男廁閒談

有乜嘢係男廁有而女廁無呢？好簡單，係尿兜（urinal）。

男女生理結構唔同，尿兜嘅設計，係响男人小解果時，方便「準確」D，而且仲可以慳水慳位兼慳時，符合環保及經濟原則。

個人觀感及用後感，比較喜歡舊式鑲落牆度由腰位一直落到地面嘅長尿兜，大男人細路仔都啱用。

可能係成本同埋維修艱難嘅問題，依家，差唔多全部男廁都用細尿兜，掛响牆上面。

呢種細尿兜同舊式嘅長尿兜，分別唔大，只要整番一兩個矮D嘅俾細路仔用就得嘞。

不過有時，都有D戇居嘢出現。

戇居嘅係，有時會（遇到）一D安裝得比較高嘅尿兜。

安裝得較高嘅尿兜，俾NBA球星用，絕無問題。

俾一般普羅大眾用，或者都唔係好大問題。

火某都係一般普羅大眾，唔係矮仔，但係唔知係天生抑或後天發育得比較良好嘅關係，响呢D尿兜度小解嘅時候真係要無時無刻咁打醒十二分精神。如果一唔覺意一鬆手呢，就會即刻浸落D水度，你都咪話唔恐怖！

各位室內設計師及則師們，下次量位擺尿兜時，可唔可以擺矮D呀？
______________________________

講開廁所，今朝坐喺個廁所睇報紙時，睇到一篇由舒展超寫嘅「改拍之逃」，寫話如果無線改拍「逃」嘅話，由邊位小生去演最適合，睇落都幾過癮。「逃」(Prison Break)，電視精火某已經睇到2.19啦，如果爆咗D內容出嚟呢… 聽俾人追殺都似，到時真係唔逃唔得嘞。不過，跟阿舒展超大俠一齊幻想吓都得掛？

Michael Scofield
舒大俠話吳卓羲。
吳卓羲咁戇直，兼又後生咗D喎。火某本來諗鄭嘉穎，不過又覺得另有更適合佢嘅角色，不如就郭晉安啦。

Lincoln Burrows
舒大俠話歐陽震華。
唔係吓化？歐陽震華最好飾演俾阿Warden Pope革走咗嘅C.O. Geary。Lincoln咁嘅款，黃德斌幾似。

Fernando Sucre
舒大俠話黄德斌。
黄德斌做咗Lincoln，咁，Sucre呢個為女生為女亡嘅戇直角色，俾番吳卓羲啦。而佢個女友Maricruz，當然非官恩娜莫屬啦。

Brad Bellick
舒大俠話郭鋒。
郭鋒演呢個角色幾好。

T-Bag
舒大俠話謝天華。
呢個真係一絕，謝天華做D變變態態嘅角色最耍家。

好嘞，舒大俠就講到依到，跟住嘅火某繼續…

Sara Tencredi
邵美琪幾入型入格，專業得嚟又有D抑藥feel，不過可能成熟咗D，未必夾到郭晉安。火某寧願揀吳美珩。

Veronica Donovan
宣萱，律師角色太深入民心。

C-Note
林保怡D表情真係似到十足十。

John Abruzzi
叫鼎爺李家鼎留長頭髮啦。

Warden Henry Pope
秦沛。

Agent Kellerman
心狠手辣，但又有D搞笑，陳豪。

Agent Mahone
輪到鄭嘉穎嘞，因為火某仲好記得佢喺「爭分奪秒」裡面嘅角色。

President Caroline Reynolds
Errrr… 不如玩吓嘢，由呂秀蓮粉墨登場，由佢嚟毒害陳水扁，夠晒精彩啦掛！？
______________________________

同兩隻熊貓命名，就不如叫「煲呔」同「袋巾」，吖，問！
______________________________





無獎遊戲：估吓呢樣07年最新嘅發明係乜？點樣用？