星期四, 6月 28, 2007

新的一天

舊同學豬女嘅離開雖然傷感,
但係呢個世界嘅希望同歡樂,
足可以掩蓋內心嘅悲痛哀傷,
可能係我同豬女嘅友誼未夠深嘅關係吧。
點都好,要多謝一班虛擬朋友仔嘅安慰,
更要多謝幾位新留言嘅朋友,
我好好多啦,見過我留言嘅人都知我「正常」番。
最近天氣好悶熱,濕度高又塵霧煙霞。
直到今朝一場雨,
天氣又變番清爽怡人,
大自然嘅定律就係咁,
暴風雨過後就係新嘅一日。
無論幾熱幾濕幾大雨都好,
日子,都係咁過,
始終會有雨過天晴嘅日子。
响唔開心嘅時候,
我又睇到D有趣朋友寫嘅嘢,
即時令我開心番。
阿喵衰衰咁發表正比定律,
吹到熊仔係神咁濟。
昂藏七呎鞭長及膝我就信啫,
昂藏七呎嘅三腳架,唔係呀化?
邊有人會隨時隨地帶多包血出街架?
如果係真嘅話去睇吓醫生好。
阿易師太就話領教過武當太極劍法,回味無窮,
更吹說其情人外號「一夜七次郎」。
我初初聽到就嚇咗一跳,
然後就得啖笑。
玩雜技玩成咁?
日本首席雜技師阿加鷹哥都頂唔浦啦。
計我話「WB7次郎」就真。
見新嘅一日天氣好,
晏晝就走去全球知名嘅牡丹樓刷鑊勁嘅。
見二號櫃枱果位姐姐嬌俏可人,
於是埋去講「May I have a Big Mac™ and medium fRies please?」
正當我埋頭數散銀時,可人兒用重脷音問我:
「Oh fLies?」
「YA,SPANish fLies!」串我!
呢個時候可人兒就用嫵媚嘅眼神向我單一單眼:「Oh behave…」

星期五, 6月 22, 2007

成長預期

在人生中的每一個階段,總會遇到一些預料以內的轉變和經歷。譬如五六歲脫牙的時期,明知嘴裡的小小乳齒搖搖欲墜必定脫落無疑,但又常常希望它不要脫落,同時又茅盾地期待脫牙後可以品嘗雪糕冰涼甜入心的美好。又如青春期時突如其來的轉變,說話聲線由高轉到低沉如牛的疑惑,白雪的粉臉長出包膿暗瘡的恐懼,還有初次夢遺竊竊興奮與罪惡感的苦惱絞纏,總為青春添上一份初澀的期盼。到大學畢業,一方面與朋友們握手擁抱慶祝但又一方面暗地裡為自己的前途擔憂等等。

人的成長,是從每一個階段裡所經歷過的事情和轉變累積而來。當到達某個年紀,我們便會預期將會有甚麽事情發生,而這些經歷則會對我們的人生及心態作出相當程度的影響。

三十歲,經歷工作上的甜酸苦辣後,還有時間去為自己喜歡的前路再作打算。三十歲,成熟而不失魄力,確認自己的理想,努力向前衝像有金鐘罩。三十歲,找個終生伴侶,一同建立開心幸福家庭。三十歲,更會為身邊的好朋友開心幸福事業有成而感到快樂。這些事,都是我在三十歲時預期將會經歷的。

