星期二, 12月 25, 2007

料理鉄人

今日料理の鉄人要示範嘅菜式,係Prime Rib。

首先,要揀舊靚嘅Prime Rib。我去果間超市有兩種Prime Rib,一種係超級雪花,唔駛講都知係脂肪含量較多兼且分佈平均,售$18.99一磅。另一種,係脂肪含量較低,無咁多雪花,售$8.99一磅。眼利嘅我,見到平啲果堆Prime Rib裡面,有舊雪花介乎中間分量嘅,咁我當然就叫售貨員攞果舊俾我啦,佢話我真識揀。駛乜講,哼!(((((...自大中... 請勿打擾!)))))


OK,煮之前,首先要將舊肉放喺室温度解凍,解凍後就用毛巾索乾舊肉表面嘅水份,再用鹽同黑胡椒粉搽响舊嘢度。

預先調較焗爐温度為450F,等焗爐熱咗之後,將舊Prime Rib連焗盤一齊放入焗爐,焗二十分鐘先。二十分鐘過後,將焗爐温度收細為325F,然後憑各自生熟喜好而調較烤焗時間。以我舊Prime Rib為例,六磅重,我要七成熟,咁每磅肉嘅烤焗時間大約為二十分鐘。六乘二十等如一百二十,咁我舊肉就要焗佢兩粒鐘喇,記住,開頭450F果二十分鐘,都要計埋响呢一百二十分鐘入面。


可惜,焗呢舊肉時出咗個小意外。屋主朋友唔記得話我聽個焗爐鎖有問題,要等到焗爐冷卻後先至可以開焗爐,咁,我舊肉就响焗爐入面繼續俾熱力輪姦,而我就隔咗响個小窗之外,嘆惜自己對世事無常嘅無能為力。

跟住煮醬汁。材料有胡椒、紅酒同野蘑菇切薄片。

用焗盤底啲牛肉油將野蘑菇煎熟,加胡椒紅酒,煮滾紅酒後加上適量豆粉獻,即成。


將牛肉切成扒,上枱。


食之前淋醬汁,嘩!真係(((((好好味呀!!!)))))

煮嘢食呢,對我嚟講唔難。早喺highschool嘅年代,我同另外四個朋友(全男班)組成一個「慧姸雅集」飲食聯盟,於每個星期六相約喺某朋友屋企嚟個型男廚房大挑戰。講真,呢五條型男嘅廚藝,唔差架,煮嘅嘢一定食得落肚,仲要個個星期係咁操添,想煮得難食都幾難。

同場派對加映:Invest of the Day。
以以下圖中嘅禮物,換取價值四倍半嘅禮物,一日內嘅增長率為450%,好厲害呀我!
哈哈哈哈… (((((...又自大中... 請勿打擾!))))) 哈哈哈哈…

星期一, 12月 24, 2007

聖誕交叉扑之(聖誕鴨)

本篇係契媽HANA响百忙之中抽閒嚟寫嘅作品,聽講仲會有下集。據未經證實嘅小道消息透露,下集會有點點出場,點點將會被公司派去鴨店放蛇做資料獀集,點知情陷強仔,更被強仔攪到慾罷不能,劇情精彩萬分,不容錯過。如欲知後事如何,請定期留意HANA個Blog啦,多謝。

聖誕交叉扑呢個idea幾有創意,點都要俾啲鼓勵呀大鐵鎚

就送個火鶴熱吻俾大鐵鎚啦... 都係好嘢嚟架!



我叫張小強今年二十七歲,係一個專業的健身教練,雖然我讀得書少,中五畢業就出咗來哩個萬惡的社會工作,好彩二十七前成功制造咗我既嗰一晚,我阿爸盡心盡力,我阿媽都萬分高興,所以我哩個愛的結晶品硬件好好,身型好健碩,又幾英俊下。妹妹仔喜歡叫我高大威,細個時我都好驕傲,大個咗先知自己原來淨係威在外表,我個連體細佬咪又係普普通通。

我一生人都好有女人緣,八歲已經開始收情信;十二歲同隔離班個小娟拍拖;拖過手仔又錫過個嘴;十四歲俾個英文miss嘗咗鮮飲咗頭鍋湯,當我認住佢係我的女人時,miss淨係俾咗封利是我,叫我以後唔好再搵佢。我喊咗五分鐘,用衫袖抹幹眼淚,跟住揸住封利是去買咗罐黑啤一飲而盡,原來啤酒一變黑係苦得咁緊要嘅。從此開始咗同我細佬一齊既閱女無數生涯。

