星期三, 5月 30, 2007

星期四, 5月 24, 2007

新歌首播



Sir Paul McCartney 新歌 Dance Tonight。

Sir Paul McCartney 今次將新歌MV 放喺 YouTube 度作首播,與其俾人放上網,不如自己嚟,可以話係開創潮流。

依家聽Sir Paul McCartney 嘅歌,好似有D老土,話晒佢當紅嘅時候係 Beatles 果陣時。唔知點解,聽番Hey Jude、Michelle、Let it be 等等嘅歌就覺得好正,反而新歌就無乜吸引力,就好似阿麟伯咁,佢對上一次出碟有咩歌好聽唔好問我,我淨係聽佢八十年代出嘅歌啫。

既然係咁,Sir Paul McCartney 呢首 Dance Tonight,除咗喺 YouTube 度首播之外,仲有咩吸引到我嘅注意呢?

有,我鍾意 Natalie Portman。


世界末日

「有無諗過生唔生仔呢個問題?」

「都有嘅,不過生咗出嚟責任重大,又唔知世界變成點。如果世界立立亂嘅話,都唔知生佢出嚟係愛佢定害咗佢。」

「預言話八十年後先至世界末日,我哋呢一輩都可以生多一代嘅。」

「咁到時我個仔又話要生仔嘅話,咁我咪害咗我個孫?」

「唏,呢D嘢到時就由你個仔決定啦,依家擔心定咁長遠嘅事…」

「丫,不如就生咗佢出嚟,跟住就好似我隻貓咁,到差唔多時候就閹咗佢,咁咪得囉!」


天各一方

喺好耐以前,我寫過一個blog,
唔知你仲有無睇呢?
今日,你同我天各一方,
你有你嘅生活,我繼續我嘅忙碌,
但係假如有一日,
我哋真係喺路上高偶然咁撞倒嘅話,
我哋可能會點下頭,或者問候一下,
然後跟住就唔知講咩好。
因為你會發現,我已經唔係火鶴。
正如我可能唔再認得你,
但係,咁其實又有咩關係?
我只係知道,喺呢幾個星期,我要放大假。

Blog主遠遊,化身黄鶴。
休blog數星期至數月不等。
不定期到處留言/情模式中。

其實,乜嘢先至係真實而恒久嘅呢?
或者我應該就咁保存住呢一份希冀同埋渴望,
俾我相信世上有一個blog係垂手可得(註)
但係永遠係掌握之外。
有時,文字寫喺blog裡面,會化為binary number,
反而藏係心裡面,可以歷久常新。
貪求思慕只因痴,一切眼淚思憶都係徒然咋。


初現真身

阿大鐵鎚同70F都貼張相現真身。
我,資質愚鈍,學極都學唔到70F嘅攝影技術,
所以,我唯有用文字俾D提示大家做個拼圖…

1. 搽頭蠟搽到頭髮貼貼服服;
2. 眼鏡成寸厚;
3. 滿面暗瘡;
4. 皮黄骨瘦面青口唇白;
5. 著恤衫扣頸喉鈕兼攝衫腳;
6. 穿窄腳蘿白牛仔褲;
7. 白色運動襪;
8. 腳踏Mohawk波鞋。

响未來幾個星期,如果你見到個咁嘅茂利响條街度拎住個相機鬼鬼鼠鼠咁偷影女學生裙底,記得埋嚟揼我鑊金喎,唔駛留力,唔該!拜託!

死啦,我真身全現嘅日子好似越嚟越近啦。

有緣嘅話,書局或涼茶舖見。

(註)正字正確:唾手可得。

星期一, 5月 21, 2007

不再年青

乍暖還寒的天氣,正是開季的日子。

於冰涼的早上,做點點熱身運動,便開始比賽。

飛呀飛呀型呀型呀撲呀撲呀醒呀醒呀撻呀撻呀勁呀勁呀…

最終結果,是完封對手。

回到家中,整個背部劇痛。

原來,我已經不再年青。


世界圓 網絡世界更是圓

阿力呢番言論, 對我嚟講,微不足道。


當時發生過咩事,每個人,「心上自有權衡」。

就好似我對afterlife嘅睇法一樣,就算面對千千萬萬人的質疑扭曲,亦都絲毫無損無動搖過我嘅信念,我,只會一笑置之。

佢有佢表達意見嘅權利。

而我哋,只要認清同緊握我哋嘅信念,就已足夠。

唔知點解,我諗起(創世記2天地有情)中,古天樂臨死前見到陳錦鴻對佢講嘅一番說話:「阿力,辛唔辛苦呀?其實,我哋做錯咗…」

仲話我唔係電視精?

