煮麵師傅

「雲吞麵唔該。」

侍應姐姐落單後，就向望住窗外發呆嘅煮麵師傅講聲。數秒過後，煮麵師傅先至有反應，放幾粒雲吞落鍋滾水度，再拎個生麵餅放埋落去，用筷子撩兩撩，十幾秒之後，撈起生麵放凍水過冷河，撈起雲吞放碗底，再將過完冷河嘅生麵放碗面，淋上湯兼放幾條韮黄，簡單快手一氣呵成，全無半點猶豫生硬。

煮麵師傅年少時已經好鍾意煮嘢食，發夢大個咗之後都要做廚師。憑住一股堅毅嘅決心，佢入咗一間著明嘅學院去學煮中菜同西菜。煮麵師傅其實對煮嘢食幾有天份，响學煮菜其間，已經受到導師嘅讚嘗。畢業後，煮麵師傅躊躇滿志，決心發明一啲新穎嘅食譜，進軍飲食業。煮麵師傅揾過數間大酒店或老字號餐館，由於煮麵師傅嘅新穎食譜太大膽，所以煮麵師傅都處處碰壁。一年過去，煮麵師傅仍未揾到一份可以自由發揮嘅工，而煮麵師傅嘅意志已經消磨得七七八八，最後，煮麵師傅就向現實低頭，响一間小餐館裡做一個煮麵師傅，一做就二十年。

响呢二十年裡，煮麵師傅曾經嘗試推出創意食譜，譬如牛奶士多啤梨燴麵、腐竹糖水炆羊腩、泰式酸辣涼瓜湯等等。食譜係經過煮麵師傅精心研究而成，而價錢較一般食譜貴，創意嘢，理應好好賺。可惜，日復日年復年，呢個食譜，無人肯叫。而煮麵師傅，始終都利用唔到呢個創意食譜，幫助自己同幫助餐館發圍。

煮麵師傅開始明白到，興趣同揾食，原來係兩回事，兼且唔可以混為一談。做生意嘅，一切都係顧客口味為上。顧客無論入去大酒店、老字號餐廳、抑或普通麵舖仔，佢哋心裡都會對所食到嘅食物有咗一定嘅期望。入到大酒店，佢哋唔會指望有煲湯豬骨食；去到老字號餐廳，佢哋唔會指望有新菜式試；去到普通麵舖，佢哋更加唔會指望有牛奶士多啤梨湯麵食。一碗普普通通嘅雲吞麵，保持得到水準，就已經足夠。創意，只係可以用响點樣打到啲麵彈牙啲、雲吞點樣可以整到爽啲、以及有咩可以替代果幾條畫龍點睛嘅韮黄，就係咁多。

話時話，碗雲吞麵，又幾得喎。

此時嘅煮麵師傅，又再望住窗外冷清嘅街道發呆，似乎係對自己曾經擁有過嘅天份、熱誠同執著，感到無限嘅唏噓。