回來後休息了一天便上班。除了第一天上班日下雷雨之外,其餘日日是好日,陽光普照天氣清爽怡人,活在這個年紀,現在總是美好,對將來總是樂觀。

下午接了好友的來電,他告知了我一個消息,我們的一位舊同學豬女因癌症而離去了,日期正是我回來的那一天。

多麽的突然。

認識豬女已有十七年,雖然和她不是很相熟,但偶有見面。知道她患病已有好幾年,當時她因為要接受治療而延遲她的婚期。到去年,她終於與丈夫步入教堂。

還以為她打了場勝仗,而我,曾為她開心和慶幸,誰知…

三十歲,生命本應精彩,但可惜,豬女享受不到,更要在離開前受盡病痛的折磨。

三十歲,期盼本應快樂,我,還未有經歷朋友離去的預備。

三十歲,我想拒絕成長。

星期四, 6月 21, 2007

買錶陷阱

香港,人稱購物天堂,返到去唔買番D嘢,好似好有罪惡感。而手錶,就係我其中一個目標。

我呢亭曾經响香港生活過嘅自由人,梗係唔會白癡到貢去皇室買錶啦,而我嘅購物心態係只求穩鎮,所以,時間廊係最好嘅選擇。

時間廊嘅手錶,唔同牌子唔同款夾夾埋埋都有好幾千隻,邊隻好呢?咦,突然間諗起隻GS。嘩!唔得唔得,我咩身份呀?邊有咁多錢呀?想試錶都試唔起啦。仲有,呢種貨色,點會响時間廊揾到丫?

正當我苦惱緊嘅時候,抬頭一望,我見到一個係男人都爭住認話似佢嘅型男。

走入時間廊,就見到一大張吳彥祖海報掛响天花兼夾一大件吳彥祖T恤笠咗响售貨員身上,仲要一人一件添。呢種「鋪天蓋地」嘅宣傳,已經令由佢代言嘅手錶响過千隻手錶中顯突咗出嚟,吸引咗我嘅注意。

再睇吓價錢,兩千銀左右,唔係太貴啫。兩千銀買吳彥祖嘅品味,抵到爛啦。Seiko呢個宣傳策略,贏晒。

試戴隻錶,撓埋雙手,嘩,成個吳彥祖咁款,仲唔落疊?

就咁,乖乖地奉上兩千幾十大元,拎住隻手錶行出大門口,自覺胸肌都大舊D。

Seiko加吳彥祖,真係幾絕。

尋丫啟事

姓名:Gideon T.
別名:大鐵鎚
職業:工程師
樣貌:英俊
事發經過:火某於街上蹓躂三星期之久,足跡遠至台灣,但仍片尋大鐵鎚不果,而其網站亦連結不上接近一星期,本人極度擔心。

如有人發現大鐵鎚,請留言告知。
萬分感激,無以為報。

星期三, 6月 20, 2007

男人之最

灣仔某K房一角,枚王組有三男一女成員响度互片:

「十!嘩哈哈… April飲!」

April呷咗啖酒之後,電話突然響起。接過電話,神色凝重地講咗幾句之後,April再次掛起笑容,伸出玉手…

「五!到你飲。」

可惡呀,又俾April陰到。

April呢,係靚女一名,男仔頭性格,不拘小節,有時會覺得佢係儍儍地。識咗佢唔係好耐,同佢玩開,發覺原來佢都可以玩到好顛。

「喂喂喂Derek,你笑完未呀?笑完就準備飲酒囉喎,OK?嗱,聽清楚喇,十啦… 哈哈哈哈… 哈哈哈… 叫咗你唔好掛住笑架啦…」

望住Derek圓圓嘅面,一邊露出難以置信嘅表情一邊飲酒,我都笑到唔識停。

「喂繼續,十五!飲啦你…」

今次輪到成日攪屎棍嘅阿Ben。同阿Ben呢個老死識咗十幾年,由細到大佢都好鍾意攪攪震。呢排唔知佢係咪睇戲睇上腦,成鬼日學「國產零零漆」裡陳寶蓮出絕招時講果句「高…熱…火…焰…」,仲要做埋動作添。你話喇,有個咁嘅friend,係咪前世做得陰質事多呢?

阿Ben飲完後,就閃出咗個奸狡嘅眼神。十幾年老死,佢諗咩我會唔知?!

