不惜一切

火某雖然於年幾前轉了工作部門，但仍然同舊部門關係密切，工作範疇也須要兩邊走，可謂全天候打雜一名，打遍天下豬頭骨。前日，舊部門阿頭Jeff來電，要求火某放下手頭上所有的工作，全力應付一單新工程。

火某原本跟開的工程，是一所有眼有蜜蜂又姨媽到的電腦開發商，並安排於下星期開始工作。

最近，公司同本國一間大型家居設備連鎖店簽了合同，本月生效。該連鎖店分店眾多，而地點又分散得很，以現在公司工程人員的數目和工作量來看，一定應付不來。

其實在這個星期，火某和同事Jim已經全力應付這單工程。但是這間家居設備店的分舖著實太多，而且Jim亦於下星期休假，所以，人手短缺的問題出現了。

但是，電腦開發商又財雄勢大，又不可貿然得罪。

於是，火某在電話中回答舊部門阿頭Jeff，說不可能推掉下星期的工程，因為會帶來極大的麻煩，Jeff說嘗試再安排吧，然後掛線

今日返公司交Timesheet時，經過Jeff房門口，他便叫火某入房。

「Crane, let me explain the situation to you, we have to get this job done by the end of March, AT NO COST! 」

不惜一切任何代價也要把這項工程於四月前完成，這麽嚴重？火某心想這張合同定是天文數字，甚至比電腦商的更大，所以亦不敢再次推搪，唯有要得罪姨媽到的電腦商，把工程延期。

看來，公司今次真是不惜一切地要火某硬食姨媽巾了。

丟架

初中時候，有位同學仔想挑戰老師，於是舉手企起身發問一D帶有留難性嘅問題，點知佢功力未夠，被老師指正番轉頭。呢位同學仔呢，就覺得好難落台所以要包拗頸死撐，同老師僵持咗好耐，拖咗好耐時間，而一眾嘅同學仔又開始議論紛紛，終於有一位同學嗌咗句出嚟：「喂，你講聲sorry跟住坐番底咪算囉！」當時，全班男男女女同學都捧腹大笑。

「面，係要人俾；但係，架，係自己丟嘅。」

好同意周星馳呢句對白。人，有好多戇居嘢都係自己攞嚟出醜嘅。不過咁，邊有人一生出嚟就咁醒，識得寫個「醜」字吖？所以呢，出醜唔係問題，最緊要係知道自己衰乜同埋肯承認自己嘅不足，「哈哈哈」笑三聲輕輕咁帶過咪算囉，人哋見到仲會覺得你EQ高添。一味死撐東拉西扯又要扮有型有款有性格，咪自己攞架嚟丟。如果下一代又有樣學樣嘅話，咁就… 唉。D人成日話新一代嘅後生唔識禮貌目中無人，其實關佢吔咩事吖？罪魁禍首，其實咪係教育佢哋果班人，同埋一D懶有型嘅父母，囉。