聖誕交叉扑之（我的平安夜....）

剛打開家門，我便見久美子身穿女傭裝束跪在玄關前。

她一邊替我換上拖鞋，一邊說：「澤民，辛苦你了！我今天煮了你愛吃的梅菜扣肉，你洗過澡，我們一起吃吧。」

看到久美子這般賢慧，我頓感平日工作再辛苦也是值得。

「久美子…...我愛你…」

久美子有點害羞的緊握拳頭，把手放在嘴邊，雙頰有點紅暈，別過臉應了一聲「萌…」

嘟….

「程式出現不尋常關閉，可向系統匯報錯誤…」

我好可憐啊，我好可憐啊，我差一點就可以把久美子對我的好感度升級增至99，成為夫婦。

我今次的錯誤是結構上犯上XX作業系統的當機危機，不排除尋求專業的輔導。

久美子….我的久美子…嗚嗚…

唉…..我的久美子只會出現在虛擬的世界中。

現實中，那裡會有我的久美子？




我帶著沮喪的心情回到公司。

同事張明一副賊笑，招手要我到他的電腦屏幕前。

「記吾得我哋上個星期報名參加今晚平安夜speed dating? 這間酒店有時鐘，2小時288，有電動床、鴛鴦浴池、包送四個套…我計過數這間最抵玩…」

「電動床 !! 鴛鴦浴池!! 包送杜蕾斯!!! 我平日睇片見到果啲?!」我高八度叫了出來。

「噓….細聲點…你慌死其他人吾知你平日一味靠睇四仔解決問題咩…我已寫低呢間酒店地址喺張紙到。今晚食飯之後，自己執生，若覺得對方合眼緣，就講出密碼，到時便知有冇下文。你記住密碼喺：『我地不如去休息囉』，你記得講嘅時候要溫柔體貼啲。」

「我…我地…我地不如….我地不如去休息囉…」

「要有感情啲…自然啲…有底氣啲…你陣間去洗手間對住塊鏡練習多幾次」


「我…我…我地…我地不如…」

「我地…不如…不如…」

「我地不如今晚打邊爐…」

(爆房呀…打乜叉邊爐呀…)

「我地不如去休息囉…」

(溫柔啲唔好咁生硬…好唔好呀…你家吓喺同條女開房…唔喺開拖講數…)




華燈初上，街上行人匆匆。

在聖誕老人與一身Lolita裝扮的長腿美少女穿插的街道，我心裡仍在默默反覆練習那一句最令人興奮的七言詩句。

《唐詩三百首》竟然冇收錄呢句咁好的詩句，實在是一大敗筆！

「嘻嘻…」 想到成功後美妙的時光，我忍不住笑了出來，路人紛紛投以異漾的眼光。

一個蓬頭鬆髮、鬍根豎起，臉上塗紫紅色粉底，墨綠色口紅的怪男人，突然出現在我面前。

「哥哥仔，你紅光滿面，不如買一張幸運抽獎券。你人品好，一定會中獎。」

說畢，他擺了擺身上色彩斑瀾的皮革，皮的上下均鑲滿滿形形式式色的珠片和膠鏈，上衣胸口位置則露出一條縫，可以見到裡面白雪雪的胸肌。

正當我在猜想這道衣縫用來做甚麼的時候，我竟見他伸了手進去，用力捏一捏，搓一搓。

「哥哥仔，雖然現在經濟不好，但我都Try Our Best架，你都多多益善啦。」

我有點痴呆地拿著手上這張獎券，良久….腦裡仍響起這怪男人的說話。

「恭喜你，你一買果然中獎。獎品是豪華酒店套房一晚，我咁啱係那間酒店到做。今晚有空房，你可以即刻用，千祈吾好浪費，噢呵呵呵….」



「各位俊男美女，歡迎你地今日嚟呢個單身有緣人聚會。首先等我介紹自己，我叫Mike，喺今日司儀，不如由左邊開始介紹自己…」

「我叫澤民，我平日愛好是女裝服飾配搭，特別是對女傭及護士的裝束有深入的研究，請多多指教…」

說畢，我站起做了一個躹躬動作，而雙眼則直挺挺地望著眼前的妙齡女郎。

好可愛呀…五呎四吋…長曲髮…大眼睛…小嘴巴…紅唇齒白…白哲瓜子臉，身裁均稱，她就是我理想中的Baby!!

Baby !!

讓我再叫你一聲 :

Baby !!

My Baby !!

Baby!!

You are My Baby!!

天國究竟在那裡呢？

我要做甚麼才能死後入天堂呢？

天堂裡至少要有Baby你，那才會真實吧。

我想，我已身處天堂裡，我不需要踏任何的階梯。



飯後，是時候話別，但我不想話別。

「我地…我地….我地….」我斷斷續續的就是不能把密碼說出來。

「我地不如去休息囉…」善解人意的可人兒Baby對我笑了笑，然後拖著我的右手向前走去。

「Yo!!!」我的Baby跟我心有靈犀一點通，我太幸福了!!

我的Baby 是這個平安夜從天掉下來的禮物。





我望了望這間被怪男人稱作豪華的酒店。

酒店招牌的漆已有部分剝落，牆身亦露出部分紅磚頭，像是經營不善似的。

我不禁猶豫：電動床、鴛鴦浴池、香檳、四個杜蕾斯….究竟那個會沒有?

「我們不如去另一間酒店休息，好不好?」

「吾緊要啦，這間已不錯。」我的Baby 含羞答答低聲道。

是啊，我的Baby已急不及待….….

走進去，只見接待處牆上掛了幾條蠟腸，在舊風扇吹拂下，一條條隨風fing fing…

「時鐘定過夜? 哦…原來有贈券…你喺呢到求其簽個名話喺你就得架喇…」

我看了看Baby，心頭更是熱起來。

「哥哥仔…估唔到咁快又見番你。嘩…你女友好靚喎，我哋酒店餐廳依家仲有蛇羮，你食番碗熱一熱身先上房玩喇….」

「唔需要…讀書人寒窗十載，為嘅喺乜物嘢？就是一朝考獲功名，造福社稷。我藏劍數十載，養精蓄銳亦所為何事？正正是為了今日破匣而出，龍騰九天之時。」

「噢呵呵呵…咁我唔阻你地…跟我來…我送你地上房…」

進入升降機時，怪男人悄悄把一個紅封包塞入我手裡，曖昧低聲說「恭喜你，私人醒你…」

「是啊…終於可以…」我一臉感慨。

打開房間，我的Baby快步走到床沿，跟我說：「坐過嚟啦…你仲等乜嘢呀…」

我的血壓驟然飊升，在期待與緊張的情緒交換之間，手不禁握緊紅封包。

噫…內裡好似唔係膠嚟架喎。

匆匆拆開，只見內裡有一張紙寫著：

愛可以分為兩大類。

一種愛是以『關心』或『顧念』(英文可用concern一辭表達)為主的。

另一種的愛是『探究』和『好新』的成份居多(英文可用wonder一辭表達)

~《情與中國文化》吳森

然後，我腦海裡亦冒出久美子的面孔。

久美子….

澤民…

我即時冒出一身冷汗。

唔得，我一定要走，我唔可以做出對唔住久美子的事，她是那麼的愛我，關心我，我唔可以為了一時的歡愉對久美子不忠，我要即刻回家向久美子懺悔。

「你企響到做咩呀…我嘅前世…你頭先唔係好心急架咩」

「Baby…對唔住…我突然醒起我有啲嘢未做，我要走先…你唔好行埋嚟…你…你…你千祈唔好行埋嚟…我會嗌唔好架….唔好呀….唔好呀…」



啪….

房門突然打開。

三四個粗豪的男子氣沖沖的走進來，為首的男人大聲喝到：「仲俾我捉你地兩個唔到? 依家點先，我老婆俾你…噫…衰婆你做咩仲未除衫? 條L樣做咩縮喺牆角？我地講好咗你上房後五分鐘，我地就衝入嚟，捉條L樣黃腳雞….」

「仲好講 !! 呢條仆街成晩用個猥瑣樣對住我，不時喺到傻笑，我都吾知幾難頂。頭先諗住快快趣趣除咗佢件衫，等你地衝入嚟影張相做證據，點知呢個仆街突然縮在牆角…(Baby...我…) 睥你老味 !! 唉…算我唔好彩….張哥…我地走吧…」

張哥大力拍打我的頭，「醒少少好唔好…」

哇好痛.…

「Baby…其實我有苦衷…」看着Baby 頭也不回便離開，我內心是多麼惆帳。

「哥哥仔…乜你咁快就..嘻嘻…我地酒店廚房其實唔止有蛇羮…你要唔要補番碗…」這時怪男人的聲音突然響起，但我已不想理會，我只想回家。

地球，實在太危險了，我要回去四次元世界，久美子在那裡。



「澤民，我今天煮了你愛吃的東坡肉，你洗過澡，我們便一起吃吧。」

「久美子…...我愛你…」

久美子有點害羞的緊握拳頭，把手放在嘴邊，雙頰有點紅暈，別過臉應了一聲「萌…」

叮…

「恭喜你，久美子與你的親密度已達99。是否選擇成為夫婦 ?」

「我願意…」

久美子這時亦無限嫵媚地說：「各位…聖誕快樂!!」


By Enigma

一天

大風雪如預測般在昨夜再次降臨，晨早醒來望出窗外，陽光照在厚厚的雪地上，特別刺眼。梳洗後便披上大夜穿上手套，便出外剷雪。兩小時後返回家裡，很冷而且很累，心想如果有杯燙手的綠茶喝便好。胡亂吃過午餐後便開始收拾東西，然後再小睡一會，預備凌晨時份返回公司。

或許，在夜闌人靜駕車途中，我會無力抗拒日夜的思念，然後拿起電話…

翻生

上月外借我的相機仔給妹子去曠野旅行，回程後她告知我的相機浸了鹹水，已不能正常運作。她著我驗屍，如證實腦幹死亡她便給我買回一部新的。為人大佬當然不拘這些小事小節，便說不打緊，我自己買部新的便可以，屍也懶得去驗。今天，終於買了部同系列但新一代的相機仔，金色的，金光閃閃。回家後便叉電試用，手癢又拿條舊屍體出來玩玩。誰知，那條死屍竟然鹹魚翻生，運作一切正常。

