珍惜

咁耐冇寫，今日FC想轉轉Channel，收下火講下時事感受咁啦。不過，大家唔駛著多件衫啦，因為仲未成家立室既FC，感性極有限，斷估都唔會凍親大家。

呢期香港新聞講得最多既都係已經停止運作既舊中環天星碼頭。喺舊碼頭服務既最後一晚，大約有十五萬人去送別懷念一番。舊碼頭對FC黎講，係有啲感情，但係又未去到唔捨得要生要死抗議清拆既程度。幾年前FC曾經喺香港打過工，返工地點係上環，但係FC住就住喺老遠既新界。當時FC雖然有親戚接濟，但係食既用既著既都係自己揾自己洗，所以有時會慳得就慳。由新界出上環返工，搭一程巴士直到公司門口要$18.2，一來一回就要$36.4。不過，當時要慳錢既FC就選擇搭一程巴士去尖沙咀天星碼頭然後轉搭小輪去中環，再經IFC穿天橋行返公司，一來一回都係$20.4，小數怕長計，足足慳左四成有多。因為成日出入呢個碼頭既關係，所以FC就對舊中環天星碼頭有著一啲感情，就算宜家話要拆，FC都冇乜遺憾。

有樣野FC好想知道，喺呢十五萬送別舊碼頭既市民之中，有幾多個响過去既一年曾經用過呢個碼頭超過十次呢？喺宜家生活節奏越黎越快既時代，渡海小輪好似已經變成一種被人遺忘既交通工具。記得FC細個果陣，搭船過海就好似宜家同人迫地鐵咁，永遠都有咁多人。但係FC幾年前喺香港掙扎求存果時，搭船既人就買少見少，搭船既多數都係一啲中年人。當FC喺新聞度見到咁多人去送別舊碼頭時，FC就心諗係唔係當一樣野真係要永遠失去既時候，人先至識得去珍惜呢？就好似一啲名人死後先至頒個乜鬼終生榮譽大獎比佢，會唔會遲咗呢？FC認為，對呢個舊碼頭最有感情既應該係上一個Generation既人，六六年斗零暴動、七一年工潮等等事件，都成為上一個Generation既人對舊中環天星碼頭既集體回憶。

當一樣野漸漸被人遺忘以及失去利用價值既時候，清拆被取替就係唯一既結果。宜家新中環天星碼頭被人大罵新不如舊、設計不知所謂、要懷舊又整唔到個懷舊feel出黎云云。不過人係善忘既動物，如果四、五十年後香港政府要拆呢個碼頭既話，可能又有一大批市民出黎送別緬懷、集體回憶、要生要死以及抗議清拆呢個「新」碼頭一番。