男人與車

同朋友出嚟吹水，有時啲朋友隨口噏吓話要買乜乜房車物物跑車嘅時候，好多時都會見到佢個女朋友响度倔住個男朋友，然後插咀話買車嘥錢，不如買樓啦blah blah blah，理由係新車一落地就即刻貶值，買樓就唔同呢，市道咁好，一轉手就賺幾廿皮咁咁咁咁。其實係有道理嘅，不過呢，男人對車，唔多唔少都會有啲情意結。

男仔從細個開始，最常接觸到嘅玩具就係車仔。果陣時好興Match Box，有好多唔同型號嘅車，每架車度車門仲識開架。當時，對我嚟講印象最深嘅係一架黑色Corvette，無嘢格，黑色又型，四個轆又順，推得又遠，咪鍾意囉。到搭車搭巴士時，又鍾意坐車頭對住司機果第一個位，睇住司機扭咁大個軚盤操控成架大巴，百幾條人命响佢手任佢舞，我眞係覺得佢好型架。當時啲咩作文題目我的志願吓話，我都寫話將來要做巴士司機架，仲要指明話要揸丹拿珍寶喎。呢款巴士嘅特色係有支細細碌嘅波棍响軚盤左邊，啪上啪落，好過癮架，引擎响車尾又靜喎，唔似得勝利二型咁嘈到死，阿sir話我無大志都係咁話架喇。仲有啲又有揸車嘅親朋戚友，坐佢哋車時，又欲欲想點吓個軚盤，坐吓個司機位咁啦。好喇熄咗匙，有大人俾機會我坐一坐司機位喇，哇呵~ 我發誓，第時一到法定年齡，我就要考車牌揸靚車。睇電視時，又睇到有Formula1喎，果時嘅車手冼嗱文素保魯斯鬥到難分難解，又多人擁戴，感覺好英雄咁。响潛移默化之下，咁就做就咗男人對車嘅情意結。

當然，車囉喎，除咗有個人操控與速度嘅快感之外，仲有吸引異性嘅功能，男人心裡真係咁諗架。我哋呢啲普通人，响條街度個個都係咁嘅樣，要增加自己嘅魅力同吸引力，非要展示一吓英雄感不可。揸車，即係我養得起架車，表示我養得起你。揸快車，即係我會為你奔馳拼搏，表示我會為你死也在所不惜。唔… 簡直英雄蓋世，一個字：型。不過呢，以我所知，女人唔係咁諗喎，揸車等於型？慳啲啦，貪你有錢咋儍仔…（呢句邊個講架？咁大整蠱！）

每個男人心裡面都有架Dream Car。不過呢，Dream Car會隨年紀而改變。細個鍾意Corvette，跟住巴士，之後就鍾意陳法拉等等呢啲超班馬，成熟啲又鍾意貓巴士A4紙揸Audi揸Ben屎喎，依家又無啦啦鍾意揸SUV，貪佢夠大夠舒服… 仲有呢，大車迫位恰細車，真係幾賤幾過癮架，嘿嘿！

咁，你架Dream Car 又係咩呢？