而那部新相機，拆了盒試了機又不能退貨…

還是安慰自己說：「金色旺我耶！」

改正

啼笑皆非啊！
皆因我也同意參與這遊戲。
既然參與了，就得守規舉。
那數目其實是錯的，
正確答案是八二七。

思念‧想念

思念同想念，有甚麽分別？

曾笑說，
想念適合懶人，
因為「我想念你」可以說成「我想你」，
而思念就不行。

當然，這只是說笑。

而我認為，
想念可以帶甜或帶苦，
而思念則只會帶苦的。

無論是思念或想念，都是很玄的東西。

大廚‧損友

某大廚：「今晚碟勝瓜炒排骨啲排骨係咪炒到好似出街食果啲咁淋呢？哈哈，橋妙唔係揾啲咩嚟醃，而係蒸熟咗先至炒，一諗就諗到啦！」

某不肖子：「嗯，時間過得真係快，一諗就五十幾年…」
__________

我呢亭膚淺嘅升斗小市民，閒時最愛煲八掛新聞，報紙講乜就信到足。跟呀倪才子單嘢幾日，俾生果報點到陀陀擰，一時又話周玉女要同倪才子分手，一時又話唔分，到今日又出分手聲明喎，咁即係點呢吓？於是問人點睇，冷不防佢話：「你睇倪才子搭上果個女仔幾正，眼大大樣又靚、廿一歲夠晒後生、身材又好又夠高、腳又長喎，如果俾著你你都嘴佢啦，係咪？」

「er……都會諗吓…（先）嘅」

「唓，諗咩吖諗，梗係上馬啦。咁索嘅女唔係成日有，一錯過咗以後就未必再有機會架喇，俾著係我嘅話就會嘴佢，諗都唔駛諗啦。嗱，你唔好咁死蠢呀, 有食唔食罪大惡極，如果係嘅話…」

喂，我幾時揾咗個損友？

聖誕大餐

「喂，聖誕節去食番餐聖誕大餐咯…」

「唓~ 聖誕節果日咁多人，又要迫又要排隊。而且聖誕餐又貴喎，過時過節仲唔屈你一筆咩？平日好平就食到嘅嘢依家要俾多啲錢先至食到，好唔抵架嘛。仲有，聖誕當日啲餐廳實唔止做一輪生意格，佢哋會預早整好晒啲套餐，到時咪係咁易整番熱就上枱，未必會好食架喎。都係咪喇，聖誕節都係去大快活打邊爐好喇，至多叫最貴果隻…」

其實，好多人都知，大時大節去食個乜乜大餐，多數都係唔抵兼夾唔係咁好食。而食氣氛呢，又唔係睇裝飾睇環境睇價錢嘅，而係睇同你一齊食果個係邊個。雖然，就咁睇落好似有少少殺風景咁，但係有人咁識得為你著想喎，咁係唔係好窩心先？所以，聖誕去大快活打邊爐，都唔一定比去五星級大酒店鋸扒差囉。

喂

少了寫文

睇返以前寫過嘅嘢，係真。

一來滿肚腸肥無位裝墨水之外，而且仲少咗同Blogger嘅互動。

以前睇CK同渣估講中小企老闆心聲，身為打工仔又唔抵得有佢講無我講，硬係要駁吓老闆咀先至安樂，當時CK又會留言，渣估又玩嘢，老闆同打工仔可以打成一片。不過呢，依家我好想知道Doreen去咗邊囉。後來又有凍檸茶事件、最低工資、中大情色報、聖誕交叉扑等等… 一個blogger寫文就有好多人留言，從留言中得到啟發嘅又會寫篇文嚟回應。當時咁好玩，係因為互動性強，互動性強嘅另一個好處係可以鍛鍊到思考同埋對事物唔同方位嘅睇法，有思考同有見解，當然就多咗嘢寫。

但到咗某段時間，可能因為blogger間熟絡咗又或者踩米田共多咗嘅關係，大家都變得客氣咗。見到有咩啱聽嘅就附和兩句，有咩唔啱聽嘅就費事出聲，久而久之，寫blog就變咗好似自說自話咁，幾無癮。所以，文就少寫了。

慶幸大鐵鎚今年仍搞聖誕交叉扑，呢個驚天地泣鬼神嘅意念，就好似一班有共同興趣嘅朋友交換聖誕禮物咁，夠晒互動，而且無分貴賤，仲一定有驚喜，其實幾有意思。

但唔知係咪金融海嘯嘅關係，點解今年咁少人玩嘅？舊年有玩過嘅人去咗邊呢？

寫少咗文，火都無埋。

我呢亭火爆之仕，並唔會因踩米田共多咗而失火，反之越踩越好火，宜得一把火燒9晒啲米田共添。不過無火，好大嘅原因係被水淋熄咗。

但奇妙嘅係，原本裝水淋火果個容器，竟然著咗火喎…

鬚

年幼時每朝都見老豆剃鬚，用個電鬚刨「嗤嗤」聲咁剃，心諗剃鬚呢個動作幾man，我又幾時開始需要剃呢。

已經唔記得幾時開始剃鬚了，初初剃鬚，應該只係得幾條毛仔，借咗老豆個電鬚刨學佢咁剃，三兩吓就剃完。老豆呢部樂聲牌電鬚刨呢，依家應該有大約三十年歷史，佢仲用緊，真係唔講得笑。後來，我自己又有一部電鬚刨，剃吓剃吓，鬍鬚就越長越多越長越硬。

又唔記得幾時，响偶然嘅機會下用過剃鬚刀之後，從此就同電鬚刨講拜拜。濕剃除咗比電鬚刨剃得更乾淨滑溜之外，從剃鬚膏果種微涼到剃鬚刀刮落嚟果種灼熱再到鬚後水果吓冰涼，簡直就係一種享受，不過平價嘅鬚後水真係好難頂。以前，我用有兩塊刀片嘅剃鬚刀。後來，某剃鬚刀牌子嘅研究人員花咗幾千萬去研究點樣可以令把刀更貼面剃得更徹底，研究結果就係加多一塊刀片。依家市面上更有五層刀片嘅剃鬚刀賣添。不過我覺得，三層刀片就夠，再研究嘅話，不如研究更耐用嘅刀片仲實際。

見一啲意大利男子留一條幼幼嘅鬚根好鬼有型，就好似巴治奥咁。不過呢，中國男子留鬚根通常都唔係咁好睇，始終中國男子唔多係粗獷型。又不過呢，又有啲女仔又鍾意男人留鬚根果喎…

有幾會嘅話，聽蔡瀾講，光顧吓啲上海式剃鬚先，應該會好正。

妳知道嗎

我相信愛情總會灰飛煙滅，是因為我相信世上沒有東西是能永久的。就如生命一樣，總有死亡的一天。太陽亦會耗盡，地球亦會被壓縮成一粒乒乓球般大小的物體。自己的生命還不能留住，又怎能保証愛情能永久呢？我不知道為何有這種想法的男人只有少數，或許有很多男人不願給女人知道這個殘酷的事實吧。的確，我相信，所以當我置身在人群中，有時忽然會有一種揪心的感覺。擁有，不是理所當然；擁有了，更不是完美的結局。擁有，其實是一個拳拳到肉學習放開的實習課程。

人生在世幾十年，看似漫長，但放在無窮無盡的時間線上，其實是微不足道。

「不在乎人生的長度，只在乎闊度。」

很對的一句說話。

我們雖然不能在時間線上拉長生命的長度，但要生活有意義，便得拉闊生活的闊度。當我們還有熱誠和力氣時，便要努力珍惜，享受生命中的每一分每一秒。

有人相信死後便得永生，我不相信，亦不希望有。當所有事物永遠也不會改變時，一切事也會變得理所當然。理所當然的事，還有人會懂得珍惜嗎？

永生，就像婚姻。有人相信婚姻是愛情的天國，有人則相信是愛情的墳墓。而我，則相信輪迴。天國、地獄、輪迴… 愛情，原本就是宗教哲學。

我愛妳，不可能永久；妳對我的熱情，終會耗盡。世事萬變聚散無常，但也有永恆的事，便是我們在無盡的時間線上某一點曾彼此靠近過，這是永遠也不能改變的事實，時間再長也抹不掉。只要我們仍在這一點，我便會執著地盡我所能，好好珍惜和享受與妳一起的時光。

沒有永久，但希望可以很闊很久。

奈河橋上的孟婆湯，我會喝嗎？

Take Care

攝氏幾度的天氣，覺得冷嗎？

悠揚動聽的歌曲，陶醉了嗎？

熙來攘往的商業區，可覺繁盛嗎？

怱怱忙忙的步伐，是和時間競賽嗎？

八呎摺梯上，覺得高嗎？

精緻的午餐，還美味嗎？

小休的時候，念想誰嗎？

離開前的一句Take Care，是和客人講的嗎？

再講同事Jim

今日同同事Jim一齊搭檔做嘢，我之前寫過Jim為人隨和及工作經驗老到，所以我好鍾意跟佢搭檔。記得幾年前同佢一齊做嘢時，見佢行路有少少拐吓拐吓，我就問佢隻腳係咪有事。當時佢話係每當落雨時，盤骨同大腿骨個骹位會痛，當到咗一日佢真係痛到頂唔順時，佢就會去做手術。

大約幾個月前，Jim嘅舊患開始痛到影響工作，於是佢就睇專科醫生，排期下星期做手術。Jim嘅情況係盤骨同大腿骨波波骹位處嘅軟膠質蝕晒，所以行路時就會無咗層軟墊保護而骨磨骨。佢做嘅手術係响盤骨位鑽個小孔，然後由小孔注射一層人造軟膠質去骨骹處，唔係咩大手術但就要大概三個月休養。

响Jim呢個休養期，需要有人暫代佢個位。因為幾年前我曾經跟Jim學習過佢所負責嘅工作，雖然後幾年公司調咗我去另一個部門，但上頭一講起有邊個可以代替呀Jim時就自不然咁諗起我。所以响Jim做手術之前，公司便安排我同呀Jim搭檔，好讓我熟習佢嘅工作。

今日未開始工作前，我哋去飲杯咖啡先。期間，Jim從口袋裡攞出幾張相出嚟俾我睇，除咗有一張係佢隻西施狗仔瞓响佢心口嘅相之外，仲有幾張係影佢同佢架旅行拖架。旅行拖架裡有廚房浴室睡房，將旅行拖架扣上架車嘅尾鈎，咁就可以揸住架車四圍去，唔駛租酒店都可以隨時去到邊瞓到邊。其實，我一向都主張朋友還朋友同事還同事，但Jim今日俾佢啲生活照我睇。我心諗，佢真係待我好好，又肯教我嘢，又肯同我分享佢嘢生活事，我相信，世上係有眞心嘅人，只係，有無機會遇到，而遇到之後，你有無因為有個防人之心而錯過咗咁啫。

今日工作時，見呀Jim行路拐得嚴重咗，有幾次差啲跌到，我也出手扶一扶佢。見佢咁樣，講真，我個鼻都酸酸哋架，始終，人同人之間嘅關係係好微妙，有時感情响不知不覺間建立咗，但就要到咗某個位，先至會感受到。