至今女人對我來就似街邊既的士,揮一揮手随時有得上,但係啲的士費越來越貴,咁落去真係唔係辦法。我咁靚仔時不時都會遇到唔收錢既司機,第一次固然興奮,內心實在感謝阿媽生成我一個萬人迷嘅外表,遇多幾次先發覺唔收錢既啲士通常都係巴士改裝。搞搞下我開始單手上網都唔搵女人了。

就來聖誕節我都係孤家寡人似乎真係有啲齋,啲卡數又越欠越多,所以當今日見到熟客Bobo媽時就同佢講:聖誕嗰幾日假期我決定去佢間場客串。Bobo媽係尖沙嘴最旺嗰間會員制鴨吧既老板,成日都游說我去幫佢手,今日佢如願以償開心得笑不攏口。話保証我兩日攢到一個月人工喎。

好,一於在唔凍既聖誕去做鴨。

哩幾日我心身疲累,日頭係健身院返工身水身汗,放工返到屋企係咁上網做資料收集,夜欄人靜果陣時就拿起夏蕙姨幅肉照自我修練。唉,點知未還始做鴨先發覺到自己已經不舉,原來對住夏蕙幅相,個腦點諗舒淇同木村乃都係冇鬼用嘅。帶住萬分慚愧同內疚嘅心情,我忐忑不安地打咗個電話俾Bobo媽,聽我講覺不舉經過,Bobo媽係電話度足足笑咗兩分鐘,笑完佢話:傻仔,我哩個係頂級場,一個人一晚最低消費千五蚊未講街鐘架,街鐘就行緊長八短五,而啲客中意溝仔feel,未必咁快會去街,我果度絕對唔會有類似夏蕙姨嘅物體,所以呢你即管放心,淨係用你平時返工對我哋啲靚女客人嘅態度對我啲客已經ok,當然我總會操下你。

女人哩樣野真係神奇,Bobo媽一句"操下你" 已經即時令我細佬昂首挺胸,諗起Bobo媽36D、26、36既美好身體(天然胸前偉大嘅女人條腰一定唔會22、23,哩啲係生理常識,兄弟們要記住了),運動後紅粉菲菲嘅面珠,起伏跌蕩嘅胸脯,啊呀!明知今晚要返工做聖誕鴨都係忍唔住爆發咗一次。

冲咗個靚凉,穿上我衣柜裡唯一一套飲衫,姑慈嘅西裝,我覺得自己唔差得過劉華,下屆四點我淮時到達Bobo媽哩間於尖東海旁商業中心嘅酒吧,入門要按視像對話,確認咗先會由電腦開啓大閘,入到酒吧感覺冇乜特別,只是比較豪華,而沙發位全部呈U字型,超高嘅椅背私癮度較高,另外總有八間對住維港嘅VIP房。經理Dee哥帶我入咗老板房,Bobo媽穿了一你黑色吊帶裙,映得皮膚更雪白,胸前兩團寶具幾乎奪衣而出,我感覺到細佬又唔安份了...

待續待續...

星期日, 12月 23, 2007

聖誕禮物

今個聖誕已經收到嘅禮物:

¨ 4GB iPod nano

今個聖誕買咗俾自己嘅禮物:

¨ PING G5 iron set (4 5 6 7 8 9 W U) $500 + 14%Tax

¨ Lomography Holga Camera (Green Colour) $78 + 14%Tax

¨ 藍/紫混合highlight加洗剪吹 $140

今個聖誕仲想買俾自己嘅禮物:

¨ Canon EF 70-200mm f/2.8 IS USM ~$1849 + 14%Tax

¨ iMac 24inch 2.8GHz Intel Core2 Extreme 2GB memeory 500GB HD ~$2449 + 14%Tax


有時,男人癲起上嚟,絕唔會比女人遜色。

星期五, 12月 21, 2007

翻版對話

「喂老細你之前又話係隻碟嘅問題,但係你換過俾我果隻碟都係喺同一個位出事果喎,咁即係話你download果時衰咗啦。你拎得出嚟賣嘅就好心揾啲好啲嘅source啦,咁樣要啲客走嚟走去好好玩咩?望咩呀望?仲成碌木咁企响度喎,仲唔嗱嗱淋去download?駛唔駛我自己去download呀…」

幸福國度

午飯時間,正在疑問為何魚柳包裡只得小半塊芝士的時候,看見一位小男孩爬上座位,雀躍萬分,而他的爸爸則手拿一盤子的食物,然後放在桌上。

那是一間位於旺區、開設在地庫下的麥當勞。收銀機前,站著一位小男孩,害羞地看著收銀姐姐。儘管事前小男孩的爸爸已教了他要說些甚麽,並給予他適當的鼓勵,但最後,小男孩最終也說不出半句話來,要站在他身後的爸爸代勞。

