百寶袋

從細到大都鍾意叮噹漫畫，無錯，我只認同果隻藍色機械貓叫叮噹，而唔係多啦A夢，大雄、技安、靜宜、牙擦仔等等主角名字亦深深印入腦中，無法改變。喜歡叮噹嘅原因，係除咗漫畫裡流露出最純真嘅人情味之外，仲因為有叮噹個百寶袋。叮噹個百寶袋，可以話係故事嘅靈魂，因為叮噹每一個故事，都會出動到呢個百寶袋。每當大雄闖禍或需要求救時，叮噹總係會响個百寶袋之中攞件法寶嚟幫大雄。而佢嘅每件法寶，都係可以好順利好恰到好處咁幫到大雄度過難關。雖然有時叮噹嘅法寶會搞到大雄哭笑不得，但呢啲都係一種幽默，為漫畫故事加入一啲笑料，咁樣人人都睇得開心。鍾意睇叮噹嘅人，內心少不免都會有啲童心，總會幻想吓如果自己有個百寶袋就好了，一支考試時一攞上手就會自己自動答問題嘅考試筆；可以回到過去及未來嘅時光機；帶人飛天嘅竹蜻蜓等等，都係對滿足自己慾望幻想嘅一種嚮往。

叮噹個百寶袋只係存活响幻想裡面，而現實中，一個聰穎、閱歷豐富兼且能言善辯嘅女子就好似一個活生生百寶袋。同一個咁樣嘅女子傾談，都會有無限嘅樂趣。佢見識之廣，就好似有無窮無盡嘅法寶，每每都令人有所驚喜；佢見解之精僻獨到，就好似一件意想不到嘅法寶，往往令人眼前一亮；佢隨手拈來嘅比喩可以將一件複雜難明嘅事情簡單化，就好似一件度身訂造嘅法寶，精確得令人心服口服。雖然，咁樣嘅一個女子因為聰明且能言善辯嘅關係而好多時會令人哭笑不得，但不得不承認，能夠同咁樣嘅一個女子同行又會好有趣味，就算成日俾佢窒到啞口無言，都覺得開心。

Red Hot Hits

讀書期間係聽歌聽得最瘋狂嘅時期，我讀書果陣，最紅嘅係四大天王。响九十年代初，當時嘅唱片可以有煙草商贊助，於是就有一系列數張Red Hot Hits嘅唱片誕生。唔知點解，唱片封套上有個Red Hot Hits Label，就好似好有質素保証咁，攞上手都好似重啲，想買嘅話仲要預訂添。當時老翻未流行，買襯都係正版貨，廿幾蚊張仲要加稅，唔嘢少架。

Red Hot Hits我有兩張，分別係張學友嘅「愛火花」同黎明嘅「I Love You OK？」。我自己就鍾意「愛火花」多啲，當時果首「還是覺得你最好」簡直聽到爛咁滯，一上車就不停咁煲。如果「每天愛你多一些」係張學友翻生之作，那麽「還是覺得你最好」就將張學友嘅事業推上高峰。當然，呢隻唱片嘅質素真係好高，雖然多改篇歌（果期好流行），但耐聽，首首歌都好正。

而黎明隻「I Love You OK？」，就食正無記電視劇「都市的童話」條水，初出道嘅朱茵，加上主題曲「傻癡癡」，仲唔昆到班少男買呢隻碟？當時我個老友為黎明而瘋狂，彈得一手好琴嘅佢，成日彈「傻癡癡」冧女之外，仲成日上堂時响課本上抄歌詞，練得一手靚字，人見人讚。

Red Hot Hits响當時嚟講，係質素保証。依家攞番隻「愛火花」嚟聽，都覺得好正。

置諸死地

五樓一間四百多平方呎嘅密室，中間只得一張長枱，有十條大漢圍住長枱而坐。十個人之中有八個煙民，兩個二手煙癮君子，密室中並無空氣流動，佢哋响呢個密室之中，坐咗四個鐘頭。