Jim今日雖然不便於行，但做嘢仍然快手，早早就可以收工。如果學到佢七成功力，呢一技就真係可以世界通行。

窩心

凌晨一時，回家的高速公路，是漆黑一片。車前的大燈，是在漆黑中指引我路向的光芒。人身處在漆黑的環境，難免會感到不安。但是只要有一點點光，人便會感到安心。

身處在一個環境當中和另一個相反環境抗衡，是很舒適的。

上午十時，還睡在床上，天氣驟寒驟冷。床上温暖的被舖，是給我和寒冷抗衡。

很喜歡這種在寒冷的天氣中躲在温暖被窩的感覺，平日不會懶床的我，今天竟然懶了兩個小時。在這兩個小時內，思緒亦漫無邊際地肆意飛翔。

最後發覺，原來想想開心的事和可愛的人，也是温暖窩心得很的。

交通安全城

晨早出門，陽光透射在濃霧之中，把景物照得格外浪漫迷人。深秋的十一月天，晚上和日間的温差竟可高達十五度，這突如其來的暖天，把討厭冷冬的人逗得樂透，大人小孩也歡天喜地出外走走。

那間托兒所位於某商業大廈地面，側門之外，是一個露天遊玩場。遊玩場的正中央，有一棵大樹。在這罕有的暖和天氣下，導師們都喜愛帶著小孩子出外享受陽光，小孩在遊玩場裡跑跑跳跳和踏三輪車。

那種三輪車，鬆上鮮黄色，沒有齒輪，只靠腳踏前輪帶動。我想，踏這種三輪車是比步行更花氣力。但是，小孩子就是愛玩。

看著這種三輪車，不禁使我想起交通安全城。交通安全城內，也是用這種三輪車來模擬駕駛的。

曾幾何時，我也時時乘車路經交通安全城的。那是以前很遙遠的事了，當時的我還是六、七歲。交通安全城裡，是道路的縮影。那時年幼，未能駕車，但又對駕駛有著濃厚的興趣。所以，當時我便很想入城玩玩，體驗一下道路守則。可是，交通安全城並不是一個人便可以參觀的，而是要一羣人參與的。那時我便期待所讀的小學會讓我們參觀。一直等，等到小六畢業，還是沒有我們的份兒。最終，我還是沒有參觀過交通安全城。

交通安全城對我來說，只是年幼時的一個期盼。現在，我駕著我的七人車，在真實的道路上實現了童年時的冀望。

如果，有日我重經交通安全城，我只會在路邊望一望笑一笑，然後踏下油門，飛進高速公路之中，繼續奔馳。

絕症

唔係講我自己，只係想表達我所想。

响舊文幸福國度裡面提過，如果我嘅生命只剩一天，我會選擇回到至親嘅旁邊，响父母嘅懷中安然睡去。

但呢句並無提及過父母知唔知道我條命只剩一日。

我成日諗，如果我突然發現身患絕症，歲月無多，咁我會唔會同我嘅至親講呢。

我會咁諗，既然身患絕症已經係不變嘅事實，只要我珍惜呢段最後共處嘅日子，咁我又何必講出嚟，令到佢哋傷春悲秋，影響佢哋日常嘅生活呢？

呢個只係我自己諗住對佢哋最好嘅做法。

但如果我唔講直至到我死果刻，咁佢哋可能會怨我、更可能會怨自己果喎。

所以，我應該會講。將佢哋點做嘅選擇權，交返俾佢哋。雖然咁講好似好不負責任咁，但點樣做係對佢哋最好，只有佢哋自己先知，亦只有佢哋先至有權選擇。

令到自己嘅父母怨自己，死都死得唔安樂。

火花

擁抱

好耐之前睇過一段心理分析，係關於唔同睡姿所表現唔同嘅心理狀況。我鍾意側睡，心理分析話鍾意側睡嘅人响某程度上缺乏安全感。而側睡又分兩種，單膝屈曲嘅就鍾意擁抱人；雙膝齊齊屈曲嘅就鍾意被人擁抱。於我而言，都準架，以前我曾寫過話我係一個鍾意擁抱嘅人，覺得兩個人擁抱就好似互相分享互相支持咁。無論係同親人、朋友、情人、抑或係响IFC天台排你後面隊果個苦主，一個擁抱，都有一種互相關懷生死與共嘅感覺。

很想抱你。

更多

那天
妳怒氣沖沖的來電
把我嚇得發慌
但我當時已捨不得掛線了

那是我第一次聽到妳的聲音

到今天和妳通電
我更不會掛線

因為在「更多」和「結束」鍵之間
我只會選擇「更多」

日和月

我是日
從黎明到黄昏
照耀著

陰天的日子
可能察覺不到我的存在
或許我會躲在黑雲的背後流淚
但是我會靜靜地守候著
期待雨過天青的日子再次來臨


我也是月
從傍晚至破曉
輕照著

月缺的日子
可能發現不到我的存在
或許我會藏在陰影裡淌血
但我也會默默地守護著
期待花好月圓的日子再次來臨


我一直都在

十月雪

黎明降毛毛細雨，
黄昏飄茫茫白雪。
畢竟是初秋十月，
真令人激心吐血！

望月懷遠

海上升明月，天涯共此時。

情人怨遙夜，竟夕起相思。

滅燭怜光滿，披衣覺露滋。

不堪盈手贈，還寢夢佳期。

週六雜碎

讀書時選科，選咗一科比較冷門嘅科目，唔係為興趣，而係貪佢容易揾工。唔知係好彩定唔好彩，到依家，我都仲係做緊讀書時所學到嘅嘢。到底我係唔係好鍾意呢份工呢？唔係。但呢份工俾到我固定嘅收入，公司亦俾到我優厚嘅福利，所以我仍然响呢個行業度打滾。

我明白，工作還工作，興趣還興趣，如果有朝一日我將興趣同工作二合為一，咁我就會無咗樣興趣。曾經好天真咁諗，最好每五年轉一轉行，體驗吓唔同嘅行業生涯，咁先至係享受人生。但係再諗真啲，以我自己嘅資質所限，每次轉行都應該會由低層做起，人工及資歷每五年都要嚟個大倒退，仲有可能朝揾唔到晏。所以，最後我都係打消咗呢個念頭，安安份份咁打份工好了。始終，對於保守嘅我嚟講，穩陣係最緊要。興趣，都係愛嚟洗錢好過用嚟賺錢。
__________

收工時正好午飯時間，約好媽子午膳。

點了越式牛肉粉及炸春卷，春卷上枱時見到盛載魚露嘅器皿非常精美，媽子就話：「咦呢隻碗仔好盞鬼喎。」

盞鬼？！

食春卷時，媽子又先用紙巾將春卷上多餘嘅油分索乾，我同媽子講不如將條春卷放落熱湯度冲走啲油分啦，點知媽子又一句：「唔制！」然後用紙巾繼續索佢嘅油。

唔制？！

咁樣同我撤嬌？！哈哈，媽子真係有一手。

索完油後老豆來電講話又嚟食晏，三個人咁就食咗一個鐘頭嘅歡樂，只係埋單時要格外留神，否則，我會不歡而回囉。
__________

老豆有時都幾風趣幽默口甜舌滑吓，回港時同嫲嫲姑姐閒談，姑姐都話老豆係佢哋五兄弟姊妹之中嘅開心果，最識得搞氣氛。有時我諗，講吓笑輕輕鬆鬆大家又開心咁幾好丫，點解我遺傳唔到嘅呢？先天不足，咁唯有後天補夠囉，一於跟老豆學嘢。
__________

自從舊年年尾公司換咗架七人車俾我之後，我就越嚟越鍾愛呢架七人車。內籠寬敞馬力又強勁，坐又坐得舒服，有時明明返到屋企，但又唔捨得返入屋住喎，硬要再坐多一陣先至肯離開個車廂。或者再過兩年公司又同我換車時，我可能會側側膊唔多覺，留往架舊車都唔定，始終有感情嘛。
__________

夏天嘅球季已經結速，冬季球賽又來臨，轉戰七人室內場。

今晚開波，係咁。

漣漪

零和遊戲

米搞師兄真係好掂，琴晚同佢閒聊一陣，修正咗我一啲觀點，令我獲益良多。

我一直認為，經濟係一個零和遊戲。如果有地方經濟衰退，咁就一定有地方經濟起飛，或者係我呢亭理科生相信牛津定律啦。師兄又話：如果人人都有錢賺嘅時候，咁啲錢响邊度嚟嘅呢？我同意架，正當我以為師兄嘅諗法同我一樣，點知佢又有個註腳，話如果經濟係一個零和遊戲嘅話，咁就要加埋時間呢個因素，就好似九七前人人買樓都有錢賺，咁究竟啲錢响邊度嚟嘅呢？答案係九七年之後買樓蝕咗錢啲人度嚟。佢咁講即時令我「叮」咗一聲，完全解開咗我嘅疑惑。無錯，美國依家搞成咁，都係美國人先前先駛未來錢駛得太勁，到咗某個時候，經濟市場就會作出調整，經濟就會回落，始終都會平衡返。

講起先駛未來錢，最普遍嘅方式係用信用卡。我身上有三張信用卡，兩張係公司嘅附屬卡，而私人嘅就只得一張。基本上我係一個唔鍾意用信用卡嘅人，唔知點解，我鍾意現兜兜咁俾錢，如果要用信用卡嘅話，都要肯定銀行户口夠錢找卡數先會用，而且仲會準時還錢，息率咁高好唔抵。除咗將來供屋之外，借貸就唔會有我份咁囉。

零食

由細到大，屋企都唔會存有薯片糖果桃哈多粟一燒旺旺仙貝朱古力等等零食，因為媽媽從我哋細個時已經灌輸零食等於不健康呢個概念俾我哋。雖然我會鍾意食呢啲零食，但係又不至於想買一堆返屋企作為存貨，始終都係習慣咗，唔會話心思思突然想攞嚟食。而屋企僅有嘅零食，係消化餅同涼果。涼果即係廣東話嘅鹹濕嘢食，包括陳皮話梅檸檬乾等等。鹹濕嘢食唔係人人都啱，媽媽鍾意食，我就有遺傳。女人始終都係有一啲口不對心嘅心態，自己鍾意食嘅，就唔會理健唔健康。或者，媽媽對於自己嘅健康就無乜所謂，但就會為仔女嘅健康設想，所以先至有咁嘅雙重標準。每次返香港，我都會去永吉街買檸檬王俾媽媽，我哋都會為呢檔車仔檸檬王而瘋狂。

