垃垃雜雜

好耐無出文，有好多垃垃雜雜嘢，學呀微小C咁寫先，做個概括。
____________________

細細個果時要做作文功課，老師要求一百字連標點，寫滿一版十乘十格仔嘅功課簿。當時嘅我，一味死拖唔肯做，最後由老豆作文我照抄。抄到最後，發覺篇文多咗兩隻字，於是，我就唔鬼寫埋果兩粒字，工工整整寫夠一版算數。最後，當然俾老豆老母鬧咗一餐，屎懶鬼！

「咩喎！老師話寫一百隻字咋嘛，咁咪夠囉！」

當時懵盛盛，又點知爭兩隻字，成篇文就斷晒啫。

懶呢家嘢，由細個開始，一直跟到我依家。
____________________

瑞士蘇黎世，一間博物館被人強搶四幅印象派油畫嘅真跡。究竟，如果我想睇番呢幾幅畫，可以點呢？睇贋品？

為迎接零八奧運，中國政府將一眾歷史古蹟大修，包括故宮頤和園天壇，整到好似新嘅一樣。

韓國國寶祟禮門被人縱火燒毁，政府預計三年後先可復修。

究竟，將歷史古蹟復修重建，我哋睇嘅仲係唔係古蹟文物？
____________________

今年幫呀媽手整咗三次馬蹄糕，整就唔難整，不過攪勻佢呢就攪到我手軟，差啲揸唔到筷子。純馬蹄粉無糖兼超多馬蹄，街邊貨點有得比？
____________________

細個時住果度，每到新年都有好多醒獅嚟逐家逐户拜年攞利是，間中仲會有人偷雞燒炮仗，過年氣氛好到呢…
____________________

不雅相呢單嘢，睇完，嘩覺得好正喎，咁咪算囉，無乜值得講。萬9幾個觀點講道德虛偽問題，S9H啦。

呢單新聞，睇滯咗我。
____________________

噢，有篇文貼咗堂。

嗯，多謝小珠。
____________________

以前响別人個blog度留言，總係長篇大論。依家，一兩句講吓笑就算。

咩事呢我？
____________________

聰穎嘅契媽要走，留到留佢唔住，希望契媽一切安好啦。
____________________

三個星期內四場雪暴，累積了七十厘米降雪量，仲有一個嚟緊，周未就殺到，今年剷雪持別多。

香港持續寒冷咗廿幾日，距離落雪嘅日子，還遠嗎？
____________________