小男孩很喜歡那一間麥當勞。那裡有好吃的薯條,有色彩鮮豔的桌椅,還有,那裡有一列長長的火車。小男孩很喜歡坐在火車上的卡座和爸爸媽媽一同享受食物。爸爸把蕃茄醬包撕開,然後擠在墊紙上。金黄色的薯條沾上了鮮紅色的蕃茄醬,對小男孩來說,是世上最美味的食物。噢… 是蕃茄醬太少了吧,爸爸便托咐小男孩去拿蕃茄醬。小男孩又走到櫃檯面前,望著收銀姐姐,又說不出半句話來。過了一陣子,媽媽知道小男孩又是膽怯而講不出口了,便來到櫃檯前,拿了兩包蕃茄醬,然後帶小男孩返回座位。

小男孩的眼光,帶著點點的委屈,淚水在眼肚裡正蕩樣著。小男孩還小,要他獨自一人去面對世界,當然會失去了在父母襁褓裡的安全感而頓覺無依。小小的他,還未懂事便有了初次懊惱父母的體驗。以後,機會還有多的是,要到他真正長大的一天,他才會明白父母的心意。

那列彩色繽紛的列車,一直由幾位卡通人物陪伴著小男孩的一家人,隨著隆隆的火車聲和縷縷輕煙,彷彿穿越時空和白雲,駛向幸福的國度。

**********

如果生命只剩最後一天,
我會選擇回到至親旁邊,
在父母的懷中安然睡去。

星期二, 12月 18, 2007

深宵不眠術

前日,有人超級夜瞓。
今日,有人足知頂唔蒲,早早就瞓喇;
時間,係零晨四點半。
唉…
____________________

夜瞓,係一項絕技。

同其他絕技一樣,有人好易上手,有人鍛鍊一世都學唔到。

當然,成日出嚟蒲嘅人,唔需要鍛鍊夜瞓呢門絕技,佢哋咁鍾意夜生活,俾成樽安眠藥佢哋都會當糖咁食啦。

夜瞓絕技,係我呢啲懶人必要鍛鍊嘅。我通常一入黑,一到十二點,就算唔撻落張床到,都會頭鈡鈡鈡到想死咁濟;但係上床瞓呢,又好似好嘥時間咁。有得嘥時間呢,好聽啲講係有福氣,但現實啲諗呢,少咗時間做嘢咁我咪唔可以提早退休囉。

依家,又嚟到「飯氣攻心呵欠頻」嘅地步,有無人可以教我,點樣可以徹夜不眠呢?

Fusion

我鍾意美食,並唔係乜都可以塞落口果隻,我係一個有要求嘅食客。潮流興fusion,試過一間中泰fusion菜,食完就怕怕。Fusion,只不過係美其廚藝差勁嘅名字吧。

Fusion,如果放响流行曲度,我反而幾鍾意。

與其講fusion,不如話cross-over。

講音樂唔係我嘅專長,一首歌好唔好,我係聽首歌順唔順耳,歌詞對唔對到號,就係咁。

最先聽cross-over嘅歌,係楊千嬅嘅「向左走」。

遲啲,有悲慘啲嘅「樓下來的女人」,游鴻明嘅歌。

再遲啲,有張智成嘅「快樂」。

依家,我成日聽到爛嘅,有呢首:



香港人聽歌好奇怪,基本上唔係聽歌嘅,而係睇歌手個樣。靚仔靚女啲嘅,唱乜都好聽。老實講,我都會睇樣架,不過呢,我就唔會因為歌手個樣無咁靚而否定佢哋嘅歌囉,況且,大個咗嘅Kary,都唔差丫。

星期日, 12月 16, 2007

雪映移城

無記啲旅遊節目,最興揾兩男兩女做主持,去到一個地方然後玩個愛情大兜亂,真係呢…


呢排呢邊播緊無記响二月時播嘅「雪映移城」,由兩個女仔去尋找日本東北嘅雪地奇景,好似藏王樹冰呀、雪中蘋果呀等等,再講吓啲自己嘅感受,都幾好睇,幾浪漫丫。

琴晚做完運動揸車返屋企時,開始落雪。遠處嘅雲,係一片紅色。新聞話今次嘅雪暴係十年嚟最強勁嘅一次,所以我揸車都特別小心,注意:係特別小心,唔係特別慢。番到屋企,坐响暖風口旁邊,望住窗外嘅大雪,總覺得屋企特別有安全感,夏天都唔覺架。人就係咁,平時無病無痛嘅時候,總唔會留意到身邊一啲嘢嘅重要性,當出事嘅時候,先發覺呢啲嘢嘅可愛,人,其實係咪犯賤嘅呢?我諗,係架,從細路仔開始,我哋都唔會完全聽晒父母嘅說話,佢哋叫我哋唔好跑,我哋偏唔聽,好喇到跌損手腳喇,我哋又會喊又會叫呀媽。到大個咗,又嫌呀媽囉囉唆唆,到遇到挫折時,又會諗起呀媽,好想重回媽媽嘅懷抱痛哭一場。