「十呀!騎騎騎騎…」我同阿Ben好合拍咁攤開咗隻手。

我可以發誓,我哋無事先夾定,完全係多年嚟嘅默契。

可憐嘅April又俾我哋局飲酒。

不過,我哋三個男人都唔係好得去邊,跟住都係嘢嘢中,灌咗好多酒精落肚。

我哋就係咁樣wing吓wing吓互片到天昏地暗,直到April個電話再次響起,果時,已經係半夜兩點。

April講完個電話後就話要走,然後就一支箭咁標咗出間K房。

呢個時候,响K房另一邊同歌星組唱緊歌嘅Lisa問我哋阿April做乜嘢,我哋話佢要走囉。跟住Lisa就話「你哋由得佢一個人走呀?」

係喎,都係飲酒累事,有乜理由半夜三更由得April一個女仔走架,起碼都要送佢上車啦。見阿Ben同Derek都結咗婚,無謂要佢哋送April咁尷尬啦。於是我話:「等我嚟。」

飄吓飄吓咁走去Lift口,唔見April,唯有等下架Lift上去地面睇吓April上車未。

到地面出咗Lift,見April一個人好愁咁開咗度的士車門上車。於是我就行近部的士同佢講:「April拜拜。」

April冷不防有人同佢講拜拜,於是就以本能反應好快咁彈咗句「哦拜拜。」

深宵二時嘅街頭,怪事特別多。嗱嗱嗱,話口未完,顯靈啦顯靈啦,靈異事件發生喇。

突然間,一件肥肥矮矮頭油姿粉貌似雷頌德(又雷頌德??)嘅物體彈咗出嚟响我面前,然後用又憤怒又拗底又挑釁嘅眼神同語氣贈我一句「拜拜」,仲要同我揮埋手添,慌死我時運唔夠低睇佢唔到。

然後,呢件靈體就轉身上咗阿April架的士,然後「嘭」咗一聲巨響閂埋度車門,幾乎全個灣仔都聽到咁濟。

我即時笑咗出嚟。

係型嘅,就由得條女自己返屋企,然後自己去威。型唔起嘅,就請俾D風度,我都會睇得起你。

型唔起又無風度又要發條女老脾但係又拗底驚條女俾人搶,呢隻仲唔係男人之最?

星期一, 6月 18, 2007

追追趕趕

是次旅遊金句:

「家陣我放假,我係遊客,如果我放假時仲趕過返工,咁我不如返工?」

致魔術師

對淫嬸嘅裁判,我嘅睇法,係另一個角度而非純字面意思。

學生報最大嘅爭議,大約係兩條問卷式問題:
你有無偷睇過親人冲涼?
你會幻想同咩動物做愛?

唔好意思,就字面意思同引導方式,呢兩條問題都唔會令我引起性衝動。

反而報章嘅風月版,意淫成份十足。

又,學生們响學生報攪風月版攪出個大頭佛,罪魁禍首係邊個?佢哋學嘅又係邊個?

我嘅角度,係學生們都係報章風月版嘅受害者。

淫嬸判報章風月版為第一類「既非淫褻亦非不雅」物品,咁,會唔會又荼毒更多年青人,令佢哋失足更深呢?

或者可能我誤會咗魔術師,不過,魔術師你俾我睇到嘅係你認為要嚴懲一班被報章風月版荼毒咗嘅學生,但係對罪魁禍首嘅報章風月版又待以寬鬆嘅態度,咁對我嚟講係有D本末倒置,所以,我先幽你一默。


後加:關於召妓指南。

香港一般嘅召妓指南,都係介紹香港同國內嘅秘密風月場所。

請問,現時在香港同國內嫖妓,係唔係違法?

而引導他人違法,算唔算犯規?

點解,教人自殺、謀殺、吸毒、種大麻、提煉可卡因嘅書會被禁,而教人去邊度嫖妓嘅指南可以榮登第一類「既非淫褻亦非不雅」物品?

連結鹹網可以被罰,連結雞竇可以雅俗共賞?

小小女孩

大家樂買完飯,就去揾位坐。

去到一張四人枱,有兩個大男人坐响一邊食緊飯,就快食完。

另一邊,有一個小女孩,四五歲咁上下年紀。

我,拎住兜飯,就一嘢坐响小女孩側邊,開始食大家樂最出名嘅一哥焗豬扒飯。

食吓食吓,坐我對面嘅大男人食完飯走開咗。

然後,小女孩嘅媽媽買完飯返嚟,放低咗碟飯同凍檸茶响小女孩面前,然後企响到餵小女孩食飯,一碟兩份分。

哎吔好唔好意思呀我,原來我坐咗小女孩媽媽個位。清潔嬸嬸快啲執咗我對面位兜嘢啦,好讓我坐過對面位。

可惡嘅清潔嬸嬸唔知係有心抑或無意,遲遲都唔執對面位壇嘢,就算响我身邊經過都好似視而不見咁。著急嘅我心諗,鬼唔望香港好似外國咁,提倡自己執手尾,等你班盲人無晒嘢做,嘿!