呢十個人原本係親密戰友，响戰場上同生共死。但係當呢十個人囚咗响呢個密室坐埋同一張枱嘅時候，就各懷心事，務必要响最短時間內，從戰友身上得到最大利益。

你虞我詐、虛張聲勢、皮笑肉不笑等等陰暗招式都可以响呢度大派用場。

佢哋係玩緊德州撲克。

每人買五十元籌碼，「小盲」兩毫半，「大盲」五毫，無限落注，輸晒可以再買籌碼，五十元一底。

二手煙癮君子甲玩得保守，攞唔到好牌都唔會去，但攞到好牌時又搏唔到大牌，手頭上五十元嘅籌碼就慢慢咁貢獻俾人。

望吓牆上嘅大鐘，係時候散水。二手煙癮君子甲手頭上只淨十三元籌碼，於是把心一橫，底牌都唔睇就晒冷，有一煙民捨命陪君子。當然，佢肯捨命陪君子，二手煙癮君子甲又點會唔成全佢呢？二手煙癮君子甲拿回二十六元籌碼。

二手煙癮君子甲見只得二十六元，計數仲要輸二十四元，於是又再接再厲，底牌唔睇又去晒光二十六元。今次竟然有又四人誓死跟從。

開牌，大家嘅底牌都係差唔多。最後，二手煙癮君子甲又符符碌碌咁贏咗，攞番一堆籌碼。

計過數，共值九十九元，減去五十元籌碼本，贏咗四十九元。

二手煙癮君子甲見揾夠一個星期嘅晏仔，即刻割禾青兌現走人。

二手煙癮君子甲嘅故事，係想講如果思前想後都走唔出個囚局時，不如把心一橫，置諸死地而後生，有時或者會有意想不到嘅驚喜。

當然，德州撲克嘅戰術並唔係咁。驚喜驚喜，驚先於喜。

所以，都係唔好信二手煙癮君子甲所講嘅道理。

因為，有一煙民，捧走了三百五十元。

懶‧逃避

「你懶。」
「咩懶喎，係悠閒。」
「懶。」
「呢度生活係咁悠閒架嘛…」
「懶就懶啦。」
「OK，咁滋油淡定嘞。」
「係滋油，唔係淡定。」
「…… 無你符。」

我承認，我有懶嘅基因。一單工作需時十天完成，我會响頭五天做晒八成嘅嘢，而以後嘅五天，就會做吓然後hae吓，他他條條咁歎。無錯，我係會選擇先苦後甜。或者，我可能會俾人笑我蠢，理由係今日唔知聽日事，捱完苦之後可能一聲唔該就講拜拜。不過世事又係咪咁絕對呢？如果先甜後苦，要捱嘅苦就會更加苦。所以，我寧願早早開行馬力做完大部份嘅嘢先，都唔想拖到最後臨急抱佛腳。歎，都要歎得舒服啲嘛。之又咁，諗諗吓，我都唔算係懶果喎，起碼我係勤力完先至去偷懶。

哈哈，我勤力，係因為我懶。

「錯！你勤力，係因為你想懶。」
__________

有問題出現，你會選擇即時解決問題，抑或逃避呢？

我會睇情況，如果有啲問題係有得逃避嘅話，我會選擇逃避。

縮頭龜？

Oh well，我咁講，係因為有啲問題，如果要即時解決嘅話，可能會有好壞嘅效果。逃避嘅目的就係想拖延個問題，到咗某個時候，當時機成熟時，問題可能會容易啲解決。又或者，唔去解決就已經係最好嘅解決方法。

釣魚臺群島主權問題，中國一直逃避。

海峽兩岸問題，台灣一直逃避。

如果要即時解決呢兩個問題，後果會如何呢？

所以我認為，逃避問題唔係縮頭龜，因為逃避嘅背後，其實可能經過好多嘅計算。
__________

畏高

我無畏高症，我會企上CN Tower嘅玻璃地板，我唔怕企上五十三樓嘅天台，唔怕搭飛機，唔怕玩過山車。但係當人站立於高地邊沿而又無安全設施保護時，內心少不免都會有種恐懼嘅感覺，尤其是我呢種緊張大師，總會諗起跌至頭爆血流腦漿四濺斷腳爆肺嘅場面，認真變態。

