楚楚動人

深夜時份，當我用緊電腦，我在乎果隻楚楚有時會走去我後面張梳化背枕上面瞓覺，好鬼可愛，呢隻貓貓真係好黐人。

大約四年前，我去接小虎返屋企時，順便响breeder間屋睇吓其他貓仔。當時，正當其他貓仔周圍攪攪震嘅時候，有一隻白毛橙紋嘅貓仔好靜咁走咗上我大脾度坐。我問breeder有關呢隻貓嘅嘢，佢話呢隻貓大過小虎廿幾日，係佢响另一個breeder度買番嚟配種嘅。由於呢隻貓好乖，所以對佢印象好深。呢隻貓，當然係楚楚啦。

「好啦楚楚，我要帶小虎走啦，同佢講聲拜拜啦好無？小虎呢？走咗去邊呀…」

「砰！」

「……」

响果日同楚楚道別後，我就無再去探過佢，只係响breeder個網頁度睇佢啲相。後來楚楚生咗一竇貓仔，好靚架佢哋，有一隻仲响幾個蘇格蘭摺耳貓貓展中大出風頭。做呀媽嘅楚楚，都可算老懷安慰囉。

我知道，breeder通常都會响貓女三歲嘅時候俾佢退休，幫佢揾番頭好人家，等佢可以安享晚年。當楚楚兩歲半時，我就聯絡breeder話希望楚楚退休後可以收養埋佢，始終，我仍念念不忘當年既天真且儍嘅佢坐過我大脾仔，我覺得同佢係有點點嘅緣份。

愛貓嘅人，大多都會提倡去愛護動物協會度領養貓貓。當年未決定買小虎之前，我曾流連愛護動物協會無數次，最後睇中咗一隻三歲大嘅灰毛貓。當我申請領養時，協會個審批員因為一個好白痴嘅理由拒絕咗。當我搞掂咗呢個白痴理由嘅時候，隻灰貓又俾人領養咗。一氣之下，我就走咗去breeder度睇貓，卒之買咗小虎返嚟。

幾個月後，breeder拎咗楚楚去做絕育手術，之後我就帶咗佢返屋企。當時嘅楚楚，又瘦，毛又疏落，鬼咩，同十幾隻貓一齊爭食，想肥想靚都幾難。楚楚嚟到後，慣性好明顯同小虎唔同。小虎三餐定時，滋油淡定。而楚楚呢，隨時行過貓兜就食，食得都幾擒青架，梗係當時迫出嚟嘅慣性啦，食得慢？等聽朝啦呀姐。

依家嘅楚楚，已經唔會坐人大脾囉，佢只係會跟住人周圍行，享受人撫摸佢，但抱抱就唔得，不過佢永遠都唔會攻擊人，純到死。有時當小虎發脾氣時，會追住佢通屋走。一日食好多餐，仲會食到啲糧周地都係。不過，佢確實係靚咗，毛又厚咗鬆軟咗，而且身體仲日漸膨脹。

「楚呀楚，你又食嘢？你睇吓你，肥到襪都著唔落啦（註）！」


註：「肥到襪都著唔落」出自賭王何生，用嚟形容地產商嘅財政狀況。