那年春夏之交的風波,隨著年月的洗刷,竟由重轉輕,幻化成一縷輕煙。

而這嬝嬝輕煙,正引領著我回家,一處和平安穩的棲息所。

多謝70F
_______________________________


「超!睬你都儍,咪嘈住我瞓晏覺。」

星期五, 5月 18, 2007

爪下無情


「呢位阿姐,你好似好唔妥阿樹熊先生咁喎。」

「係又點呀?」

「無,我驚你悶,想你有D嘢玩,有D寄託咁啫。」

「唓,我慣咗獨來獨往,其實你跟本都唔知我想要D乜,無啦啦硬質隻樹熊俾我,我唔開你拖都算俾面你喇。」

「我都係想你好啫。噢,樹熊先生,請你唔好介意,你就原諒呢位阿姐啦。」

「妖!你咪再質隻樹熊埋嚟呀!再係咁,咪怪我爪下無情呀吓!」

星期二, 5月 15, 2007

金句鶴王

打招呼

某人(快兩拍問):How are the girls doing?

受害人:Good Good!


無米

阿媽:哎吔阿仔屋企無米啦…

阿仔(死撐咁話):邊個話屋企無米?屋企大9把米…


無水

阿媽:哎吔阿仔屋企無水呀…

阿仔(好驚咁講):吓唔係吓話,仲唔快D去「WAE」水?死啦死啦,男人最驚係無水…

阿爸(氣定神閒):唓!女人仲驚無人娶,添…(高八度)


結婚

(接新娘前…)

攝影師:喂,俾D氣勢,整句口號啦。

新郎(好有氣勢咁嗌):好!我要結好呢次婚!

損友甲(自言自語):吓,呢次?你條衰仔仲想有下次?

損友乙(同新郎講):喂唔係喎,有得揀,你至係老闆喎!你依家「TUN」呔都嚟得切架…

星期日, 5月 13, 2007

殊途同歸

一篇水蛇春咁長之餘又喋喋不休嘅文章,竟然揾唔到廁所位,多謝老兄。

又,其實你哋見過水蛇春未?係咪真係L咁長?

老兄一條水蛇春咁長嘅棒當頭一嘢扑落嚟,唔使揾水淋頭火某都即刻醒咗。

醒,係瞓醒個醒,唔係醒目個醒。

當初,我開blog嘅目的,係有包含憑互聯網文字嘅力量去批判別人嘅成份。所以,當時嘅我,好鬼好火,你惹我,我燒你全家,就算你無惹我,只要你講咗句我唔啱聽嘅說話,我都會燒你春袋,寫D有骨嘅嘢。

(小側田,你仲痛唔痛呀?D毛生番出嚟未呀?)

可是,自從我响blog界入面,認識到一班聰明、醒目、正面、樂觀、有智慧嘅虛擬朋友仔之後,睇住佢哋嘅文字,我就喺不知不覺間被佢哋感化咗。

火某幻想,如果第時有D未成年嘅孩子犯咗事要判入教導所接收感化嘅話,不如判佢哋睇晒我個blog list度所有人嘅文章仲好。睇晒佢哋所寫嘅嘢,一定比响教導所所學到嘅得到更多更多。

實不相瞞,到依家,我都仍然有批判人嘅心態。

雖然火某心中果一團火喺唔會熄嘅,不過,火氣就已經無以前咁猛喇。

回望呢幾個月自己寫過嘅文章,火某發覺自己原來已經好耐都無火燒春袋喇。寫嘅都係一D時事、個人感受同生活上嘅瑣碎事。

再睇番D留言者嘅留言,原來,留言者關心我個人嘅心情感受,係多過認同我對別人嘅批判。

老兄呢一條水蛇春咁長嘅棒,令我領悟到只要我肯睇開D包容別人,人哋就會自然樂意親近我關心我,令我知道就算現實生活上遇到嘅人係幾咁冷冰都好,只要返到屋企打開部電腦,見到有人話佢都好在乎我嘅時候,我都可以感受到一股甜甜嘅暖意。

某著名補習天王有一段大智慧
「但是,甜味畢竟是太濃了,我小心地用長匙潛入海中,尋找一些酸味,改變現狀。我用力擠壓檸檬,視之為敵人,用力打碎它們,意圖改變一切。呀!酸味和甜味化開了,混和在一起了。原來,這就是真相─酸甜並有,也許,人生原來就應該這樣?」

如果,苦包容不到甜和酸,酸包容不到苦和甜,甜包容不到酸和苦,咁,我哋仲邊有咁好味嘅檸檬茶飲呀?

殊途同歸,有意思。

水蛇春咁長嘅CK老闆係我嘅榜樣。

共勉。

星期五, 5月 11, 2007

政治笑話

列根問戈爾巴喬夫:你收集不收集政治笑話?
戈爾巴喬夫回答:當然收集,我還收集講笑話的人,而且收集了兩個集中營那麽多。
(侮辱,葷笑話老頭 – 蔡瀾)

香港,為何會變成前蘇聯,有類似的政治笑話出現?

