失守

如果我同你講：「喂，樂聲出咗部最新型號嘅洗衣機，體形比上一代更纖細慳位，而且總係洗衣乾衣兩用。呢部新洗衣機洗得更多衫之餘，總會慳水33個percent，乾衣比以前快二十分鐘，總有紅外線殺菌功能。全電腦自動化控制，可因應唔同衫量控制洗衫時間、水量及洗衣粉份量。內置MP3播放器，於洗完乾完衫之後播放悠揚音樂提醒你乾淨衫已為你準備好，而且衫褲總一啲都唔會皺。新機有齊黑、白、紅、橙、黄、綠、青、藍、紫多種顏色於第一日發售時任你選購，跟機還送彷真皮保護套，價錢同上一代嘅一樣，絕對係吒咜二零一一年嘅劃時代家品，快啲上網預定啦，遲咗就要等好耐架啦！」

聽到呢度，你會講：「黐線！」然後一嘢敲爆我個頭！

好，我再同你講：「喂，西門子出咗部新雪櫃，體積大小同上一款一樣，但存放食物空間多20%。全電腦控制，分六個泠凍區域，按唔同食物種類及份量控制冷凍温度，幫你慳電高達40%。新設後備電池，大停電時可自行提供電力，備用時間達一星期。內置RFID，快速食物條碼素描，提醒你邊種食物缺貨，永遠在線即時幫你上網訂貨，快捷方便。新雪櫃除咗有齊黑、白、紅、橙、黄、綠、青、藍、紫多種顏之外，總有不銹鋼、木紋、真皮等等唔同質感任你選擇。當呢個雪櫃推出之後，今年，絕對係copycat之年！快啲上網預定啦，潮人必備！」

聽到呢度，你一定會鈡我雞心再打臉。

想一想，上一次換屋企部有線電話係幾時？床頭個鬧鐘用咗幾耐？會唔會因為慳水慳電而換一個總用得嘅洗衣機？到底我哋追捧嘅係科技，抑或係潮流？我哋要嘅係舒適感，抑或係虛榮感？

獅子座嘅我，虛榮感滿瀉。守咗三十幾年繼2E之後，我諗我應該會失守於pad2掛，唔知呀，等著瞧啦。