心靈感應

心靈感應，係一種好虛幻，兼且無得解釋嘅超能力，火某相信有。

心靈感應係有別於默契，默契係可以培養出嚟嘅。就好似一隊籃球隊咁，幾個人一齊打咗幾年波，大家夾咗咁耐大概都會知道隊友嘅走位同習性，眨一眨眼就知道對方想點，當年Utah Jazz嘅John Stockton同Karl Malone咁夾，完全就係默契。

而心靈感應，就係天生嘅，並唔係長時間培養就會有。

火某對心靈感應嘅解釋係，每個人都會釋放出一啲微弱嘅腦電波信號，而每個人嘅腦電波都會成日轉去唔同嘅頻道。當兩個人嘅腦電波一齊轉到極為接近嘅頻道時，大家都會接收到大家嘅信號而感應到對方嘅思想同行為，就好似walkie talkie咁。

火某對Psychic嘅睇法，係佢哋嘅腦電波信號比一般人強，而且帶有侵佔性。佢哋睇人嘅過去同預知能力，火某認為有少少似電腦黑客，hack咗人嘅腦電波信號，攞咗人哋嘅資料，然後進行分析。當然，火某亦認為Psychic係帶有心理學成份，但係，佢哋有啲能力，係有別於常人嘅。

點解火某會相信有心靈感應呢種所謂嘅超能力呢？因為火某由細路仔果時開始，耐唔耐就感應到鶴爸爸嘅信號，而且，感應仲可以係隔咗成個地球咁遠。

話說某年夏天，火某回港工作。一天晚上，火某一個人响屋企百無聊賴唔知做乜，又無開電視睇，又無開收音機，住喺三十幾樓，間屋其實都幾靜吓。正當火某响度發緊吽竇之際，突然間喺耳邊聽到鶴爸爸叫咗火某一聲。話明一個人响屋企，間屋梗係無人啦，點會有人叫火某啫。於是，火某就拎起電話，打俾身處地球另一邊嘅鶴爸爸傾下偈。電話一打通，就即刻聽到鶴爸爸拎起電話响度喂、喂、喂。火某同鶴爸爸講話係我呀，打番嚟睇吓你哋點呀。跟住鶴爸爸就話：「我咁啱想打俾你，一拎起電話想打果時，就聽到你把聲咯。」

所以，火某係相信同鶴爸爸有心靈感應嘅。就算有朝一日要同鶴爸爸陰陽分隔，火某相信，火某仍然會聽到鶴爸爸嘅呼喚。
______________________________________

瞓醒一覺，諗諗吓，都係算吧，唉...