星期五, 10月 31, 2008

擁抱

好耐之前睇過一段心理分析,係關於唔同睡姿所表現唔同嘅心理狀況。我鍾意側睡,心理分析話鍾意側睡嘅人响某程度上缺乏安全感。而側睡又分兩種,單膝屈曲嘅就鍾意擁抱人;雙膝齊齊屈曲嘅就鍾意被人擁抱。於我而言,都準架,以前我曾寫過話我係一個鍾意擁抱嘅人,覺得兩個人擁抱就好似互相分享互相支持咁。無論係同親人、朋友、情人、抑或係响IFC天台排你後面隊果個苦主,一個擁抱,都有一種互相關懷生死與共嘅感覺。

很想抱你。

星期六, 10月 25, 2008

更多

那天
妳怒氣沖沖的來電
把我嚇得發慌
但我當時已捨不得掛線了

那是我第一次聽到妳的聲音

到今天和妳通電
我更不會掛線

因為在「更多」和「結束」鍵之間
我只會選擇「更多」

星期四, 10月 23, 2008

日和月

我是日
從黎明到黄昏
照耀著

陰天的日子
可能察覺不到我的存在
或許我會躲在黑雲的背後流淚
但是我會靜靜地守候著
期待雨過天青的日子再次來臨


我也是月
從傍晚至破曉
輕照著

月缺的日子
可能發現不到我的存在
或許我會藏在陰影裡淌血
但我也會默默地守護著
期待花好月圓的日子再次來臨


我一直都在

星期二, 10月 21, 2008

十月雪

黎明降毛毛細雨,
黄昏飄茫茫白雪。
畢竟是初秋十月,
真令人激心吐血!

星期一, 10月 20, 2008

望月懷遠

海上升明月,天涯共此時。
情人怨遙夜,竟夕起相思。
滅燭怜光滿,披衣覺露滋。
不堪盈手贈,還寢夢佳期。

星期六, 10月 18, 2008

週六雜碎

讀書時選科,選咗一科比較冷門嘅科目,唔係為興趣,而係貪佢容易揾工。唔知係好彩定唔好彩,到依家,我都仲係做緊讀書時所學到嘅嘢。到底我係唔係好鍾意呢份工呢?唔係。但呢份工俾到我固定嘅收入,公司亦俾到我優厚嘅福利,所以我仍然响呢個行業度打滾。

我明白,工作還工作,興趣還興趣,如果有朝一日我將興趣同工作二合為一,咁我就會無咗樣興趣。曾經好天真咁諗,最好每五年轉一轉行,體驗吓唔同嘅行業生涯,咁先至係享受人生。但係再諗真啲,以我自己嘅資質所限,每次轉行都應該會由低層做起,人工及資歷每五年都要嚟個大倒退,仲有可能朝揾唔到晏。所以,最後我都係打消咗呢個念頭,安安份份咁打份工好了。始終,對於保守嘅我嚟講,穩陣係最緊要。興趣,都係愛嚟洗錢好過用嚟賺錢。
__________

收工時正好午飯時間,約好媽子午膳。

點了越式牛肉粉及炸春卷,春卷上枱時見到盛載魚露嘅器皿非常精美,媽子就話:「咦呢隻碗仔好盞鬼喎。」

盞鬼?!

食春卷時,媽子又先用紙巾將春卷上多餘嘅油分索乾,我同媽子講不如將條春卷放落熱湯度冲走啲油分啦,點知媽子又一句:「唔制!」然後用紙巾繼續索佢嘅油。

唔制?!

