再講同事Jim

今日同同事Jim一齊搭檔做嘢，我之前寫過Jim為人隨和及工作經驗老到，所以我好鍾意跟佢搭檔。記得幾年前同佢一齊做嘢時，見佢行路有少少拐吓拐吓，我就問佢隻腳係咪有事。當時佢話係每當落雨時，盤骨同大腿骨個骹位會痛，當到咗一日佢真係痛到頂唔順時，佢就會去做手術。

大約幾個月前，Jim嘅舊患開始痛到影響工作，於是佢就睇專科醫生，排期下星期做手術。Jim嘅情況係盤骨同大腿骨波波骹位處嘅軟膠質蝕晒，所以行路時就會無咗層軟墊保護而骨磨骨。佢做嘅手術係响盤骨位鑽個小孔，然後由小孔注射一層人造軟膠質去骨骹處，唔係咩大手術但就要大概三個月休養。

响Jim呢個休養期，需要有人暫代佢個位。因為幾年前我曾經跟Jim學習過佢所負責嘅工作，雖然後幾年公司調咗我去另一個部門，但上頭一講起有邊個可以代替呀Jim時就自不然咁諗起我。所以响Jim做手術之前，公司便安排我同呀Jim搭檔，好讓我熟習佢嘅工作。

今日未開始工作前，我哋去飲杯咖啡先。期間，Jim從口袋裡攞出幾張相出嚟俾我睇，除咗有一張係佢隻西施狗仔瞓响佢心口嘅相之外，仲有幾張係影佢同佢架旅行拖架。旅行拖架裡有廚房浴室睡房，將旅行拖架扣上架車嘅尾鈎，咁就可以揸住架車四圍去，唔駛租酒店都可以隨時去到邊瞓到邊。其實，我一向都主張朋友還朋友同事還同事，但Jim今日俾佢啲生活照我睇。我心諗，佢真係待我好好，又肯教我嘢，又肯同我分享佢嘢生活事，我相信，世上係有眞心嘅人，只係，有無機會遇到，而遇到之後，你有無因為有個防人之心而錯過咗咁啫。

今日工作時，見呀Jim行路拐得嚴重咗，有幾次差啲跌到，我也出手扶一扶佢。見佢咁樣，講真，我個鼻都酸酸哋架，始終，人同人之間嘅關係係好微妙，有時感情响不知不覺間建立咗，但就要到咗某個位，先至會感受到。

Jim今日雖然不便於行，但做嘢仍然快手，早早就可以收工。如果學到佢七成功力，呢一技就真係可以世界通行。