三文魚

依家日本菜任食開到盛行盛市，有時我都會同班朋友去大擦一番。不過呢，年紀大咗，食量就倒退。記得以前讀書時，食極都唔飽，仲試過同四個朋友放學後去買咗廿件肯德基家鄉雞狂隊，食到爆血管咁滯。依家就唔食得咁多啦，肉類食少咗好多，健康嘢反而食多咗，但又未至於要齋戒，始終蔬菜很難嘛。

講開日本菜任食，我最唔鍾意叫壽司，舊舊飯咁填飽個肚，好唔抵架嘛，所以我寧願叫魚生刺身。刺身中，我鍾意食吞拿魚。可是，吞拿魚價貴，任食唔會供應，只會供應一種所謂嘅白吞拿。白吞拿係好聽嘅名，唔好聽嘅就係油魚，食落成口油，好滯。另外，任食供應最多嘅，係三文魚。我會食三文魚，但只係一塊起兩塊止，我都係欣賞煙三文多啲。

同友人講起，佢話「唓~ 你果邊三文魚咁多又咁平，想食嘅話就簡直係唾手可得，梗係食到厭啦。我呢邊三文魚貴嘛，唔係成日可以食到，所以我哋會鍾意食咁囉。」

或者佢都講得啱嘅，曾幾何時，我都鍾意食三文魚嘅，唔知係因為我曾食得多而食厭，抑或係人大咗口味會改變呢？唔諗囉，我只諗到，有咁多人鍾意食三文魚，但我又唔好，咁我咪唔係一個隨波逐流嘅人嚟咯，標奇立異，有時我幾鍾意架。