咁樣同我撤嬌?!哈哈,媽子真係有一手。

索完油後老豆來電講話又嚟食晏,三個人咁就食咗一個鐘頭嘅歡樂,只係埋單時要格外留神,否則,我會不歡而回囉。
__________

老豆有時都幾風趣幽默口甜舌滑吓,回港時同嫲嫲姑姐閒談,姑姐都話老豆係佢哋五兄弟姊妹之中嘅開心果,最識得搞氣氛。有時我諗,講吓笑輕輕鬆鬆大家又開心咁幾好丫,點解我遺傳唔到嘅呢?先天不足,咁唯有後天補夠囉,一於跟老豆學嘢。
__________

自從舊年年尾公司換咗架七人車俾我之後,我就越嚟越鍾愛呢架七人車。內籠寬敞馬力又強勁,坐又坐得舒服,有時明明返到屋企,但又唔捨得返入屋住喎,硬要再坐多一陣先至肯離開個車廂。或者再過兩年公司又同我換車時,我可能會側側膊唔多覺,留往架舊車都唔定,始終有感情嘛。
__________

夏天嘅球季已經結速,冬季球賽又來臨,轉戰七人室內場。

今晚開波,係咁。

漣漪

星期四, 10月 16, 2008

零和遊戲

米搞師兄真係好掂,琴晚同佢閒聊一陣,修正咗我一啲觀點,令我獲益良多。

我一直認為,經濟係一個零和遊戲。如果有地方經濟衰退,咁就一定有地方經濟起飛,或者係我呢亭理科生相信牛津定律啦。師兄又話:如果人人都有錢賺嘅時候,咁啲錢响邊度嚟嘅呢?我同意架,正當我以為師兄嘅諗法同我一樣,點知佢又有個註腳,話如果經濟係一個零和遊戲嘅話,咁就要加埋時間呢個因素,就好似九七前人人買樓都有錢賺,咁究竟啲錢响邊度嚟嘅呢?答案係九七年之後買樓蝕咗錢啲人度嚟。佢咁講即時令我「叮」咗一聲,完全解開咗我嘅疑惑。無錯,美國依家搞成咁,都係美國人先前先駛未來錢駛得太勁,到咗某個時候,經濟市場就會作出調整,經濟就會回落,始終都會平衡返。

講起先駛未來錢,最普遍嘅方式係用信用卡。我身上有三張信用卡,兩張係公司嘅附屬卡,而私人嘅就只得一張。基本上我係一個唔鍾意用信用卡嘅人,唔知點解,我鍾意現兜兜咁俾錢,如果要用信用卡嘅話,都要肯定銀行户口夠錢找卡數先會用,而且仲會準時還錢,息率咁高好唔抵。除咗將來供屋之外,借貸就唔會有我份咁囉。

星期一, 10月 13, 2008

零食

由細到大,屋企都唔會存有薯片糖果桃哈多粟一燒旺旺仙貝朱古力等等零食,因為媽媽從我哋細個時已經灌輸零食等於不健康呢個概念俾我哋。雖然我會鍾意食呢啲零食,但係又不至於想買一堆返屋企作為存貨,始終都係習慣咗,唔會話心思思突然想攞嚟食。而屋企僅有嘅零食,係消化餅同涼果。涼果即係廣東話嘅鹹濕嘢食,包括陳皮話梅檸檬乾等等。鹹濕嘢食唔係人人都啱,媽媽鍾意食,我就有遺傳。女人始終都係有一啲口不對心嘅心態,自己鍾意食嘅,就唔會理健唔健康。或者,媽媽對於自己嘅健康就無乜所謂,但就會為仔女嘅健康設想,所以先至有咁嘅雙重標準。每次返香港,我都會去永吉街買檸檬王俾媽媽,我哋都會為呢檔車仔檸檬王而瘋狂。

有好多人以為,身形較肥嘅人係鍾意食零食食得多所至。但依我所見過,瘦小食極唔肥嘅人先至會食得多,得天獨厚嘛。肥嘅人,飲啖水都肥啦,仲邊有Quota食零食喎。

萬聖節就快到,屋企已經有幾箱細包裝薯片準備派發。响呢段日子未到萬聖節當日,我哋就耐唔耐偷一包薯片嚟食。呢段時間就係全年唯一會食薯片嘅時間,不過,始終都唔會咁過份囉。

