瀾講，光顧吓啲上海式剃鬚先，應該會好正。