未知生死

喵呀喵，今次同你玩，引用你一段留言先：

「無宗教信仰既人，確實唔知做人為左乜，亦容易以為自行了結就能使自己從痛苦中得到解脫。

怎麼沒有人想過，安樂死後迎接你的會是什麼？如果知道那將會是在一個很悽慘的境地做N年遊魂野鬼，又或是要下地獄受永遠的煎熬，你是否寧願痛苦地捱過這一世，然後升天堂或投胎下世享福？

其實任何苦難都有其前因，這一世遇上不幸，必定是前世唔修的後果，要做應該是認命，捱過去，還了這筆債就扯平了，再積點德，下一世可能還會有福報。做人若是不信命的話，會活得很苦。

再說，殺人，怎樣看也是罪吧，那你自己是人嗎？結束自己的生命跟殺人有何分別？我們怎會有權這樣做呢？生命是上天賦予的，自行了斷等如逆天而行，必遭天譴。

我不是在自命清高，我也有想過尋死的時候，但我知道，若我真的走上不歸路，我其實不會得到解脫，反而會墮進永恆的深淵中．．．所以，決定結束自己生命的時候，真的好應該想一想，你目前遇到的困境，比起死後要面對那永無止境的痛苦，你會選擇承受哪一樣？」

講明先，我唔係扯火或撩交打，而係想討論吓一D深入D嘅問題啫，咪以為我同喵呀喵反面呀吓！

未知生焉知死，抑或未知死焉知生？

每個有獨立思考嘅人，都係從人生中嘅經歷體驗去參透生命嘅意義，並唔係從死後會點點點去推斷番生活在世嘅意思。

喵呀喵，你所講安樂死嘅果係去地獄受到煎熬，呢個說法，係以果去推斷因，抑或由因去推斷果？你係從邊度得知地獄煎熬呢個Situation？

如果由果去推斷因，咁，地獄煎熬就係一個假設，而呢個假設，又係憑乜嘢推斷出嚟？

如果由因去推斷果，咁，又憑乜咁肯定安樂死嘅結局就係受到地獄嘅煎熬？人犯咗咩法會受到咩懲罰，有（法）例可尋。安樂死嘅懲罰係要下地獄受永遠的煎熬，又有乜可以驗証？

世上每一個人都有信仰，或者講信念會好D，因為講信仰嘅話好多時都會令人誤以為宗教信仰。所謂嘅無宗教信仰者，其實係佢哋對生死嘅意義同世上任何宗教對生死嘅意義有所不同。但係，呢群無宗教信仰者，又係咪真係唔知做人為乜呢？

結束自己嘅生命，有無分急性同慢性？譬如，係人都知長時間唔食嘢會死。如果，安樂死啪支針即刻死係罪嘅話，咁，因減肥而引致厭食症死嘅人，又係咪有罪呢？又譬如，如果有人知道自己有心臟病，但又不顧一切在所不惜咁同女朋友玩刺激性遊戲而中馬上風死亡，佢又係咪會去地獄受到煎熬？

喵呀喵，我幾欣賞你講出呢段嘢，不過呢，我覺得你個point同說服力唔夠囉，仲有茅盾添。至於茅盾响邊？答咗我呢個問題再話你知啦：你覺得一個全身癱瘓嘅人嘅痛苦係乜？