諗還諗,現在嘅問題始終要解決,咁,我就大聲叫阿嬸:「唔該,可唔可以執咗呢堆嘢先呀?」

清潔嬸嬸依家先至埋嚟執嘢抹枱,然後我就坐過對面。小女孩媽媽就禮貌地同我講聲唔該。

媽媽坐低,繼續同小女孩食飯。

呢個時候,坐我隔離嘅大男人食完飯走埋。

小女孩好似食飯食到悶咁,開始週身郁。

週身郁呢,就終於出事喇。小女孩嘅小手打瀉咗杯凍檸茶。

媽媽連忙執番起隻杯,然後幫小女孩抹手。

小女孩開始鄒起眉頭扁起個咀問媽媽:「咁點呀?」

媽媽話:「咁無得飲啦…」

小女孩嘅眼晴開始變紅,一大粒眼淚標咗出嚟,然後用一個好猙獰嘅扭計表情一路喊一路罵媽媽「嘩… 嘩… 我唔鍾意你呀… 嘩…」

小女孩嘅温柔可愛,响呢一刻,消失得無影無踪。

我心所剩低嘅,係一團無明火同掌刮小女孩一把嘅衝動。

地鐵亂想


每次在這個地鐵站轉車,內心總不其然想起一句:

「踏出這扇門,就別要向後望。要專注,要比別人快,安心投胎去吧…」

啋啋啋!


蘋果裡的真面目


社會和真相之間,只是一線之差。

虛擬與現實之間,只隔一片琉璃。

文化之旅

回出生地,有一項節目我是必會做的,就是逛逛博物館。

先逛文化藝術中心的「不中不英」展覽。對不起,我不懂得欣賞。反而,其他展覽館的展品更能吸引我的興趣。參觀途中,一群天真爛漫的中學生正在展覽館裡穿梭在遊人之中跳跳扎扎地討論及研究博物館一日遊的功課內容,風頭完全蓋過展覽品。


三星閃爍 金沙流采


「蜀道之難難於上青天。蠶叢及魚鳧,開國何茫然。」

然後去到沙田的香港文化博物館參觀三星堆及金沙文化展覽,不得不佩服前人的手工藝。說的是公元二千至一千二百年前的文物,當時所打造出來的青銅大面具、金器、玉器等等,手工精細栩栩如生,而且還有細密的機關,為甚麼前人會有這樣的智慧?是有其他高等生物教他們造的嗎?金器玉器上的花紋,又有甚麽意思呢?古文明的神秘,最是吸引。

文化博物館除了有三星及金沙文化展覽外,還有「相裡‧鏡外」相機及圖片展。
嗯,古董徠卡…

不辭而別

我現在的心情是如何的複雜,你知道嗎?

五月下旬的那一天,我在香港某商場邂逅了你。原本,我一心只想幫你一把,誰知事情發展下去,是多麽的出乎我意料之外。

我很想你知道,我從來沒有對你說過半句謊言。只是,我隱瞞了我是過客身份。現在,我已經不在香港了。

琪,忘記我吧,不要再撥那個電話號碼了。我相信,你一定會找到你想要的人的。

請原諒我的不辭而別。

祝你生活愉快。


P.S. 睇嚟呢篇嘢會令人誤會,不過,一單還一單,一篇還一篇嘛。

優雅女生


突如其來的約會,很有趣,不過,你我就實在顯得太客氣了。

謝謝你的圖畫和抱抱。待熟絡些再有機會見面時,再看看是你辣,還是我好火?

星期三, 6月 06, 2007

你喺邊呀


Sara Sara,你喺邊呀?

星期一, 6月 04, 2007

鹿死追屍


不想提起,未敢忘記。
Sara吹雞,唔敢唔嚟。