不懂得 尊重

看了大鐵鎚兄鴻文各行各業III的留言2，火某又想變身番以前嘅火鶴，有嘢不吐不快。

留言提及：
我同意你所言，嚮香港做電腦既最大問題係香港人唔係好專重電腦或者資訊科技行業，我同人地講我讀電腦之後最常見既問題係「我屋企部電腦中左毒呀，可唔可以幫我整呀？」問題係香港好多人對資訊科技既理解只係留係寫網頁同埋裝window既層次，佢地體會唔會資訊科技實際上對佢地既生活影嚮有幾大。

先承認，火鶴雖然日日用電腦，但就係電腦白痴一名，對鏟virus及安裝軟件一概都唔認識。

從留言的字面意思，火鶴所理解到的是：
1 不懂得鏟virus = 不專重電腦或者資訊科技行業
2 只懂得寫網頁同裝window = 體會不到資訊科技實際上對生活的影嚮

這兩點，火鶴並不認同。

先舉兩個意思相近的例子：
例1
香港做廚師嘅最大問題係香港人唔係好專重廚師或者廚藝行業，我同人地講我做廚師之後最常見嘅問題係「我買咗隻蟹, 可唔可以同我劏呀？」問題係香港好多人對廚藝嘅理解只係留係出街俾錢食飯嘅層次，佢地體會唔到廚藝實際上對佢地嘅生活影嚮有幾大。
例2
香港做司機嘅最大問題係香港人唔係好專重司機或者公共運輸行業，我同人地講我做司機之後最常見嘅問題係「呢架車去唔去到銅鑼灣架？」問題係香港好多人對公共運輸嘅理解只係留係上車落車睇Roadshow然後恰眼瞓嘅層次，佢地體會唔到公共運輸實際上對佢地嘅生活影嚮有幾大。

留言的筆者似乎混淆了「尊重」的意思，把「尊重」和「不懂得」混為一談。

如果「不懂得」=「不尊重」，那麽：
「不懂得劏蟹」=「不尊重廚師」，嗎？
「不懂得駕駛」=「體會不到公共運輸對生活的影嚮」，乎？

每個人的能力有限，所長亦各有不同。現在舒適的生活，是由各有長處的人付出不同的智識和能力而成。有些物品我們會常常依靠，但是我們能懂得自己制造或修理所有物品嗎？或許，對一位出色的電腦工程師來說，請求他們去清除電腦病毒是大才小用，但這樣就是小看或不尊重電腦工程師和資訊科技行業嗎？

某些電腦工程師有這樣的想法，是因為他們有點自傲和自以為是，認為自己是做大事的材料，看不起清除電腦病毒等等基本功夫。所以，當有人請求他們去清除電腦病毒時，他們便覺這是一種侮辱，從而猜度別人對他們不尊重云云。

如果要指望所有會用電腦的用家懂得修理電腦方為尊重電腦工程師和資訊科技行業，那麽，請：
懂得劏蟹才吃飯
懂得駕駛才乘車
懂得駕駛飛機才乘飛機
懂得演戲才看電影
懂得…