老友吹水

和已婚的老友去了一間讀書時期常常光顧的小廚開餐，席間談東談西，部份內容節錄如下：

「其實你有無諗過人生有咩計劃同目標呢？依家我哋每日都係重複咁做番同樣嘅嘢，我呢，就唔想每日都係漫無目的咁返工放工食飯然後話攰就瞓，咁樣好似好浪費時間，人生無意思格。點解唔揾D嘢學，又或者計劃旅行等等…」

「點會無時間？一星期返一晚學，最多四粒鐘，一個星期裡要抽四粒鐘出嚟嘅話，點抽都抽到。」

「或者計劃生BB啦，到時所有時間都比晒佢咯。」

「人大咗，有好多嘢要兼顧，依家同朋友相處維繫感情，就唔可以好似舊時咁啦。」

「你有無心去維繫感情，朋友係feel到嘅。你在乎朋友嘅話，每星期抽少少時間食餐飯，或淨係飲杯嘢，有幾難？除非你真係懶到連朋友都唔在乎啦…」

「以前，我有懷疑係我哋放棄呢個朋友，抑或係佢放棄我哋呢？問心，我曾經有試過修補呢段友誼，有咩function都曾經有揾過佢，見到面又嘗試打開話題，可惜發覺兩句之後又講唔到落去。你想去修補關係啫，人哋未必係咁諗。呢樣嘢唔係單方面嘅，我哋有嚐試做過，不過佢又未試過主動去揾我哋喎，我跟本就感受唔到佢有心去修補。所以依家，我知道其實係佢放棄我哋呢班朋友。」

「以前我老豆果輩，就算跟番當時物價指數，揾錢都唔係多，但係佢又咪養得大我哋…」

「你知唔知呀，當時你老豆無乜娛樂，駛錢又少。睇下依家，幾多玩具，又電腦又電話又互聯網又PS2，唔同年代所追求嘅嘢唔同，呢個年代係比較物質，到時有咗BB嘅話，買玩具比佢都多過你老豆買比你啦…」

重有呢句：
「喂，叫埋單啦。」
「埋咗嘞。」
「DL呀！」

和老朋友認真地談天的感覺，火某很喜歡和珍惜。