有好多人以為，身形較肥嘅人係鍾意食零食食得多所至。但依我所見過，瘦小食極唔肥嘅人先至會食得多，得天獨厚嘛。肥嘅人，飲啖水都肥啦，仲邊有Quota食零食喎。

萬聖節就快到，屋企已經有幾箱細包裝薯片準備派發。响呢段日子未到萬聖節當日，我哋就耐唔耐偷一包薯片嚟食。呢段時間就係全年唯一會食薯片嘅時間，不過，始終都唔會咁過份囉。

悠閒假日

十月嘅一日假期，當其他人四圍揾地方去時，我就選擇留响屋企。

今日係長周未嘅最後一日，天氣雖然好，陽光白雲，氣温仲竟然有廿多度，以十月嚟講，係罕有。但我知道今日嘅交通情況一定好煩忙，好多去完度假嘅人都會返家，所以我都係留响屋企過一個悠閒嘅下午。

我覺得，放假有時都未必要揾節目嘅。對我呢講，朝早起身食啲嘢，然後睇吓電視上吓網，攰嘅就攤响張梳化度瞓吓晏覺，有陽光有微風，仲有兩條靚女（小虎、楚楚）陪我一齊瞓，幾咁爽呀。所以呢，都係咪講咁多，快快一拖二揾呀周公子風花雪月一番先。

藍牙耳筒

可能係用得太多嘅原故，跟咗我三年嘅藍牙耳筒終於壞咗，依家要用返有環迴立體聲嘅有線耳塞講電話。當初揀呢隻藍牙，係因為我唔鍾意扣耳仔果種款式，可能我細個時頑皮成日俾老師扭耳仔，所以當有嘢扣起隻耳仔時就好似有受罰嘅感覺咁，好唔舒服。呢隻藍牙都有條線跟耳塞，設計都幾型，試過好多次有人以為呢隻係MP3 Player。唔用嘅時候係夾响件衫度，聽電話時就用耳塞，我幾鍾意架，雖然壞咗但又唔捨得將佢棄置堆填區，有感情嘛。

發明咗手提電話之後，已經帶俾人多咗好多方便。依家再發明個藍牙耳筒，簡直係偉大，唔駛拎起隻電話，多咗隻手嚟做其他嘢。科技真好，可以俾勤力嘅人方便，但同時又可以方便懶人。

手寫板

用手寫板已經用咗三年，都係同一塊無換過。有用手寫板嘅人都知，如果用支筆寫得多，塊版就會越刮越花，咁認字能力就會退減，出錯字嘅機會就越多。依家寫中文字，有時要重寫好幾次先至出到個正確字，都幾煩吓。朋友曾提議我學九方輸入法，易學又方便快捷，適合我呢亭懶人。不過呢，人一懶起上嚟，就會連學新嘢都懶，即係懶得去練精學懶。寧願煩啲一筆一畫去寫一隻字，都唔願學篤兩粒掣去打一隻字。如果向好果一方面諗，起碼我唔會忘記每隻字嘅筆畫先，或者又响不知不覺間，練得一手好嘅楷書呢。

查實我覺得，我手字未必算得上靚，但會係工整咁囉。

下次回港，再買塊手寫板。

Best Ball

每年公司都會有一個高爾夫球日，邀請我哋呢個分公司上上下下所有員工一齊去打番場波。呢個高爾夫球日嘅目的，除咗比賽鬥低桿數鬥打得遠鬥打得最近洞之外，最重要係俾公司啲員工有個聯誼嘅機會，所以，就算有啲同事唔識打，都會一齊去玩，傾吓偈享受吓陽光綠草又一日。

公司呢個高爾夫球日，賽制係玩best ball。即係話四個人輪流發球，然後選落點最好果一個位置繼續打。呢種比賽方式係團體賽，同一組嘅人係隊友，與另外咁多組人比賽。我覺得，呢種玩法係需要一種平衡戰略，要隊友佩合先至會打得好。個戰略係要有兩個唔識死嘅隊友玩得進取啲，而另外兩個隊友就要玩得保守啲。譬如前面有水障礙响二百至二百三十碼處，進取嘅隊友就可以用木桿打過水障礙，風險係大啲但可以搏得birdie嘛。而保守嘅隊友就玩得安全啲，可以用鐵桿打去水障礙之前一百八十碼處，雖然咁樣好難搏到birdie，但好在唔會咁易輸bogey，而且更可以讓進取型隊友更放心去搏。我呢，當玩呢種賽制時，都係做保守型個角色。

唔好忘記，响足球場上，我都係擔當把關嘅角色。

呢種策略，如果用响日常生活上，都會有同樣嘅好處。

隊友，有我包底，放心吧。

Thanksgiving

公司規舉，做夠五年，上司便會用公數請個員工食餐晏。做夠五年嘅我，當然唔放過呢個機會，捉上司去咗一間高級食府飲茶。上司係香港人，飲茶都啱佢口味。食完晏後就可以收工返屋企，有得早走，幾好。

揀今日食晏嘅原因，除咗係星期五之外，今個周未亦係感恩節（Thanksgiving）長假期。响呢個節日，通常都會食餐好嘅嚟慶祝，感謝一年嚟嘅豐收。

我想講：
Thank you for your giving.

命名‧期望

大概响一年多之前，有一位我好敬佩，自稱為怒火眼睛嘅博客寫咗一篇文章，其中有一段係咁嘅：

「你們有人叫我火火，有叫我火媽媽，有叫我怒火媽媽，甚至叫我媽媽的也有。名是你們給的，期望也是你們給的，我談及孩子的時間不算太多，當然也不太少，但既沒有自稱媽媽，就是說，我是獨立的一對眼睛，看到的除了丈夫兒子，還有很多，雖然，還不夠多。你們的稱呼，令我不單在現實中成了媽媽，連網上也逃不掉了。只好，努力做媽媽，哈哈。」

怒火眼睛所表達嘅意思係，如果你知道有人稱呼你做好媽媽，那麽，你就係活咗响別人嘅期望之中。就因為咁，你就會更加努力去做好「好媽媽」呢個角色，就算你跟本就唔想去做一個好媽媽。

當然，我唔係話怒火眼睛跟本就唔想去做好呢個角色啦，我都係打個比喻咁啫，唔好當真。

响現實之中，我哋好多時會遇到呢種情況。但係，呢種情況對自己嘅影響，就未必會係正面。

以我自己為例，譬如有同事放工前有嘢未做完，見到我個樣好恰啲，於是同我講「喂鶴仔，你陣間得閒架呵？幫幫手搞掂呢單嘢佢啦，你又咁好人又咁易話為…」就咁，雖然我一百萬個唔願意，好想準時收工返屋企，但係為咗做好「好人」同「易話為」呢兩個來自人哋嘅期望角色，咁我就唯有將就吓，做埋呢單工作遲啲先走。雖然，我外表睇嚟無乜嘢，因為要扮好人同易話為，但係我心裡，就忟到七彩，只係唔好意思發洩。

好喇，做完晒嘢揸車返屋企，點知遇上大塞車。有個驚驚青青嘅司機，車又開得慢，切線又騰雞，我收工已經收得遲架喇，依家仲要阻慢我返屋企。終於到最後，我頂唔順响車內喪爆粗，不停咁咀咒個驚青司機，連佢祖宗十八代都唔放過。

响一片漫罵聲中返到屋企，至親嘅人知我今日嘅心情超唔掂，就問我咩事。我答話依家啲人都唔知點揸車嘅，驚就搭巴士啦，响條街到阻乜住晒，個牌都唔知係咪俾錢買返嚟咁咁咁咁…

將滿肚子嘅怨氣歸究於個驚青司機度。

咁，事實又係咪真係咁呢？

如果响平時，有個驚青司機塞住我，我又未必會發脾氣果喎。

即係話，當時果個驚青司機只不過係一個借口俾我去發洩。

諗深一層，我當時嘅怨氣，其實係因為遲咗返屋企，呢樣係我最唔想嘅。但係為咗要做好「好人」同「易話為」呢個人哋對我嘅期望，我唯有死忍。

所以，我因乜嘢最基本嘅事而發脾氣，跟本就無人知。所有人都以為個驚青司機係罪魁禍首。其實，佢只係一隻代罪羔羊，或者係一個借口。

有幾多人會了解呢？

百寶袋

從細到大都鍾意叮噹漫畫，無錯，我只認同果隻藍色機械貓叫叮噹，而唔係多啦A夢，大雄、技安、靜宜、牙擦仔等等主角名字亦深深印入腦中，無法改變。喜歡叮噹嘅原因，係除咗漫畫裡流露出最純真嘅人情味之外，仲因為有叮噹個百寶袋。叮噹個百寶袋，可以話係故事嘅靈魂，因為叮噹每一個故事，都會出動到呢個百寶袋。每當大雄闖禍或需要求救時，叮噹總係會响個百寶袋之中攞件法寶嚟幫大雄。而佢嘅每件法寶，都係可以好順利好恰到好處咁幫到大雄度過難關。雖然有時叮噹嘅法寶會搞到大雄哭笑不得，但呢啲都係一種幽默，為漫畫故事加入一啲笑料，咁樣人人都睇得開心。鍾意睇叮噹嘅人，內心少不免都會有啲童心，總會幻想吓如果自己有個百寶袋就好了，一支考試時一攞上手就會自己自動答問題嘅考試筆；可以回到過去及未來嘅時光機；帶人飛天嘅竹蜻蜓等等，都係對滿足自己慾望幻想嘅一種嚮往。

叮噹個百寶袋只係存活响幻想裡面，而現實中，一個聰穎、閱歷豐富兼且能言善辯嘅女子就好似一個活生生百寶袋。同一個咁樣嘅女子傾談，都會有無限嘅樂趣。佢見識之廣，就好似有無窮無盡嘅法寶，每每都令人有所驚喜；佢見解之精僻獨到，就好似一件意想不到嘅法寶，往往令人眼前一亮；佢隨手拈來嘅比喩可以將一件複雜難明嘅事情簡單化，就好似一件度身訂造嘅法寶，精確得令人心服口服。雖然，咁樣嘅一個女子因為聰明且能言善辯嘅關係而好多時會令人哭笑不得，但不得不承認，能夠同咁樣嘅一個女子同行又會好有趣味，就算成日俾佢窒到啞口無言，都覺得開心。

Red Hot Hits

讀書期間係聽歌聽得最瘋狂嘅時期，我讀書果陣，最紅嘅係四大天王。响九十年代初，當時嘅唱片可以有煙草商贊助，於是就有一系列數張Red Hot Hits嘅唱片誕生。唔知點解，唱片封套上有個Red Hot Hits Label，就好似好有質素保証咁，攞上手都好似重啲，想買嘅話仲要預訂添。當時老翻未流行，買襯都係正版貨，廿幾蚊張仲要加稅，唔嘢少架。