悠閒假日

十月嘅一日假期,當其他人四圍揾地方去時,我就選擇留响屋企。

今日係長周未嘅最後一日,天氣雖然好,陽光白雲,氣温仲竟然有廿多度,以十月嚟講,係罕有。但我知道今日嘅交通情況一定好煩忙,好多去完度假嘅人都會返家,所以我都係留响屋企過一個悠閒嘅下午。

我覺得,放假有時都未必要揾節目嘅。對我呢講,朝早起身食啲嘢,然後睇吓電視上吓網,攰嘅就攤响張梳化度瞓吓晏覺,有陽光有微風,仲有兩條靚女(小虎、楚楚)陪我一齊瞓,幾咁爽呀。所以呢,都係咪講咁多,快快一拖二揾呀周公子風花雪月一番先。

藍牙耳筒

可能係用得太多嘅原故,跟咗我三年嘅藍牙耳筒終於壞咗,依家要用返有環迴立體聲嘅有線耳塞講電話。當初揀呢隻藍牙,係因為我唔鍾意扣耳仔果種款式,可能我細個時頑皮成日俾老師扭耳仔,所以當有嘢扣起隻耳仔時就好似有受罰嘅感覺咁,好唔舒服。呢隻藍牙都有條線跟耳塞,設計都幾型,試過好多次有人以為呢隻係MP3 Player。唔用嘅時候係夾响件衫度,聽電話時就用耳塞,我幾鍾意架,雖然壞咗但又唔捨得將佢棄置堆填區,有感情嘛。

發明咗手提電話之後,已經帶俾人多咗好多方便。依家再發明個藍牙耳筒,簡直係偉大,唔駛拎起隻電話,多咗隻手嚟做其他嘢。科技真好,可以俾勤力嘅人方便,但同時又可以方便懶人。

星期六, 10月 11, 2008

手寫板

用手寫板已經用咗三年,都係同一塊無換過。有用手寫板嘅人都知,如果用支筆寫得多,塊版就會越刮越花,咁認字能力就會退減,出錯字嘅機會就越多。依家寫中文字,有時要重寫好幾次先至出到個正確字,都幾煩吓。朋友曾提議我學九方輸入法,易學又方便快捷,適合我呢亭懶人。不過呢,人一懶起上嚟,就會連學新嘢都懶,即係懶得去練精學懶。寧願煩啲一筆一畫去寫一隻字,都唔願學篤兩粒掣去打一隻字。如果向好果一方面諗,起碼我唔會忘記每隻字嘅筆畫先,或者又响不知不覺間,練得一手好嘅楷書呢。

查實我覺得,我手字未必算得上靚,但會係工整咁囉。

下次回港,再買塊手寫板。

Best Ball

每年公司都會有一個高爾夫球日,邀請我哋呢個分公司上上下下所有員工一齊去打番場波。呢個高爾夫球日嘅目的,除咗比賽鬥低桿數鬥打得遠鬥打得最近洞之外,最重要係俾公司啲員工有個聯誼嘅機會,所以,就算有啲同事唔識打,都會一齊去玩,傾吓偈享受吓陽光綠草又一日。

公司呢個高爾夫球日,賽制係玩best ball。即係話四個人輪流發球,然後選落點最好果一個位置繼續打。呢種比賽方式係團體賽,同一組嘅人係隊友,與另外咁多組人比賽。我覺得,呢種玩法係需要一種平衡戰略,要隊友佩合先至會打得好。個戰略係要有兩個唔識死嘅隊友玩得進取啲,而另外兩個隊友就要玩得保守啲。譬如前面有水障礙响二百至二百三十碼處,進取嘅隊友就可以用木桿打過水障礙,風險係大啲但可以搏得birdie嘛。而保守嘅隊友就玩得安全啲,可以用鐵桿打去水障礙之前一百八十碼處,雖然咁樣好難搏到birdie,但好在唔會咁易輸bogey,而且更可以讓進取型隊友更放心去搏。我呢,當玩呢種賽制時,都係做保守型個角色。

