功能轉換

有無發覺，好多時我哋都會將一啲物件變為多用途功能，例如，我哋會將報紙雜誌用嚟墊煲底啦、將屋企嘅傢俬變做活動晾衫架啦、以及將手機家電等變做時裝時尚品味嘅一部份等等。似乎，我哋都幾識得靈活變通，物盡其用。

唔只物品，我哋有時仲會將一啲function活動嘅意義變作另一樣嘢。舉一個例，有好多人想睇一套戲嘅時候，佢哋通常都會約人睇。但係當無人陪到佢睇嘅時候，有大部份人寧願唔睇。咁，佢哋睇戲嘅目的，係為自己買兩個鐘嘅娛樂，抑或係買兩個鐘嘅社交時間呢？我講得出呢個例子，我，當然會一個人走去戲院睇戲啦。

最近，我有個回流咗返香港做咗老細嘅朋友將會返嚟走番轉，呢個老友呢，同我一齊讀書嘅，都識咗十幾年喇。响十年前Tiger Wood轉打PGA果陣，我哋就一齊受到佢影響而去學打golf。佢今次返嚟，梗係晨早就約我打番場波啦。我叫佢唔駛帶架撐過嚟，我哋有多一套，拎嚟拎去貪佢重咩，不過呢，佢話：

「I am thinking to bring my own (set) but not gonna bring it back」
「planning to get a new set here…」
「to be honest」
「HK ppl sucks」
「When bringing a set of RAM out」
「Little embarrass」
「You know they all use good brand」
「And nobody knows what RAM is…」
「This is HK」

跟住我話：「Chiu! 你同佢講：扑低我先講啦。」

然後我老友就話：

「aiya」
「golf not for fun ma」
「just to meet with business ppl」
「need some window dressing…」

聽完佢咁講，我，搖頭嘆息。
其實，點解傾生意一定係响高爾夫球場呢？
鍾意打golf嘅人，多數唔鍾意一路打一路傾工事。
唔鍾意打嘅，一拎起支棍就眉頭皺。
如果你鍾意打golf，又想睇吓人哋有無耐性，咁你就捉蟲喇。因為如果人哋唔識打，打完一個洞要半粒鐘嘅話，我諗，扯火果個會係你。

我諗，呢種現像最主要嘅原因係高爾夫球嘅會藉同價錢會令人覺得高尚啲，自身嘅身價感覺上亦得以提高。

以前，相同嘅例子係網球，只有富豪先會打。
但係，當網球平民化咗之後，班有錢佬呢？佢哋唔係好鍾意打網球架咩？

好一個將運動轉化為身份象徵嘅例子。

丫，我諗，如果真係要懶高尚嘅話，不如將桌球變作高尚運動，會藉幾皮嘢一個，cue棍幾千銀一支，都係將個波打入個細窿到啫，又有冷氣廿四小時不停開放，唔駛行到荒山野嶺身水身汗，再整埋個事務律師睇場，嘩，幾咁好呀！

老友，請放心，返到嚟打番場真真正正嘅波啦。

咪喇，嗱嗱淋練波先。

扑低我先講啦。