Red Hot Hits我有兩張，分別係張學友嘅「愛火花」同黎明嘅「I Love You OK？」。我自己就鍾意「愛火花」多啲，當時果首「還是覺得你最好」簡直聽到爛咁滯，一上車就不停咁煲。如果「每天愛你多一些」係張學友翻生之作，那麽「還是覺得你最好」就將張學友嘅事業推上高峰。當然，呢隻唱片嘅質素真係好高，雖然多改篇歌（果期好流行），但耐聽，首首歌都好正。

而黎明隻「I Love You OK？」，就食正無記電視劇「都市的童話」條水，初出道嘅朱茵，加上主題曲「傻癡癡」，仲唔昆到班少男買呢隻碟？當時我個老友為黎明而瘋狂，彈得一手好琴嘅佢，成日彈「傻癡癡」冧女之外，仲成日上堂時响課本上抄歌詞，練得一手靚字，人見人讚。

Red Hot Hits响當時嚟講，係質素保証。依家攞番隻「愛火花」嚟聽，都覺得好正。

置諸死地

五樓一間四百多平方呎嘅密室，中間只得一張長枱，有十條大漢圍住長枱而坐。十個人之中有八個煙民，兩個二手煙癮君子，密室中並無空氣流動，佢哋响呢個密室之中，坐咗四個鐘頭。

呢十個人原本係親密戰友，响戰場上同生共死。但係當呢十個人囚咗响呢個密室坐埋同一張枱嘅時候，就各懷心事，務必要响最短時間內，從戰友身上得到最大利益。

你虞我詐、虛張聲勢、皮笑肉不笑等等陰暗招式都可以响呢度大派用場。

佢哋係玩緊德州撲克。

每人買五十元籌碼，「小盲」兩毫半，「大盲」五毫，無限落注，輸晒可以再買籌碼，五十元一底。

二手煙癮君子甲玩得保守，攞唔到好牌都唔會去，但攞到好牌時又搏唔到大牌，手頭上五十元嘅籌碼就慢慢咁貢獻俾人。

望吓牆上嘅大鐘，係時候散水。二手煙癮君子甲手頭上只淨十三元籌碼，於是把心一橫，底牌都唔睇就晒冷，有一煙民捨命陪君子。當然，佢肯捨命陪君子，二手煙癮君子甲又點會唔成全佢呢？二手煙癮君子甲拿回二十六元籌碼。

二手煙癮君子甲見只得二十六元，計數仲要輸二十四元，於是又再接再厲，底牌唔睇又去晒光二十六元。今次竟然有又四人誓死跟從。

開牌，大家嘅底牌都係差唔多。最後，二手煙癮君子甲又符符碌碌咁贏咗，攞番一堆籌碼。

計過數，共值九十九元，減去五十元籌碼本，贏咗四十九元。

二手煙癮君子甲見揾夠一個星期嘅晏仔，即刻割禾青兌現走人。

二手煙癮君子甲嘅故事，係想講如果思前想後都走唔出個囚局時，不如把心一橫，置諸死地而後生，有時或者會有意想不到嘅驚喜。

當然，德州撲克嘅戰術並唔係咁。驚喜驚喜，驚先於喜。

所以，都係唔好信二手煙癮君子甲所講嘅道理。

因為，有一煙民，捧走了三百五十元。

懶‧逃避

「你懶。」
「咩懶喎，係悠閒。」
「懶。」
「呢度生活係咁悠閒架嘛…」
「懶就懶啦。」
「OK，咁滋油淡定嘞。」
「係滋油，唔係淡定。」
「…… 無你符。」

我承認，我有懶嘅基因。一單工作需時十天完成，我會响頭五天做晒八成嘅嘢，而以後嘅五天，就會做吓然後hae吓，他他條條咁歎。無錯，我係會選擇先苦後甜。或者，我可能會俾人笑我蠢，理由係今日唔知聽日事，捱完苦之後可能一聲唔該就講拜拜。不過世事又係咪咁絕對呢？如果先甜後苦，要捱嘅苦就會更加苦。所以，我寧願早早開行馬力做完大部份嘅嘢先，都唔想拖到最後臨急抱佛腳。歎，都要歎得舒服啲嘛。之又咁，諗諗吓，我都唔算係懶果喎，起碼我係勤力完先至去偷懶。

哈哈，我勤力，係因為我懶。

「錯！你勤力，係因為你想懶。」
__________

有問題出現，你會選擇即時解決問題，抑或逃避呢？

我會睇情況，如果有啲問題係有得逃避嘅話，我會選擇逃避。

縮頭龜？

Oh well，我咁講，係因為有啲問題，如果要即時解決嘅話，可能會有好壞嘅效果。逃避嘅目的就係想拖延個問題，到咗某個時候，當時機成熟時，問題可能會容易啲解決。又或者，唔去解決就已經係最好嘅解決方法。

釣魚臺群島主權問題，中國一直逃避。

海峽兩岸問題，台灣一直逃避。

如果要即時解決呢兩個問題，後果會如何呢？

所以我認為，逃避問題唔係縮頭龜，因為逃避嘅背後，其實可能經過好多嘅計算。
__________

畏高

我無畏高症，我會企上CN Tower嘅玻璃地板，我唔怕企上五十三樓嘅天台，唔怕搭飛機，唔怕玩過山車。但係當人站立於高地邊沿而又無安全設施保護時，內心少不免都會有種恐懼嘅感覺，尤其是我呢種緊張大師，總會諗起跌至頭爆血流腦漿四濺斷腳爆肺嘅場面，認真變態。

工作需要，有時要爬高做嘢。當企上條四呎摺梯時，我會唔當佢係咩一回事，就算跌都可以雙腳落地四平八穩。當企上條六呎摺梯時，我就覺有少少牙煙，如果跌落地，都可能會骨裂或內傷。當企上條十呎摺梯時，我會開始驚，手心開始冒汗，如果跌落地，可能會斷骨內傷甚至爆頭…

企得越高，跌得越傷嘅道理就係咁。

今日，我企上條十六呎摺梯到做嘢，望落地下，會心跳加速額角迅速冒汗架。當爬上條長摺梯時，初初並唔覺得佢高。但當爬到頂望返下面時，就覺得驚，心裡會諗「死啦，咁高，跌落去點算呀？不如返落去囉」，就咁，想再爬高啲就無可能嘞。其實，我知我係唔怕高嘅，當時只係俾一啲負面嘅幻想影響到自己嘅信心。要克服呢種心理幻象，其實好簡單，就係向上望唔好向下望返落地，咁就唔會有多餘嘅恐懼。

最後，工作完成，安全著地。

三文魚

依家日本菜任食開到盛行盛市，有時我都會同班朋友去大擦一番。不過呢，年紀大咗，食量就倒退。記得以前讀書時，食極都唔飽，仲試過同四個朋友放學後去買咗廿件肯德基家鄉雞狂隊，食到爆血管咁滯。依家就唔食得咁多啦，肉類食少咗好多，健康嘢反而食多咗，但又未至於要齋戒，始終蔬菜很難嘛。

講開日本菜任食，我最唔鍾意叫壽司，舊舊飯咁填飽個肚，好唔抵架嘛，所以我寧願叫魚生刺身。刺身中，我鍾意食吞拿魚。可是，吞拿魚價貴，任食唔會供應，只會供應一種所謂嘅白吞拿。白吞拿係好聽嘅名，唔好聽嘅就係油魚，食落成口油，好滯。另外，任食供應最多嘅，係三文魚。我會食三文魚，但只係一塊起兩塊止，我都係欣賞煙三文多啲。

同友人講起，佢話「唓~ 你果邊三文魚咁多又咁平，想食嘅話就簡直係唾手可得，梗係食到厭啦。我呢邊三文魚貴嘛，唔係成日可以食到，所以我哋會鍾意食咁囉。」

或者佢都講得啱嘅，曾幾何時，我都鍾意食三文魚嘅，唔知係因為我曾食得多而食厭，抑或係人大咗口味會改變呢？唔諗囉，我只諗到，有咁多人鍾意食三文魚，但我又唔好，咁我咪唔係一個隨波逐流嘅人嚟咯，標奇立異，有時我幾鍾意架。

宇宙大爆炸

呢個宇宙大爆炸實驗，原來計劃咗廿多年。首次最基本嘅試驗，已經响琴日無聲無息咁進行咗。

算係理科出身嘅我，對呢個實驗，應該會好興奮。但唔知點解，我會擔憂。

我都認為，求知慾與行動性係推動人類進步嘅動力。無錯，如果呢個實驗成功，的確係為人類了解宇宙及自身嘅起源有好大幫助。雖然CERN班科學家話實驗係安全，著名物理學家STEPHEN HAWKING話出事率少過一個百分點，但誰能真正可以保証呢個實驗係百分百安全，唔會引致世界沒日呢？呢個係關乎全世界嘅問題，人可以為咗自己嘅理想可以連自己條命都唔理，我唔反對。但如果連其他人嘅性命都唔理，縱使只得少於一個百分點機會會出事，但始終都係會有出事嘅可能性，而我又無權反對呢個實驗，咁樣係唔係霸道咗呢？如果世界真係滅亡，CERN班科學家同STEPHEN HAWKING會死得甘心，咁我呢？

怒火媽與小雲曾用魯迅的比喩形容我：鐵皮屋子中，大部分人都昏睡了，仍然清醒的幾個人，可以選擇默不作聲等待死亡，但是吶喊著，提醒著總有希望衝破鐵皮屋子的囚禁。

一向樂觀嘅我，現在會杞人憂天。我，真的越來越怕死了。

擂台搏擊

擂台上，我和你穿上了拳擊手套，開始了最轟烈的搏擊。

我得承認，開始這一刻，我是不忍心把你擊倒的。

所以，你每次所出的直拳勾拳及拋搥，我會刻意閃避。避不開的，我便強忍瘀傷痛楚，重整笑容來和你重新搏鬥。臉上雖然還有一絲傲氣，但臉容後的我，是何等的驚恐和脆弱。而我，亦未曾還手，只是高聲的向你疾呼我還沒有事，放馬再過來吧！

你，突然停下手來。當我疑惑著所謂何事之時，你又突然向我揮一直拳，重重打落在我的鼻樑上。我失了平衡，一屁股跌坐在擂臺板上，眼淚和鮮血直流，灑了滿地子的血。

你憤怒了！

原來，我這樣的態度，使你不悅。和我這個打不還手的人對打，就如練拳打沙包一樣，毫無樂趣和成功感。其實你也想我把你擊倒的，從疼痛的神經和血與淚之中享受拳擊的快感。你要和一個有血有肉有情緒的人比賽，也不要一個沙包出氣袋。這刻，我看見你的臉上，有著兩行的淚印。

