搶購暴力

近來有部份香港人「搶購」食鹽，我只覺得是無常識的表現，並唔存在暴力問題。「搶購」二字，我覺得只係誇張比喻手法，始終香港人會排隊會付錢購買。如果我排頭位一次過買五噸鹽又算唔算係暴力行為呢？雖然我唔會咁愚昧，就算有需要亦主張買一份夠用就可以，但無論响文明自由社會或非文明專制社會裡，你可以話呢種做法唔理智，但就唔算係暴力。餐廳酒店亦可以包廂包場，我預早排隊預約，有足夠本錢購買力，先到先得，合理合法，何來暴力之言? 但如果當中有人打尖，搶奶粉搶鹽唔俾錢，咁就先算係暴力行為。所以，如果一見「搶購」呢兩個字就認定呢種行為暴力，那就等同梁燕城博士解釋「盲目胡混的詭辯」為「生物失去視力，胡塗地混亂帳目或男女發生同帳的婚外性行為的詭辯」一樣的了。