良好服務

同一班死黨老友出街食飯，一路吹水一路食，就算啲食物係幾咁難食都好，只要食得窮兇極惡不拘禮節，都可以食得開心過癮。

食得窮兇極惡，即係話唔理啲食物嘅價錢同份量，抑或「了能」唔「了能」，想食咩就叫咩，一於同班老友出錢又出命，食到有今晚無明天，做隻飽鬼再上路。

食得不拘禮節，即係話劈埋啲乜鬼餐枱禮儀喺一邊，無論你大啖細啖用刀用叉用筷子用手飛象過河都無所謂。客氣？對老友要客氣嗎？

白灼基圍蝦，搣開個蝦頭一啜，蝦膏即時啜上腦，再搣蝦殼，沾豉油，極品。

一手拎起隻充滿黄油膏嘅蟹脚，大啖咬落去，啜咗啲蟹膏同蟹肉落肚，然後再吐番啲蟹殼出嚟，暢快。

但係喺呢個時候，怪事通常都會出現。

唔知你有無試過，當你正在好專心咁吐番啲蟹殼响隻茶杯碟嘅時候，十次有九次都會有隻手突然响你身邊伸出嚟，攞走你隻茶杯碟，然後隻手又會自動將一隻新嘅茶杯碟擺番喺你面前，等你可以繼續「LUR」骨？

當火某遇到呢種良好服務態度嘅時候，就一定會扯火。

唔係話幫個客換骨碟唔啱，而係，要睇時候。

侍應幫客人換骨碟，應該係公司政策，好讓客人從呢種良好嘅專業態度中感受到尊重體貼關懷賓至如歸。

但係，當「LUR」緊骨嘅時候嚟換碟，火某就完全感受唔到體貼關懷喎，因為我覺得你响度騷擾緊我享受食物，簡直係唔尊重。

侍應要專業，要識得為客人設想，就請等客人食完一道菜之後先至好同佢哋換碟。機械式嘅所謂禮貌工序，只會令人討厭。

下次再遇到呢個情況，火某就會學蔡瀾先生嘅反應，同個侍應講：「叫你老闆嚟，順便叫佢換埋你。」