新曲精選

好嘅市場策略，如Wii和PS3，明明有源源不絕嘅供應量，但係偏偏又要玩限量發售，攪到一眾機痴個個星期天未光就冒風冒雨冒雪去排隊等買機，返工返學都無咁神心，依家仲有大把人爭住去輪機，買到嘅就好似係身份嘅象徵，高人一截咁，顛唔顛？個策略咁樣玩法其實又幾絕，雖然俾人鬧到仆街，但係條橋又掂喎，真係吹佢唔脹。


講番火鶴曾極度迷戀嘅Kelly，就快會出新專輯，不過今次又係玩新曲加精選。無可否認，以單碟價錢買五十四首歌再加十六首KTV，以市場策略嚟講，抵食夾大件確超值，應該有唔錯嘅銷量。不過，Kelly喺過去嘅十年，出過嘅新曲精選碟一隻手都數唔晒，當時火鶴因為過度沉迷Kelly嘅美色，為咗忠實粉絲呢個虛名就在所不惜地殺埋呢堆肥豬肉碟，足之就滯到上心口兼夾無晒錢去睇醫生。諗番轉頭，其實有無需要為咗三首新歌去啃晒成隻碟呢？依家嘅火鶴，當然唔會再咁無理智啦，買嚟都係等佢封塵啫，買得幾多丫。睇睇新碟嘅歌目，嘩，「戀愛情色」、「花花宇宙」、「星期五檔案」、「星夢情真」等等歌曲，火鶴至少已經擁有三個copy分別收錄喺Kelly唔同嘅專輯入面，依家又出多隻得四首新歌但又要人硬啃一堆舊歌嘅新曲精選碟，揾笨咩？有數十隻歌之前火鶴都已經俾咗幾次版權費啦，呢次仲要屈人俾多鑊，Kelly，你唔似係咁無良個bor！