踩波(車)男孩

從前，有個小男孩，佢好鍾意玩，每逢周未佢都會扭媽媽帶佢去遊樂場玩。媽媽係一個好開通嘅人，只要唔過份，媽媽都會滿足小男孩嘅要求。

去到遊樂場，小男孩見到一班小朋友用一個二個彩色嘅汽球玩緊遊戲。小男孩覺得好新奇，於是就靜靜咁坐响旁邊嘅樹底下，睇吓呢班小朋友玩緊乜。

呢班小朋友，每人嘅左右腳都綁住一個汽球，然後响空地中間追追逐逐，目的係踩爆人哋腳上嘅汽球。當有氣球被踩爆之後，有啲小朋友會唔介意然後走去場邊啲櫈度坐低休息，而有啲唔憤氣嘅小朋友就會即刻吹番個新氣球然後再出去玩過。見到呢班小朋友咁開心，小男孩都好想玩埋一份，但係小男孩同媽媽今日無汽球在身，咁唯有等下星期。

一個星期過去，媽媽今次買咗一袋汽球帶小男孩去遊樂場玩。去到遊樂場，小男孩又見到呢班小朋友玩緊踩汽球嘅遊戲，於是就急不及待吹咗兩個汽球綁响腳上，然後跑出去加入呢班小朋友嘅戰圈。

小男孩有踩爆人哋嘅汽球，亦有其他小朋友踩爆小男孩嘅汽球，有來有往。踩汽球呢個遊戲，踩到腳就少不免，小男孩初初被人踩到都嬲架，但係其他小朋友會同佢道歉，而小男孩亦知道自己有時又會唔小心踩到人，於是，小男孩就唔再嬲，繼續開開心心咁玩。

日子一路一路咁過，小男孩就同呢班小朋友熟絡咗，而呢個踩汽球嘅遊戲，亦都開始變咗小男孩同呢班小朋友見面嘅一個藉口。踩唔踩爆汽球都係其次，最緊要嘅係大家見吓面走吓跑吓睇吓人哋有咩花花心心貓仔狗仔汽球等等，嘻嘻哈哈咁就一個下午。

一日，有一個新嚟嘅小朋友加入。呢個小朋友著住長褲，面上一副冷漠嘅表情。初頭，呢位長褲男孩都玩得好好地，但後來，佢就有意無意咁踩到人腳踢人後踭。踢到人後，佢嘅臉容都係一貫嘅冷漠。

呢個長褲男孩，每個星期都係咁，踩到人痛又毫無反應。有小朋友投訴佢，但佢又唔聽。終於小男孩就忍唔住，一嘢就飛鏟落呢個長褲男孩隻腳度。

媽媽見到小男孩飛鏟，就叫小男孩返埋嚟，好温柔咁同小男孩講：「你睇吓你，玩到成身汗啦… 抹咗啲汗先啦…」然後响手袋裡攞條毛巾出嚟，輕輕咁印落小男孩嘅額頭、後頸、同背脊度，繼續用佢好温柔嘅聲線同小男孩講：「乖仔，你知唔知你頭先咁樣做係唔啱架？你要記住，唔好心存怨恨，果個小朋友成日踢到人，或者佢都唔想嘅… 你有無見佢每次都著住條長褲呢？其實，佢長褲管裡，係裝咗條義肢…」

「媽媽，唔好講好嗎？」

「乖仔，你要記住，每個人做嘢都有佢嘅因由。你今日點樣對人，第日人哋就會點樣對番你身邊最親嘅人，知道嗎？好啦，去玩啦。」

小男孩又走番去玩，响玩嘅同時，佢亦好用力咁記住媽媽嘅說話。但係响呢個時候，小男孩見到自己嘅一個同伴受傷跌低咗，而果個長褲男孩竟然仲踩多佢一腳。火遮眼嘅小男孩見到，仲記得媽媽嘅說話咩，於是又飛身兩腳一齊鏟落個長褲男孩度…

媽媽見狀，就走去小男孩身旁，重重咁打咗佢一巴。呢巴掌，真係好重手，小男孩塊面即刻腫咗。媽媽打咗小男孩一巴之後，就轉身離開。

小男孩呆坐咗响遊樂場嘅地下度，睇住媽媽遠去之後，亦睇住呢班小朋友一個一個咁返屋企。小男孩一邊諗住受傷同伴被長褲男孩踩嘅畫面，一邊又諗住媽媽嘅教悔。當小男孩一諗起媽媽果隻温柔嘅手同佢抹汗嘅情境，突然間哇一聲喊咗出嚟…

「對唔住呀，媽媽…」

唔知道，媽媽會唔會返嚟接番小男孩走呢？