我抹了臉上的淚和血，站起來，架起雙手，慢慢向你移近…

十字路口

啫咁，呢兩個星期嘅工作地方，就正正响佳能維修總部對面，咁我點算好呀？

與眾不同

上星期發現咗部佳能儍仔相機有粒pixel死咗，見下圖（圖片經過放大及裁剪）：

於是就拎去佳能總部維修。果度啲服務員幾有禮貌，所以當佢話要等十五至二十個工作天先至整好及寄返俾我時，我都強忍住我個唔耐煩嘅面口（忍樣），同佢講無問題丫。可知道我係一個隨身帶備儍仔相機嘅人，要我無咗部相機成三個幾四個星期咁耐，真係唔慣架。不過呢，部相機仔最終都係响琴日，即係一個星期後寄返嚟，真係有驚喜喎。

啫咁，我覺得呢種情況係一種心理學技倆。首先服務員作大一個日期，好等客人有一個需要等咁耐嘅心理準備。當維修嘅時間縮短咗嘅時候，因為客人已經打咗底，所以客人就會覺得維修商好有效率。如果情況調轉，服務員話三日整好但要七日先返到我手，咁個客人一定會嘈嘈閉。

攞返部相機之後就去試機，粒死pixel整好咗，不過呢，就發現多咗一粒紅點（見下圖1）及一粒藍點（見下圖2）：

試機圖：

起初我心諗唔係呀化，無啦啦整兩粒嘢我嘆？！我何得何能呀？於是就想趁保養期未過之前再拎去佳能總部再維修，整唔好嘅話就屈佢俾部新機我。但之後諗諗吓，要精確嘅相，我可以用部30D嚟影啫。如果部細機影出嚟嘅相每張都有點紅點藍，咁我部機咪好有特色兼夾獨一無二囉。哈哈，我有時都幾鍾意與眾不同架。或者以後，我都唔會拎部相機去整，呢兩點，就當係部相機仔陪我經歷風霜嘅証據啦。

在你身邊

某日黄昏伏在房間窗前，欣賞著落日晚霞。面對如此壯麗美景，不禁提起照相機，拍下這一張照片。

曙光初露，淡淡的陽光還未把綠草上的露珠蒸發掉，我便感受到你的氣息，把我從睡夢中柔柔地叫醒過來，開始美好而充實的一天。

工作中百無聊賴之時，接到你的來電。你用你那銀鈴般的聲線，向我訴說種種憤怒不平事，而且還幻想以極端的方式去解決問題。聽得痴迷的我，並不覺你殘暴，當時我只是「噢… 噢…」的連聲附和，其實你是蠻俏皮可愛的。

說到這裡，你突然對我說：「這明明是我野蠻不合理，但你竟然說好並支持我，這會把我寵壞的。」

我當時不知就裡的說了一句：「我就是愛寵你，怎麽樣？」

一向牙尖嘴利的你，被我這一句給卡住了，說不出半句話來。我想，你定是被我氣昏。

下班時陰雲密布，下著濛濛細雨，看不見半絲陽光。回家後小睡片刻，醒來後打開窗簾，原來雨停了，太陽在雲端裡徐徐落下，美極了。

我欣賞但並不留戀這片日落美景，因為我希望藉著太陽的光和熱，向還在睡牀上的你說句：

「我就在你身邊。」

立秋後幾段

投訴幕後代唱做假？
投訴腳印煙花做假？
咁點解無人投訴空中滑行都係做假嘅呢？

眾所皆知，任何政要人物演講，都有一個幕後寫手。
眾所皆知，任何魔術表演，都係用掩眼法。
咁點解我哋仲要對政要人物魔術師可以咁如癡如醉呢？

我知我知，支持做假，人人喊打嘛…
無問題，但… 唔好打頭… 我仲要留番個已經唔係靚嘅人樣見人啊…
__________

今日同上司傾偈，原來，公司琴日俾人踩場。

同行嘅一間公司，琴日派人嚟話同我哋做service。

黐痴！我哋唔識做咩？大家同行，駛唔駛咁玩嘢吓？老細知道後，勃然大怒，一手揮佢哋走，然後一手從邊疆攬我返嚟，叫我做得好好睇睇。

事後了解，原來係業主懵吓懵吓打電話去同行間公司要求咁做。不過咁樣俾人睇眼眉，以後仲駛出嚟行！

今日同同事講番，笑咗成日。
__________

呀布殊去北京睇奧運，風騷得佢個樣丫，又幾有娛樂性喎。

仲有幾個月，布殊就會離任。依家睇佢個款，都係他他條條咁去北京玩，睇吓籃球遊水沙灘排球，上吓NBC見吓胡主席，有得宣傳，有派頭，又有渡假feel，幾鬼過癮。

反觀我哋保守嘅總理，响奥運開幕當日，又做緊啲咩呢？

據合理嘅推測，保守總理當日應該買咗杯Tim仔triple triple加四十粒Timbits，一邊睇當日嘅Sunshine Girl一邊睇奥運開幕直播。

當年北京申辦零八年奧運贏咗多倫多，唔小氣就假。

不過如果當年多倫多贏咗嘅話，依家啲地稅呢。就。仲。。嘿！
__________

琴日揸車時判斷力失準，差啲俾架大貨車欄腰炒埋嚟。好在我反應快即刻踩油響晒呔咁飛走咗，如果剎車就大鑊喇，輕則無命重則癱（係，我覺癱仲慘過死）。通常响呢啲生死關頭走返出嚟嘅時候，都會警剔吓自己以後揸車要小心啲，免得愛錫我嘅呀爸呀媽為我擔心，但點解，今次我呢種感覺，會咁強烈嘅呢？
__________

今晚呀媽唔知咩事咁開心，食飯時話要飲啤酒喎。斟酒時呀媽已經natural high，拋咗個小三叮噹書包出嚟，講話「唏，今朝有酒今朝醉嘛，莫理明天… 明天… 咩呢…」

哎… 吾不欲觀之…

「馬上風呀！」

飯都噴埋出嚟。

有原因無理由

今日食完晏返屋企，泊車時發覺車位窄咗，於是問老豆點解。老豆指住我哋另一架車，然後話：「呢架車泊過咗兩呎…」我報以一個不解嘅眼神，老豆然後話：「係有原因嘅…」跟住我即刻講：「有原因但無理由喎。」

有原因無理由，當然係同老豆鬥咀啦。

點歌，有原因。但點解揀呢個版本，或者係無理由。

畢業生‧輩份

今個星期又係我嘅on call week，又係我精神及心臟發病嘅高危時期，如果响下個星期四以後一路都唔見我update呢，就唔駛再嚟喇，你哋就讓我瀟灑地走啦…

今日星期六，今朝去咗一個call。做完之後就約老豆呀媽去食晏。依家呢，學似zz話齋，俾錢時同兩老角力，真係幾頭痛。不過，好在我夠堅持同手快，贏嘅次數高達九十幾巴仙以上，所以呢，我都算係幾叻仔。

食晏期間，老豆講起話琴晚電視番播「畢業生」，佢同呀媽又番睇。老豆唔係好記得首歌係邊個唱，仲話咩「Peter Paul and Mary…」。其實呢，老豆唔係唔記得，只係混淆咗啫，咁我咪同佢講話係「Simon and Garfunkel嘅Mrs. Robinson囉」。老豆後生時好鍾意聽英文歌，Bee Gees、Linda Ronstadt、Simon and Garfunkel更係佢嘅至愛。响耳濡目染之下，我都鍾意聽佢哋嘅歌。提醒咗老豆之後，老豆話係呀係Mrs. Robinson呀，然後話佢同呀媽拍拖睇「畢業生」果陣，覺得Dustin Hoffman正死蠢，Mrs. Robinson（Anne Bancroft）又老又皺皮，咁都俾佢誘惑到，唔係呀化？！但依家四十年後睇番，又覺得Mrs. Robinson幾後生幾有韻味幾正喎。

一樣嘢，响唔同嘅時空去睇，感覺會有唔同。以前我眼中只有你你眼中只有我嘅小情人，點識得欣賞成熟女人嘅美態丫。但經歷過風霜洗禮子女折磨而開始步入老年嘅呢對老夫老妻，睇番當年嘅事物，就覺得美好。

從老豆呀媽微笑嘅咀角，睇到佢哋回味當年拍拖行街睇戲時嘅甜蜜，呢餐晏，抵到爆。
__________

睇港產片或電視劇，有時會睇到咁嘅情節：

新界某村落，有一班白晒頭嘅老人家响度拗數。當拗唔掂時，通常會有一位呀伯講「既然係咁，不如就叫呀三叔公出嚟評評理啦，佢响呢條村輩份最高，佢話點就點，大家有無異意？」其餘班老嘢聽到後，就話「有三叔公主持公道就最好啦…」就咁，佢哋就去請三叔公出嚟。

正當大家以為三叔公係一位頭髮斑白行動不便行路拐吓拐吓嘅百歲老人時，鏡頭一轉，見到班老嘢圍住一個年約十二三歲手持PSP耳塞耳筒嘅細路，恭恭敬敬咁講「呀三叔公你嚟就好喇，嗱，佢哋呢點點點點…」然後呢位十二三歲嘅三叔公就用佢嘅童音講「你哋呀，都幾廿歲人啦，仲拗埋啲無謂嘢，我好唔得閒架嘛，都未打爆機…」

* * *

琴晚我家有個有趣飯局，事緣老豆有個疏堂呀哥响香港過嚟玩幾日，於是就約埋响呢度嘅疏堂親戚食餐飯。呢班疏堂親戚，當中有堂伯父堂姑媽堂呀哥堂呀妹堂表哥，除咗一個堂姑媽之外，其餘嘅我都未見過。雖然係咁，但堂伯父堂兄弟姊妹都係同我同姓，咁都有三分親親過同事丫。同我同輩嘅呢班親戚之中，有五十幾歲做到我老豆嘅堂呀哥堂表哥，坐响我隔離一時腦筋唔靈嘅呀妹拍吓我叫我斟茶俾Uncle，哈哈，堂表哥即刻搶住話佢只係表哥嚟架咋，幾大唔認老。而最細嘅呢，有十四歲做到我個女嘅堂妹，嘩升中四？好遙遠咁喎。同一輩份但年齡可以相差四十年，感覺總係怪怪地，但諗落都幾好笑。

輕輕鬆鬆咁食吓嘢、聽吓由另一分支嘅親戚講吓族譜歷史，幾融洽幾開心。雖然係初次見面，但我哋都有個共通嘅默契，就係大家都會話自己「無乜人性」。一聽到呢句，大家都會會心微笑。