星期三, 5月 09, 2007

最低小結

最低工資呢壇嘢,真係可以花盡晒腦汁,拗到沒完沒了。

見豺狼兄呢個帶頭生事者話要寫個小結,唔爭在我都寫埋啦。

我個小結,其實係回答Sara嘅問題。

Sara,你睇我幾在乎你…

當然,我並唔係想改變其他人對最低工資嘅睇法,只係想意見討論及分享。

從網上看到一個觀點:

「有做嘢就要有飯食,唔識做嘢就要學到識做為止,講完,句號。」Car and Pier 9.5 - 最低工資 III

我同意呢點。

不過,我唔係「睇大數」嘅人,反而,我會睇政府有無新增其他任何福利配套措施去幫助「唔識做嘢嘅人學到識做為止」。

如果無嘅話,淨係實行最低工資就算,咁,我覺得,呢隻係政治牌,並唔係全心保障低收入人士以及其尊嚴。

「學到識做為止」,我理解為接受過高等及高質素教育。

要香港做到人人學做嘢學到識做為止,就必需要增加教育資源及資金,實行全面性的教育改革。

教育改革包括延長免費教育至中學畢業,以及70F成日掛响嘴邊嘅「小班教學」。

還有投放更多嘅撥款俾教育學院,引入更多人材,培訓高質素嘅教師去作育英材。

呢個係第一步。

等二步,係增加失業援助嘅福利。

如果要實行最低工資,一個健全嘅失業援助福利計劃係相當重要。

因為最低工資一定立,一定會出現一批失業大軍,佢哋可能係低技術工人,又或者係一啲支持唔住最低工資所帶嚟高成本而結業嘅中小企嘅員工。

而政府有咩失業援助措施可以幫到呢班人呢?

失業援助嘅福利措施,可以包括失業援助金、再培訓資助計劃、增加就業職位等等。

要實行一個新政策,就必先要了解現在的社會狀況,研究需要實行那種配套措施才可把新政策應用到預期嘅效果。

齋「睇大數」,就如啟德機場唔夠用,然後講一句「响赤鱲角起個超大嘅機場咪得囉」一樣。要起新機場,係咪先要攪好交通配套設施先呢?

齋起新機場而唔事先做好青嶼幹線及機場鐵路,起咗等於無起,係咪得不償失?

而我嘅立場,唔係唔贊成最低工資;

而係,政府要做好教育及福利、減少貧富懸殊差距先,才可實行。

Sara,依家正式答你問題:

你問:「貧富懸殊差距細,仲駛乜最低工資?」

政策分兩類,一類係「預防」,另一類係「改善」。

我對最低工資呢個政策嘅見解,係「預防」一啲貧富懸殊差距細嘅國家如果遇到經濟低迷嘅時候,唔會俾企業壓低工人嘅薪金到一個唔合埋嘅程度,而做成更大貧富懸殊嘅情況。

而最低工資,並唔係用嚟「改善」貧富懸殊,又或者「改善」低技術工人或窮人嘅生活質素。

基於上術我對最低工資嘅見解,再舉個例,或者你會容易明啲。最低工資就好似流感針咁,要响一個人無病無痛打先至起到「預防」作用。

如果一個人已經病到九彩,打流感針又有乜用?

係咪要先食藥,醫番好個身體先,然後再打流感針,咁樣係咪先至係正確嘅次序?

Sara,跑完呢場馬拉松後,我就嚟虛脫致死啦…

星期一, 5月 07, 2007

黑客自白


係呀喵妃,我呢,喺未夠三個月大果時,就俾隻長頸鶴「的」咗番佢屋企囉。果日,我見隻長頸鶴拎咗個幾得意吓嘅袋嚟,我咪好奇走入去睇吓玩吓囉。蝦… 點知原來係個圈套嚟,就咁,我就同爹哋媽咪兄弟姊妹分開喇,我阿媽成日都話curiosity kills the cat啦,唏,點知玩玩吓又唔記得添,damn it!响去長頸鶴屋企果時,我真係驚到震架,仲嗌足成程車添。點解咁驚?嘿,你無聽過十大名菜「龍虎鳳」咩?

之後對住長頸鶴耐咗,我都知佢都好錫我嘅,不過就用埋晒啲我唔係咁Li-Ke嘅方式囉。佢呀,呢隻衰鶴呀,都唔知係未心埋變態,成鬼日捉住我嚟抱,我最鬼憎人抱抱架喇,攪到我成身污糟晒,每日要我自己沖多幾次涼。仲有呀,佢又成日想同我梳毛,我一見到個梳毛刷就即刻扯火架喇,如果佢仲夠膽將個刷刷响我個身度,我真係同佢開拖架勢係假。話時話,我同佢都開咗N咁多次拖Lu,哼… 唔發火當我病貓啦嗱!

