新好平論

事原係關於科技。

今日嘅科技新產品，到咗聽日，可能已經落伍，跟本無得追。

以手提電話為例，今日出咗部最新款有齊乜乜物物功能嘅，價錢一定貴。好喇，一年後，呢部電話跌價，但個款就變舊咗，而新一款又再出，咁點決擇呢？

新好平論，係從電台聽返嚟，意思係購物時嘅取捨態度。

購物時，我哋無可能咁貪心要齊晒又新、又好、價錢又平呢三種要素，我哋只能選其二。

即係一件新穎而且品質又好嘅貨物，價錢唔會平。

一件品質好價錢又平嘅物品，唔會係新款。

一件新款但又平嘅貨色，質素唔會有保証。

買唔同嘅嘢，我哋都有唔同嘅取捨。

只選一項嘅人，唔係精明嘅消費者。

唔理呢三項嘅人，係病態購物狂。

新好平論，其意義仲可以應用响人生道路上，提醒自己唔好咁貪心，乜嘢應該堅持，相對應該要捨棄啲乜。

今日有單新聞，係一個入世未深嘅男生，因好奇同滿足自己嘅快慰而加入咗SMS徵友會，五日內傳送咗二千幾個短訊，而新鮮刺激換番嚟嘅，就係萬幾銀嘅電話費。

新好平論，正正可以代入呢單嘢度。雖則，我強烈懷疑事主談情說性嘅對像，係徵友公司虛構出嚟屈錢嘅。

新、好、平，揀老婆嘅話，我會揀邊兩款呢？