初初踏足呢個國家,過第一個冬天,嚐第一口雪嘅滋味,覺得一切都係美好浪漫嘅。時間一年一年咁過,漸漸,我就越嚟越唔鍾意雪,返工前用一個鐘頭時間去剷雪嘅滋味並唔好受。不過,人係犯賤嘅,如果未試過嚴峻嘅冬天,我哋又唔會覺得夏天原來係幾咁可愛。今朝起身,出面仲落住雪,積雪成半呎深,樹上掛住厚厚嘅雪,壓到棵樹斷咁濟,都幾似樹冰架。無可否認,雪景係靚嘅,睇雪係浪漫嘅,但只限睇囉。今日,要我踏出屋企半步都幾難,不過咁,如果有個喜歡嘅女仔話要去揾藏王樹冰同雪中蘋果囉喎,我當然樂意奉陪啦,雪雖冰凍,但心温暖。雪冷心寒嘅話,都係留番响屋企吹吓暖風算吧。
____________________



無條件嘅愛,只限父母對兒女。
男女間跟本就無無條件嘅愛可言。
當去追求愛嘅同時,亦追求被愛。

死嘢,大唔起呀?再大,睇咗先講。

星期三, 12月 12, 2007

比試

今晚睇咗呢季America's Next Top Model嘅完結篇,出爐嘅Next Top Model係深色皮膚嘅Saleisha。好多人以為,做model,梗係白晳金髮女郎著數啲啦,就好似Saleisha最後嘅對手Chantal咁。其實,撈啦。睇最後一圈,响北京故宮行天橋,好明顯,Saleisha係自信好多,笑得甜,有氣質,雖然Chantal有意外失咗手,但我睇對賽果影響唔大。仲有,兩人都要化中國裝,即係响眼尾暈精度整一大片紅眼影,呢個裝跟本就係同Saleisha度身訂造,襯到絕,佢造型可以多變,俾我揀,我都會揀佢。

幾鍾意呢個show,鍾意睇時裝靚衫,鍾意睇造型化裝,鍾意睇點樣包裝個女仔,鍾意睇包裝後影出嚟嘅硬照(攞靈感嘛),仲有最重要就係,其實我都幾鍾意睇女仔,哈哈。
____________________

呢排兩位老闆興玩點歌仔,唉… 我都唔知道,點同你講好…

星期一, 12月 10, 2007

傷春悲秋

傷春,梗係悲秋啦大佬!

諗起都痛…

星期六, 12月 08, 2007

聖誔交叉扑

大鐵鎚個「聖誔交叉扑」遊戲,我玩呀。

我個email係:craneonfire@gmail.com

哈哈!

星期日, 12月 02, 2007

講低聲先

冰火眼睛

火火媽媽有一雙怒火眼睛,而我就有一雙冰火眼睛。

火眼睛,顧名思義,看見不平事,無名火起三千丈。跟怒火眼睛不同的是,火眼睛很多時會變成火遮眼,從而失去理智然後做出唔恰當嘅事。

冰眼睛,係當我心死嘅時候,無論人哋嘅處境係點,我都只係會冷眼旁觀。涼薄,都係受過傷害後保護自己嘅擋箭牌。

世途倘不險惡,又何須帶備冰火眼睛呢?

____________________

今晚場球賽,跳起爭波時俾人(LON)咗一嘢,背脊後腦同時撻落地,即刻感覺唞唔到氣,要成分幾兩分鐘先至可以爬番起身。依家返到屋企,唞氣都仲有啲chalk住。

皮外傷唔可怕,內傷先得人驚。記得「烈火戰車」入面,錢嘉樂同人鍊車時炒咗鑊勁嘅,劉德華到達時見到錢嘉樂行番出嚟,劉德華問佢有無事,錢嘉樂話無。然後,錢嘉樂嗌口渴,劉德華就遞咗樽水俾錢嘉樂,錢嘉樂飲咗兩啖後,就突然間狂噴血,咁就瞓咗响地下,好辛苦好辛苦咁死去。講真,我真係幾驚咁嘅情形發生,以為無事拉,點知失驚無神嘅時候就嚟料,真係好恐怖。要死,我寧願响發生意外時果一刻死去。咁樣吊住吊住,俾少少希望我然後又要响我唔為意嘅時候攞我命,喂,玩我啫。