仲有呀,呢隻咁嘅長頸鶴,又成日無啦啦影我相。出去同啲女影咪算囉,返到嚟又要影我,影唔厭架咩?我都無佢咁好氣。

喂,喵妃,你樓下隻小野貓同我都有幾分似喎,性唔性感嘅先?仲有呀,你將佢改成同我同一個名,佢真係有番咁上下cutie至好喎,如果唔係呢,我實整多幾條血痕喺你條玉腿度,等你成個夏天都無得著短褲涼鞋,嘿嘿嘿嘿…

星期五, 5月 04, 2007

最低工資

最低工資係好係壞,係要視乎喺一個咩嘢嘅國家實行。

火某身處嘅國家,貧富嘅生活質素差距唔大,而且國家嘅福利好,所以,實行最低工資,係好事,因為:

= 國民可以接受高等教育,至少都可以保証中學畢業。而入讀大學及專上學院嘅機會亦較大,所以,擁有高學識嘅人,週街都係。
= 擁有高學歷嘅人,最低工資對佢哋嚟講,係無直接影響,亦無話對一啲上進勤奮嘅人唔公平,因為佢哋係唔咁心一世都攞最低工資嚟過生活。
= 喺經濟衰退嘅時候,最低工資反而可以保障到呢班接受過高等教育嘅人仍然可以得到合理嘅報酬同就業機會。而且,更唔會俾一啲低學歷兼自降身價到達無埋水平嘅人搶飯碗。
= 國家福利好嘅好處,係,就算公司真係唔掂要裁呢班人,政府都有失業救濟金俾佢哋,仲會安排佢哋去就業培訓,幫佢哋再揾工作機會。而佢哋亦唔驚會俾新僱主壓價,壓到無理嘅地步。
= 因大部份國民擁有高學歷,低技術員工就唔會有供過於求嘅問題,所以,最低工資,亦可以保障呢班小數低技術人員嘅基本生活需要。
= 最最最重要嘅係,呢度無源源不絕嘅黑工。

至於香港:

= 教育福利只到中三,中三畢業後就可以投身社會。如果實行最低工資,就會引伸兩個極端後果:
+ 譬如,最低工資係$6000,一個辨公室文員職位,由一名中三畢業生同一名中五畢業生爭,爭贏嘅就99%係中五畢業果個;
+ 中三畢業果個,就因為爭唔贏個文員職位,於是就去做洗碗打雜工作,人工都係$6000。呢位中三畢業生見自己學歷唔高,有前途有晉升機會嘅工又唔夠人爭,兼且$6000嘅收入都可以應付日常生活嘅需要,於是就樂意甘心去打呢份工。
= 基於上述兩個極端後果,高學歷果啲,就有飛黃騰達嘅機會。而低學歷果啲,就會繼續沉淪。
= 更何況,大陸有大量人材。$6000請個中三畢業,不如$6000請個國內大學畢業生。
= 咁,只會令貧富懸殊問題更加嚴重。
= 現今香港不設最低工資制度,咁,起碼,中三畢業生都可以將人工有彈性地降到,譬如$4000去攞一個機會。如果一設最低工資,呢班人,就會依賴一啲無前途嘅工作,咁就連一個向上爬嘅機會都無埋。


以上所講關於最低工資嘅睇法,其實有茅盾,而火某,亦無一個特定嘅立場,因為,最低工資唔係一條方程式,見人哋攪得好,就可以照辦煮碗放喺自己度希望攪好個經濟。最低工資有時會適用於某一啲國家,有啲國家就唔係咁適合。適唔適合,係要睇個國家嘅經濟環境、地埋環境、國家福利等等配套去衡量好定唔好。

火某認為:

設立最低工資,係保障擁有高學歷高智識嘅人。
不設立最低工資,係保障低學歷低技術嘅人。

最低工資問題,要分清楚邊樣係因,邊樣係果。
要實行最低工資,必先要增加教育福利以及減低貧富懸殊情況。
最低工資,並唔係用嚟減低貧富懸殊嘅靈丹妙藥。


公平與公義

= 設立最低工資,就一定有「公平」和「公義」?
= 「公義」個「公」,size does matter,要有幾多才算「公」呢?
= 世上有無「絕對公義」?


又丫,寫篇咁嘅嘢,真係辛苦過返工。
又又丫,今日食晏叫咗杯凍檸荼,一路飲一路笑。
又又又丫,Nowitzki...
又又又又丫,CB4...