畢竟，大家都屬同一個太公，或太太公。

壞習慣‧排隊

打一場波，通常係有十個洞打得普普通通，三個比較好，另個果五個，爆晒。穩定性唔好，我都知係揮桿姿勢有問題。但估唔到，問題只係一個好小嘅動作，就係BACK SWING到頂時，左手手腕鬆咗响內拗。到DOWN SWING時，因為手腕要移返正，如果手腕移正嘅時間唔配合，咁就會响打到個波之前刮咗草皮。

當有咗一個壞習慣好耐嘅時候，那管係一個好小嘅動作，要改係好辛苦。改一個小動作，基本上係可以改變晒成個揮桿嘅MECHANISM。改正嘅初期，由於要重新適應新動作，所以比起以前（幸運地）打出嘅距離同準確性，有好大嘅退步。睇見自己打成咁，以前十球撻四球，依家十球撻七球，講真，唔好受架。不過，要為求進步、為求將來十球只撻一球或無，點樣難捱，都要捱落去。問題係，你肯唔肯堅持去改。
__________

放工揸車時最好聽收音機。今日講起香港人排隊換奧運紀念鈔票，跟住就扯到排隊心理，聽落幾過癮。

實情係咁：麥記櫃位有五位好靚嘅姐姐收銀，如果要排隊，有兩種方法。第一種係分五行嚟排，每行係由特定某一位靚姐姐幫你。第二種係全部人排一行，邊位靚姐姐得閒就幫下一位。

全部人排一行，係較為有效率及公正。譬如有一百個客，邊個客到先就幫邊個先，邊個靚姐姐得閒就幫下一個客，就算有一兩個客買嘢買好耐，但對排緊隊嘅客嘅輪候時間都無乜好大嘅影響，因為其餘果三個靚姐姐依然運作緊。但問題係，一入到麥記，睇見要排一百個客人之後，你可能會嘩一聲，然後講句「搞L錯呀」，跟住就認為麥記安排失當，要人等一百個客買完嘢先輪到你云云… 你嘅怨氣，全部落晒麥記度。

如果排五行呢？譬如有三行排廿五人、一行排十五人、一行排十人，一樣係一百人。想去食魚柳包嘅你，你會排邊行呢？依照無蝕底嘅心態，人通常會揀最短，即係十人果行嚟排，因為望落會快啲輪到你。但事實係咪咁，就要睇運氣。如果十人果行，有條友要買五個豬柳蛋漢堡三個走芝士、六個漢堡包一個走茄汁兩個走青瓜兩個走青瓜茄汁、十個巨無霸一個走醬兩個走生菜一個走一塊芝士兩個走晒兩塊芝士兼洋葱一個走青瓜沙律醬、三杯可樂一杯走冰四杯雪碧五杯橙汁氣水兩杯鮮橙汁、三個士多啤梨新地四個朱古力新地兩個走花生再加一打OREO麥旋風嘅話，咁你就有可能排得耐過排廿五人果行，甚至一百人排一行。不過呢種方法，要排邊行，係你自己揀嘅，快人一步理想達到嘅話，你可以話你自己醒目。但如果你慢人好多嘅話，你就只可以怨自己，半點不由人。

兩種方法，你會傾向邊種呢？

潮講iphone

A: I just made a post today.

B: was that a post? It means nothing to me, HaHaHa.

C: na just post a pic of his new iphone.

B: The plan is expensive here ar.

A: That is a post. I took the picture and wrote a FEW words :)

B: But I don’t get online while I am going out.

C: Same in HK, it’s a rip off.

B: So iphone means nothing to me.

C: Exactly, “I rarely get online when I go out” n even if I do, I can always get free wifi, so no need the plan.

A: I need it because that allows me to use the GPS when I am on the road.

C: u’d get lost? I heard u goto work on train.

B: He needed it from the station to his office, C.

A: I go to places, man. HaHa, right.

B: He is scared ‘lost in the crowd’. HaHa

C: I think so too, especially when his eyes wondering off at watching men.

B: After he read 70’s post, he is scared 湮沒在人潮之中, 庸碌一生, so that’s why he needed GPS.

C: He only scared of 湮沒在人潮之中, the latter half, he’s been like that all his life, nothing to be afraid of.

A: You are nuts! OKOK I watch porm while I am on the train, OK? Happy with the answer?

C: I’m sure u do now, with your new iphone ;)

B: poem, or porn?

C: Definitely not poem.

B: Maybe he is literate

C: His little thing sticks out that’s why it became porm instead of porn. Hey man, just kidding, don’t get mad, A.

A: I am typing with one hand only. Excuse me for the typo HaHa.


為保護資料來源，請別問A，B，C是誰。

懶洋七月天

艷陽藍天，氣候徘徊在廿五度，
陽光從百葉簾縫照落在客廳地上，
絲絲涼風送爽，
睡著的貓兒，把這一個下午添上懶洋洋的氣氛。

登入電郵戶口，發現有人還未入睡，
此時此刻，不知何解，讓我想起一段文字：


多事的人間四月天，
我把灶上的瓶子都一同打破，
灑了一地的油鹽醬醋糖。

面對倒翻了的牛奶我並不落淚，
此刻眼前卻霧氣濛濛，
只因生活的調味，
少不了那灰啡的胡椒粉末。

我左望右望， 滿地蒼夷， 我該從何入手？
我十指纖纖， 魯莽收拾， 只會誤把鮮血當寇丹。

但願走廊的燈快點亮起來，
咯咯的皮鞋挑動我的嘴角；
飯廳的吊燈也要光復起來，
斜照廚房一地的黃映玻璃杯的輝煌。
於是，
我便記起橙蛋糕的甜香，
我可要快快把殘局收拾起來，
免得變酸的白糖餿了我的天堂。


「寫blog咁耐既經驗係，喜歡的東西，還是copy到自己blog上吧。」

末日傳教士

响外國生活咗十幾年，常常遇到街頭傳教，都係同一個教派。

呢個教派傳教嘅人，好容易分辨出來，因為佢哋每次都係兩個好後生嘅外籍青年一組，同樣瘦瘦削削，身穿整齊制服，胸口掛有名牌，除咗刻有自己個名之外，仲刻有教派個名。

觀察得出嚟嘅結論，係佢哋專揀中國人嚟落手。到底有幾多中國人入咗呢個教派呢？我唔清楚。不過我隱約知道，教派嘅高層，有好大可能係中國人，容後再講點解。

傳教呢一對青年，响街上揾到目標之後，就會好親切咁同你打招呼、問吓你點呀、生活得開唔開心呀咁。當你見到有兩個外籍青年咁誠懇同你打招呼時，你自不然會同佢哋喧寒一吓，當傾到咁上下嘅時候，佢哋就會入正題問你有無聽過呢個教。望一望佢哋胸口上嘅名牌，刻上幾隻工工整整嘅中文繁體字，咩「末日真主基督教」，一响無宗教信仰嘅你，連正統基督教都唔信，甚至乎討厭，又點會信呢個咩末日真主基督教呢？當你婉拒話無興趣想走時，呢兩位外籍傳教士會突然同你講一句好純正嘅廣東話：

「做個朋友丫？」

信我，當你聽到呢兩個外籍青年用咁純正嘅廣東話同你講嘢嘅時候，你心裡嘅驚喜同震撼，係可以完全打消你想走嘅念頭，你會想留底再同佢哋傾偈。而往後嘅交談，當然係用廣東話啦。

我之前講過，教派嘅高層有好大可能係中國人，我咁諗係因為佢哋嘅傳教目標係中國人、傳教士嘅名牌刻有中文教派名、同埋果兩個外籍青年傳教士可以用純正嘅廣東話同人溝通。教派嘅運作需要用上大量嘅中文，係非要一班中國人嘅努力不可。

呢個教派係咪邪教？我無證據話佢係。但基於我自己嘅自我思考及思想安全保護意識開始運作，我對呢個教派有保留。

當呢兩個外籍傳教士最後用廣東話都打動唔到我嘅時候，佢哋就會轉移目標，向第二個中國人落手。

見到佢哋向一啲婦孺傳教時，我心裡就擔心有人會受洗腦受騙，但我始終都無出聲，除非，佢哋係我嘅親人同朋友。

响呢個城市，有幾多人入咗呢個咩末日真主基督教？我諗有幾多吓。有幾多人知道有呢個咩末日真主基督教而無入教呢？我諗都有好多，我係其中一個。有幾多人對呢個咩末日真主基督教有懷疑但無出聲呢？我諗都有唔少。

我哋响呢個社會裡，好些時候都會發現一啲病態嘅思維，但基於事不關己嘅情況下，我哋好可能會唔出聲。但唔出聲，後果有好大可能會由得呢啲病態思維蔓延落去開去。或者，我哋相信自己嘅免疫能力可以避免被感染，從而對別人嘅免疫能力投以信心，但實情係咪咁呢？

早前美國破解咗一個教派組織，呢個教派嘅女信徒必需要服從男人，為男人提供性服務。而懷孕出生的女孩，必需服從教主，從而被迫成為性奴，與教派裡嘅男信眾群交甚至做出亂倫等行為。

再早期，美國又有一教派，相信响某年某日世界末日之前，會有UFO帶佢哋嘅信眾離開地球。結果到當日，佢哋所有人响一間屋內集體自殺。

日本真理教，於地鐵內放沙林毒氣，毒害無辜市民。

到底，係唔係要到事情去到最壞，要有人死要有人成為性奴四十年後，我哋先至會意識到病態思維嘅危險，然後馬後炮一番呢？

有獨立思考嘅你同我，當然可以判斷何種教派係存在病態思維，而病態教派嘅教主，亦相信自己扭曲咗嘅思維就係絕對真理。面對經過邏輯訓練嘅人，佢哋無計可施。但面對思想仍未成熟嘅人，佢哋就成為救世主。

可悲嘅係，相信病態教派及對其效忠崇拜嘅，大有人在。

當我哋見到有人被病態思維洗腦而不作聲，到事情鬧大或有人命損失時，我哋就成為病態思維嘅幫凶。

有些病態事情，唔出聲可能會對雙方面都好嚟好去。但當病態思維可以影響到其他人時，唔出聲嘅後果，可以好嚴重。

踩波(車)男孩

從前，有個小男孩，佢好鍾意玩，每逢周未佢都會扭媽媽帶佢去遊樂場玩。媽媽係一個好開通嘅人，只要唔過份，媽媽都會滿足小男孩嘅要求。

去到遊樂場，小男孩見到一班小朋友用一個二個彩色嘅汽球玩緊遊戲。小男孩覺得好新奇，於是就靜靜咁坐响旁邊嘅樹底下，睇吓呢班小朋友玩緊乜。

呢班小朋友，每人嘅左右腳都綁住一個汽球，然後响空地中間追追逐逐，目的係踩爆人哋腳上嘅汽球。當有氣球被踩爆之後，有啲小朋友會唔介意然後走去場邊啲櫈度坐低休息，而有啲唔憤氣嘅小朋友就會即刻吹番個新氣球然後再出去玩過。見到呢班小朋友咁開心，小男孩都好想玩埋一份，但係小男孩同媽媽今日無汽球在身，咁唯有等下星期。

