星期六, 7月 19, 2008

畢業生‧輩份

今個星期又係我嘅on call week,又係我精神及心臟發病嘅高危時期,如果响下個星期四以後一路都唔見我update呢,就唔駛再嚟喇,你哋就讓我瀟灑地走啦…

今日星期六,今朝去咗一個call。做完之後就約老豆呀媽去食晏。依家呢,學似zz話齋,俾錢時同兩老角力,真係幾頭痛。不過,好在我夠堅持同手快,贏嘅次數高達九十幾巴仙以上,所以呢,我都算係幾叻仔。

食晏期間,老豆講起話琴晚電視番播「畢業生」,佢同呀媽又番睇。老豆唔係好記得首歌係邊個唱,仲話咩「Peter Paul and Mary…」。其實呢,老豆唔係唔記得,只係混淆咗啫,咁我咪同佢講話係「Simon and Garfunkel嘅Mrs. Robinson囉」。老豆後生時好鍾意聽英文歌,Bee Gees、Linda Ronstadt、Simon and Garfunkel更係佢嘅至愛。响耳濡目染之下,我都鍾意聽佢哋嘅歌。提醒咗老豆之後,老豆話係呀係Mrs. Robinson呀,然後話佢同呀媽拍拖睇「畢業生」果陣,覺得Dustin Hoffman正死蠢,Mrs. Robinson(Anne Bancroft)又老又皺皮,咁都俾佢誘惑到,唔係呀化?!但依家四十年後睇番,又覺得Mrs. Robinson幾後生幾有韻味幾正喎。

一樣嘢,响唔同嘅時空去睇,感覺會有唔同。以前我眼中只有你你眼中只有我嘅小情人,點識得欣賞成熟女人嘅美態丫。但經歷過風霜洗禮子女折磨而開始步入老年嘅呢對老夫老妻,睇番當年嘅事物,就覺得美好。

從老豆呀媽微笑嘅咀角,睇到佢哋回味當年拍拖行街睇戲時嘅甜蜜,呢餐晏,抵到爆。
__________

睇港產片或電視劇,有時會睇到咁嘅情節:

新界某村落,有一班白晒頭嘅老人家响度拗數。當拗唔掂時,通常會有一位呀伯講「既然係咁,不如就叫呀三叔公出嚟評評理啦,佢响呢條村輩份最高,佢話點就點,大家有無異意?」其餘班老嘢聽到後,就話「有三叔公主持公道就最好啦…」就咁,佢哋就去請三叔公出嚟。

正當大家以為三叔公係一位頭髮斑白行動不便行路拐吓拐吓嘅百歲老人時,鏡頭一轉,見到班老嘢圍住一個年約十二三歲手持PSP耳塞耳筒嘅細路,恭恭敬敬咁講「呀三叔公你嚟就好喇,嗱,佢哋呢點點點點…」然後呢位十二三歲嘅三叔公就用佢嘅童音講「你哋呀,都幾廿歲人啦,仲拗埋啲無謂嘢,我好唔得閒架嘛,都未打爆機…」

* * *

琴晚我家有個有趣飯局,事緣老豆有個疏堂呀哥响香港過嚟玩幾日,於是就約埋响呢度嘅疏堂親戚食餐飯。呢班疏堂親戚,當中有堂伯父堂姑媽堂呀哥堂呀妹堂表哥,除咗一個堂姑媽之外,其餘嘅我都未見過。雖然係咁,但堂伯父堂兄弟姊妹都係同我同姓,咁都有三分親親過同事丫。同我同輩嘅呢班親戚之中,有五十幾歲做到我老豆嘅堂呀哥堂表哥,坐响我隔離一時腦筋唔靈嘅呀妹拍吓我叫我斟茶俾Uncle,哈哈,堂表哥即刻搶住話佢只係表哥嚟架咋,幾大唔認老。而最細嘅呢,有十四歲做到我個女嘅堂妹,嘩升中四?好遙遠咁喎。同一輩份但年齡可以相差四十年,感覺總係怪怪地,但諗落都幾好笑。

輕輕鬆鬆咁食吓嘢、聽吓由另一分支嘅親戚講吓族譜歷史,幾融洽幾開心。雖然係初次見面,但我哋都有個共通嘅默契,就係大家都會話自己「無乜人性」。一聽到呢句,大家都會會心微笑。

畢竟,大家都屬同一個太公,或太太公。