小小女孩

大家樂買完飯，就去揾位坐。

去到一張四人枱，有兩個大男人坐响一邊食緊飯，就快食完。

另一邊，有一個小女孩，四五歲咁上下年紀。

我，拎住兜飯，就一嘢坐响小女孩側邊，開始食大家樂最出名嘅一哥焗豬扒飯。

食吓食吓，坐我對面嘅大男人食完飯走開咗。

然後，小女孩嘅媽媽買完飯返嚟，放低咗碟飯同凍檸茶响小女孩面前，然後企响到餵小女孩食飯，一碟兩份分。

哎吔好唔好意思呀我，原來我坐咗小女孩媽媽個位。清潔嬸嬸快啲執咗我對面位兜嘢啦，好讓我坐過對面位。

可惡嘅清潔嬸嬸唔知係有心抑或無意，遲遲都唔執對面位壇嘢，就算响我身邊經過都好似視而不見咁。著急嘅我心諗，鬼唔望香港好似外國咁，提倡自己執手尾，等你班盲人無晒嘢做，嘿！

諗還諗，現在嘅問題始終要解決，咁，我就大聲叫阿嬸：「唔該，可唔可以執咗呢堆嘢先呀？」

清潔嬸嬸依家先至埋嚟執嘢抹枱，然後我就坐過對面。小女孩媽媽就禮貌地同我講聲唔該。

媽媽坐低，繼續同小女孩食飯。

呢個時候，坐我隔離嘅大男人食完飯走埋。

小女孩好似食飯食到悶咁，開始週身郁。

週身郁呢，就終於出事喇。小女孩嘅小手打瀉咗杯凍檸茶。

媽媽連忙執番起隻杯，然後幫小女孩抹手。

小女孩開始鄒起眉頭扁起個咀問媽媽：「咁點呀？」

媽媽話：「咁無得飲啦…」

小女孩嘅眼晴開始變紅，一大粒眼淚標咗出嚟，然後用一個好猙獰嘅扭計表情一路喊一路罵媽媽「嘩… 嘩… 我唔鍾意你呀… 嘩…」

小女孩嘅温柔可愛，响呢一刻，消失得無影無踪。

我心所剩低嘅，係一團無明火同掌刮小女孩一把嘅衝動。