工作需要，有時要爬高做嘢。當企上條四呎摺梯時，我會唔當佢係咩一回事，就算跌都可以雙腳落地四平八穩。當企上條六呎摺梯時，我就覺有少少牙煙，如果跌落地，都可能會骨裂或內傷。當企上條十呎摺梯時，我會開始驚，手心開始冒汗，如果跌落地，可能會斷骨內傷甚至爆頭…

企得越高，跌得越傷嘅道理就係咁。

今日，我企上條十六呎摺梯到做嘢，望落地下，會心跳加速額角迅速冒汗架。當爬上條長摺梯時，初初並唔覺得佢高。但當爬到頂望返下面時，就覺得驚，心裡會諗「死啦，咁高，跌落去點算呀？不如返落去囉」，就咁，想再爬高啲就無可能嘞。其實，我知我係唔怕高嘅，當時只係俾一啲負面嘅幻想影響到自己嘅信心。要克服呢種心理幻象，其實好簡單，就係向上望唔好向下望返落地，咁就唔會有多餘嘅恐懼。

最後，工作完成，安全著地。

三文魚

依家日本菜任食開到盛行盛市，有時我都會同班朋友去大擦一番。不過呢，年紀大咗，食量就倒退。記得以前讀書時，食極都唔飽，仲試過同四個朋友放學後去買咗廿件肯德基家鄉雞狂隊，食到爆血管咁滯。依家就唔食得咁多啦，肉類食少咗好多，健康嘢反而食多咗，但又未至於要齋戒，始終蔬菜很難嘛。

講開日本菜任食，我最唔鍾意叫壽司，舊舊飯咁填飽個肚，好唔抵架嘛，所以我寧願叫魚生刺身。刺身中，我鍾意食吞拿魚。可是，吞拿魚價貴，任食唔會供應，只會供應一種所謂嘅白吞拿。白吞拿係好聽嘅名，唔好聽嘅就係油魚，食落成口油，好滯。另外，任食供應最多嘅，係三文魚。我會食三文魚，但只係一塊起兩塊止，我都係欣賞煙三文多啲。

同友人講起，佢話「唓~ 你果邊三文魚咁多又咁平，想食嘅話就簡直係唾手可得，梗係食到厭啦。我呢邊三文魚貴嘛，唔係成日可以食到，所以我哋會鍾意食咁囉。」

或者佢都講得啱嘅，曾幾何時，我都鍾意食三文魚嘅，唔知係因為我曾食得多而食厭，抑或係人大咗口味會改變呢？唔諗囉，我只諗到，有咁多人鍾意食三文魚，但我又唔好，咁我咪唔係一個隨波逐流嘅人嚟咯，標奇立異，有時我幾鍾意架。

宇宙大爆炸

呢個宇宙大爆炸實驗，原來計劃咗廿多年。首次最基本嘅試驗，已經响琴日無聲無息咁進行咗。

算係理科出身嘅我，對呢個實驗，應該會好興奮。但唔知點解，我會擔憂。

我都認為，求知慾與行動性係推動人類進步嘅動力。無錯，如果呢個實驗成功，的確係為人類了解宇宙及自身嘅起源有好大幫助。雖然CERN班科學家話實驗係安全，著名物理學家STEPHEN HAWKING話出事率少過一個百分點，但誰能真正可以保証呢個實驗係百分百安全，唔會引致世界沒日呢？呢個係關乎全世界嘅問題，人可以為咗自己嘅理想可以連自己條命都唔理，我唔反對。但如果連其他人嘅性命都唔理，縱使只得少於一個百分點機會會出事，但始終都係會有出事嘅可能性，而我又無權反對呢個實驗，咁樣係唔係霸道咗呢？如果世界真係滅亡，CERN班科學家同STEPHEN HAWKING會死得甘心，咁我呢？

怒火媽與小雲曾用魯迅的比喩形容我：鐵皮屋子中，大部分人都昏睡了，仍然清醒的幾個人，可以選擇默不作聲等待死亡，但是吶喊著，提醒著總有希望衝破鐵皮屋子的囚禁。

一向樂觀嘅我，現在會杞人憂天。我，真的越來越怕死了。