嗱嗱嗱,咪講笑,今晚都係講定俾屋企人聽先,如果聽朝十一點仲未見我起身,call定白車都得喇。

現實世界中,要知道一個朋友離世嘅消息,可以有好多渠道。咁,虛擬世界呢?如果,我唔寫成個月,到底有無人會意識到我已經魂飛天外,抑或會有人以為我忙工作忙拍拖等等呢?如果我真係唔响度,咁,呢個blog咪變咗凶blog?無人有密碼登入嚟取消呢個blog,而呢個blog亦一路存在到永遠。仲有我個電郵呢?新郵件一直無人睇無人去處理,咁有無問題呢?

如果由聽日開始見我真係無寫嘢成個月、MSN又見我唔到而我又無交帶一聲嘅話,算啦,放棄我啦。

驚再無機會同响網上認識嘅朋友講呢句說話,依家都係講咗先,請對號啦:

「我愛你哋呀,保重!」

星期六, 12月 01, 2007

雲淡風輕

台北,下午一時,懷著期待的心情,踏上高鐵車廂。

高鐵的確把台灣城市的距離拉近了,不消一個小時,已到達台中。

下午的蓬甲市場,冷冷清清,胡亂地吃過午飯後,鑽進書店,拿下了一套三冊PK_兄也曾進介過的魚住誠一人像攝影教學,便消磨了半個下午。

五時許,市場熱鬧起來,各類飲飲食食的小檔也開始營業。對於一個喜歡吃的人,如我,來說,台灣的夜市,就是一個理想的烏托邦。

邊看邊走,電話響起來。接過電話,傳來她的聲音:

「我來到啦,你喺邊度?」

「我喺大學正門口。」

「邊度呀… 嗯,我見到你啦,著橙色衫…」

「係呀係呀…」

就這樣,我與這女孩再度見面。

一年前,我曾在我當時的私人blog中寫過這女孩:

她是一個頗Sharp的女孩,貌似某香港女歌星,高貴漂亮但帶點冷傲的面孔和一雙烏黑的大眼睛往往會成為別人注目的焦點。知道她的存在大約在十年前,當時沉默害羞的我只是躲在遠處偷偷地欣賞她的一舉一動,並沒有實際的行動嘗試去結識她。和她的真正互相認識是有點弔詭的,那是在一個不經意的情況下找到一些巧合,然後又在這巧合裡制造出一些不經意。現在回想起來也覺得複雜和老土,或許這是年青時的一股儍勁吧。真實的她其實不如外表般冷酷,她對人真諴、能言、有原則、知道自己想追求些甚麽。她,無論外表和內在都是那麽迷人。可是,她所行的路比一般人崎嶇,總是被一些外來因數影響以致在自己的人生道路上仍然兜兜轉轉。幸運地,她仍能抱著積極正面的態度去面對,並沒有因際遇的不好而自怨自艾,這一點是很值得人欣賞的。她最近下了一個很大的決定去改變現狀,希望她能苦盡甘來,早日行到她應得的康莊大道和找到真正的幸福。這麼好的女孩,說對她沒有感覺的騙人的。不過感情事,timing是很重要,很早以前便發覺了和她只有做朋友的緣份,現在能和她做朋友已經是一種福氣了。而對她那種淡淡的好感,就讓它成為年輕時一段甜美的回憶吧。



這女孩沒有甚麽改變,一樣還是這麽美麗,只是,她比從前更開朗,有著更多笑容。

她帶了我去吃鴨血湯、蚵仔麵線和鹵味,邊吃邊訴說大家近況,看著這女孩的眼睛,不用喝酒我也醉倒了。

吃完後便買珍珠奶茶,她告訴我她明年要結婚了,還開心地拿了和男朋友儲存在手提電話裡的合照給我看。

當時,我面露笑容恭喜她,還懂得說:「個男仔幾斯文、幾好咁喎…」

但是心裡卻咆哮了一句:「我今次嚟台灣並唔係想聽到呢D架…」

雖則,我也知道和她已是沒有可能,但仍有一絲幻想。幻想破滅,也總會有些哀愁。

其實,咆哮那句,是開玩笑成份居多。

那夜,我乘九時五十二分的尾班高鐵返回台北。

其後,從朋友處得知,這女孩的未婚夫,是個大方體貼的人。而我,也為她感到高興。

現在的一切,也變得雲淡風輕。



沒錯胖虎,這女孩,也叫胖虎。