唔好忘記,响足球場上,我都係擔當把關嘅角色。

呢種策略,如果用响日常生活上,都會有同樣嘅好處。

隊友,有我包底,放心吧。

Thanksgiving

公司規舉,做夠五年,上司便會用公數請個員工食餐晏。做夠五年嘅我,當然唔放過呢個機會,捉上司去咗一間高級食府飲茶。上司係香港人,飲茶都啱佢口味。食完晏後就可以收工返屋企,有得早走,幾好。

揀今日食晏嘅原因,除咗係星期五之外,今個周未亦係感恩節(Thanksgiving)長假期。响呢個節日,通常都會食餐好嘅嚟慶祝,感謝一年嚟嘅豐收。

我想講:
Thank you for your giving.

星期日, 10月 05, 2008

命名‧期望

大概响一年多之前,有一位我好敬佩,自稱為怒火眼睛嘅博客寫咗一篇文章,其中有一段係咁嘅:

「你們有人叫我火火,有叫我火媽媽,有叫我怒火媽媽,甚至叫我媽媽的也有。名是你們給的,期望也是你們給的,我談及孩子的時間不算太多,當然也不太少,但既沒有自稱媽媽,就是說,我是獨立的一對眼睛,看到的除了丈夫兒子,還有很多,雖然,還不夠多。你們的稱呼,令我不單在現實中成了媽媽,連網上也逃不掉了。只好,努力做媽媽,哈哈。」

怒火眼睛所表達嘅意思係,如果你知道有人稱呼你做好媽媽,那麽,你就係活咗响別人嘅期望之中。就因為咁,你就會更加努力去做好「好媽媽」呢個角色,就算你跟本就唔想去做一個好媽媽。

當然,我唔係話怒火眼睛跟本就唔想去做好呢個角色啦,我都係打個比喻咁啫,唔好當真。

响現實之中,我哋好多時會遇到呢種情況。但係,呢種情況對自己嘅影響,就未必會係正面。

以我自己為例,譬如有同事放工前有嘢未做完,見到我個樣好恰啲,於是同我講「喂鶴仔,你陣間得閒架呵?幫幫手搞掂呢單嘢佢啦,你又咁好人又咁易話為…」就咁,雖然我一百萬個唔願意,好想準時收工返屋企,但係為咗做好「好人」同「易話為」呢兩個來自人哋嘅期望角色,咁我就唯有將就吓,做埋呢單工作遲啲先走。雖然,我外表睇嚟無乜嘢,因為要扮好人同易話為,但係我心裡,就忟到七彩,只係唔好意思發洩。

好喇,做完晒嘢揸車返屋企,點知遇上大塞車。有個驚驚青青嘅司機,車又開得慢,切線又騰雞,我收工已經收得遲架喇,依家仲要阻慢我返屋企。終於到最後,我頂唔順响車內喪爆粗,不停咁咀咒個驚青司機,連佢祖宗十八代都唔放過。

响一片漫罵聲中返到屋企,至親嘅人知我今日嘅心情超唔掂,就問我咩事。我答話依家啲人都唔知點揸車嘅,驚就搭巴士啦,响條街到阻乜住晒,個牌都唔知係咪俾錢買返嚟咁咁咁咁…

將滿肚子嘅怨氣歸究於個驚青司機度。

咁,事實又係咪真係咁呢?

如果响平時,有個驚青司機塞住我,我又未必會發脾氣果喎。

即係話,當時果個驚青司機只不過係一個借口俾我去發洩。

諗深一層,我當時嘅怨氣,其實係因為遲咗返屋企,呢樣係我最唔想嘅。但係為咗要做好「好人」同「易話為」呢個人哋對我嘅期望,我唯有死忍。

所以,我因乜嘢最基本嘅事而發脾氣,跟本就無人知。所有人都以為個驚青司機係罪魁禍首。其實,佢只係一隻代罪羔羊,或者係一個借口。

有幾多人會了解呢?