心灰意懶

唉，呢排思緒比較混亂，成日留錯言講錯嘢，再加上CK兄又休息、大鐵鎚又去公幹、小側田又去讀書、小珠又離家出走、喵呀喵亦呀亦又唔睬我、惡妹妹又偏心女仔… 睇嚟我都要抖吓啦。

有睇開早期「人在中環」嘅朋友，都大概會知道「鶴立雞群」係為何而生。從初初睇住CK兄寫生活到工作，又睇到渣老闆以口臭臭爛笪笪嘅角色出現，兩個老闆喺到呻，寫嘅開心睇嘅過癮，又真係幾好玩嘅。到自己寫blog果時，又滿腔理想，想寫番D驚天地泣鬼神嘅曠世之作，點知，無啦啦又彈隻豺狼出嚟講森林故事。唉，墨水又唔夠人咁多，文采又無人咁好，咁我唯有寫番D生活事吊住吊住咁啦。我以為，我呢種隱姓埋名嘅小市民，寫blog應該無乜壓力。但事與願違，原來，我都係有嘢唔敢寫。

講真，我同CK兄嘅諗法一樣，我對blogging都係有期望，都係想寫番D有point嘅嘢，我真係好唔想好似寫日記咁話今朝返工放工後去咗邊度食飯好好味然後返屋企。CK兄休息，對我的確係有D啟發，或者係提醒咗我已經去到一個樽頸位或掘頭路。

虛擬同真實，我都開始分唔清。好多人認為，開部電腦上網，就可以用另一個身份去同人溝通，更可以我性格我塑造。但諗真D，電腦已經係日常生活嘅一部份，究竟，每日出街對住人果個樣，係真正嘅我，抑或對住電腦果個樣，先至係真正嘅我呢？我唔知道。我，需要去思考。

各位，如果見到我講錯嘢，我响到講聲唔好意思。

呢篇，抽咗CK兄好多油水。但係，我無罪惡感。

匿名友，你仲喺咪度呀？抑或化咗身寫blog呢？Send個貓告知我你嘅近況好無？