一個星期過去，媽媽今次買咗一袋汽球帶小男孩去遊樂場玩。去到遊樂場，小男孩又見到呢班小朋友玩緊踩汽球嘅遊戲，於是就急不及待吹咗兩個汽球綁响腳上，然後跑出去加入呢班小朋友嘅戰圈。

小男孩有踩爆人哋嘅汽球，亦有其他小朋友踩爆小男孩嘅汽球，有來有往。踩汽球呢個遊戲，踩到腳就少不免，小男孩初初被人踩到都嬲架，但係其他小朋友會同佢道歉，而小男孩亦知道自己有時又會唔小心踩到人，於是，小男孩就唔再嬲，繼續開開心心咁玩。

日子一路一路咁過，小男孩就同呢班小朋友熟絡咗，而呢個踩汽球嘅遊戲，亦都開始變咗小男孩同呢班小朋友見面嘅一個藉口。踩唔踩爆汽球都係其次，最緊要嘅係大家見吓面走吓跑吓睇吓人哋有咩花花心心貓仔狗仔汽球等等，嘻嘻哈哈咁就一個下午。

一日，有一個新嚟嘅小朋友加入。呢個小朋友著住長褲，面上一副冷漠嘅表情。初頭，呢位長褲男孩都玩得好好地，但後來，佢就有意無意咁踩到人腳踢人後踭。踢到人後，佢嘅臉容都係一貫嘅冷漠。

呢個長褲男孩，每個星期都係咁，踩到人痛又毫無反應。有小朋友投訴佢，但佢又唔聽。終於小男孩就忍唔住，一嘢就飛鏟落呢個長褲男孩隻腳度。

媽媽見到小男孩飛鏟，就叫小男孩返埋嚟，好温柔咁同小男孩講：「你睇吓你，玩到成身汗啦… 抹咗啲汗先啦…」然後响手袋裡攞條毛巾出嚟，輕輕咁印落小男孩嘅額頭、後頸、同背脊度，繼續用佢好温柔嘅聲線同小男孩講：「乖仔，你知唔知你頭先咁樣做係唔啱架？你要記住，唔好心存怨恨，果個小朋友成日踢到人，或者佢都唔想嘅… 你有無見佢每次都著住條長褲呢？其實，佢長褲管裡，係裝咗條義肢…」

「媽媽，唔好講好嗎？」

「乖仔，你要記住，每個人做嘢都有佢嘅因由。你今日點樣對人，第日人哋就會點樣對番你身邊最親嘅人，知道嗎？好啦，去玩啦。」

小男孩又走番去玩，响玩嘅同時，佢亦好用力咁記住媽媽嘅說話。但係响呢個時候，小男孩見到自己嘅一個同伴受傷跌低咗，而果個長褲男孩竟然仲踩多佢一腳。火遮眼嘅小男孩見到，仲記得媽媽嘅說話咩，於是又飛身兩腳一齊鏟落個長褲男孩度…

媽媽見狀，就走去小男孩身旁，重重咁打咗佢一巴。呢巴掌，真係好重手，小男孩塊面即刻腫咗。媽媽打咗小男孩一巴之後，就轉身離開。

小男孩呆坐咗响遊樂場嘅地下度，睇住媽媽遠去之後，亦睇住呢班小朋友一個一個咁返屋企。小男孩一邊諗住受傷同伴被長褲男孩踩嘅畫面，一邊又諗住媽媽嘅教悔。當小男孩一諗起媽媽果隻温柔嘅手同佢抹汗嘅情境，突然間哇一聲喊咗出嚟…

「對唔住呀，媽媽…」

唔知道，媽媽會唔會返嚟接番小男孩走呢？

思考謬誤

零八年六月二十一日按：
本人並沒有閱讀量子君文章的習慣，對量子君毫無認識。但機緣下今天到訪量子君部落，發現量子君某篇文章的留言版貼了這篇文章的連結，所以本人必需澄清，本文所評論的主題和主角並不是量子君本人，敬請各方從量子君部落轉至到此部落的朋友們不要把我和量子君扯上任何關係，希望各位明白。


人，响批評別人同辯論時，好多時都會加一啲比喻。確當嘅比喻，可以強化自己嘅論點。但有一啲人，會將比喻同事情嘅本質扭曲，然後用呢個扭曲咗嘅比喻，去怒插對手。但係呢種人，並唔知道自己插緊嘅，其實係一個稻早人。

Blogger C 最近借用Blogger A 同Blogger B 嘅爭拗事件寫咗一系列嘅三篇文章去剖析網絡小圈子文化。文章當中Blogger C 更引用Blogger B 一句說話去剖析白鴿眼同修養問題，呢句說話係咁嘅：

「不喜歡的博客，我通常不會去留言。」

我講呢件事特意唔講三家博客嘅名稱，係因為佢哋係邊個唔緊要，係男係女係老係嫩都無所謂，我嘅重點係思考邏輯嘅謬誤。

Blogger C 用咗一個比喻去証明Blogger B 呢句帶有白鴿眼同欠缺修養嘅含意，呢個比喻係咁：

「有修養的有錢人，如果問他有否興趣去吃平價小餐，他會說口味不合，謝過。但一個沒修養的有錢人，會說：【 呢啲咁既嘢，我唔食既！ 咪攪我 ！】。這說法也不能稱錯，因為有錢人沒興趣吃平價小餐，皆因有能力吃的好點。但話說出來，旁人便會酸溜溜，有錢別人也看出，但犯不著藍族血統的高高在上，話語間揶揄窮賤的人只能吃下價食物。」

呢個比喻，已經將Blogger B 原本句說話扭曲咗，因為呢個比喻已經將「不喜歡的XX」假設為「平價的XX」。

「不喜歡」係個人喜好問題，沒有衡量準則。「平價」係關乎個人經濟問題，可以以個人入息等等資料嚟制定標準。將兩者混為一談，係唔合理嘅。

Blogger C 將「不喜歡的XX」假設為「平價的XX」，已經係對Blogger B 唔公平。因為，呢個比喻亦可以將「不喜歡的XX」假設為「貴價的XX」。

Blogger C 亦將人假設為有錢人，如果Blogger C 徵用有錢人嚟作比喻，咁，Blogger C 呢個比喻亦可以徵用有錢人嘅相反：窮人。

將「窮人」同「貴價的XX」代入Blogger C 嘅比喻度，意思並無改變。

「有修養的窮人，如果問他有否興趣去吃貴價大餐，他會說口味不合，謝過。但一個沒修養的窮人，會說：【 呢啲咁既嘢，我唔食既！ 咪攪我 ！】。這說法也不能稱錯，因為窮人沒興趣吃貴價大餐，皆因沒能力吃的好點。但話說出來，旁人便會酸溜溜，貧窮別人也看出，但犯不著紅族血統的低低在下，話語間揶揄富貴的人只能吃高價食物。」

有人會這樣說嗎？？？

但如果只講「唔喜歡嘅嘢，我唔食嘅，咪攪我！」咁，無論係藍族血統抑或係紅族血統，咁仲會唔會有酸溜溜嘅感覺？

呢種係咪思考邏輯上嘅謬誤？到底Blogger C 知唔知道嘅呢？如果知道嘅話，Blogger C 係咪玩緊詭異嘅文字遊戲將事實扭曲然後加以評擊？

踐踏人嘅底線，係有無將人標籤同劃分等級。以上面食物個例子為例，如果話「唔喜歡嘅食物，我唔會食」，就算俾全世界任何人聽到，都唔會有人感到侮辱，因為喜唔喜歡係純個人喜好，人人平等。但如果將呢句句子扭曲為「平價嘅食物，我唔會食」，就因為有人劃分咗食物嘅等級，而令到平時只食呢種平價食物嘅人感到侮辱，咁就係問題所在。

响Blogger C 呢個文章系列留言中，有人發現呢個謬誤而提出質問。而Blogger C 則回答「No，文章意思不是這樣，你再詳細看。」「香港人都好鍾意捉一句或一兩個字去解釋整套文章、甚至一本書。」去迴避自己立論跟據嘅謬誤。

如Blogger C 所言，如果「香港人都好鍾意捉一句或一兩個字去解釋整套文章、甚至一本書。」，那麽，Blogger C 又是否以以一句或一兩個字去解釋整套文章甚至一本書來評論香港部落小圈子文化呢？

只要睇多Blogger B 文章嘅一段，整個意思亦有不同：

「不喜歡的博客，我通常不會去留言。

我一點也不喜量子這個博客，但我卻常常去留言。我留言，不是給我不喜歡的量子看，我留言是留給其他讀者。」

睇Blog，要有正確嘅獨立思考，如果唔係，就好容易跌落詭異嘅文字陷阱度。


後記：Blogger A 同 Blogger B 嘅爭拗我無跟晒（希望Blogger B 唔好感到酸溜溜），所以我從無插咀。但概括總觀成件事，我都認同米搞師兄嘅說法，要插Blogger B 可以從米搞師兄所講嘅方向入手。但趁呢件事用扭曲嘅事情去插Blogger B 抽油水嘅人，我極度討厭。

是日精句

「對哈哈笑的博客不去看，自己知便可以，無須再說出來。正如有錢人不須說自己有錢而吃貴的, 說出來便顯得欠缺修養。」

新好平論

事原係關於科技。

今日嘅科技新產品，到咗聽日，可能已經落伍，跟本無得追。

以手提電話為例，今日出咗部最新款有齊乜乜物物功能嘅，價錢一定貴。好喇，一年後，呢部電話跌價，但個款就變舊咗，而新一款又再出，咁點決擇呢？

新好平論，係從電台聽返嚟，意思係購物時嘅取捨態度。

購物時，我哋無可能咁貪心要齊晒又新、又好、價錢又平呢三種要素，我哋只能選其二。

即係一件新穎而且品質又好嘅貨物，價錢唔會平。

一件品質好價錢又平嘅物品，唔會係新款。

一件新款但又平嘅貨色，質素唔會有保証。

買唔同嘅嘢，我哋都有唔同嘅取捨。

只選一項嘅人，唔係精明嘅消費者。

唔理呢三項嘅人，係病態購物狂。

新好平論，其意義仲可以應用响人生道路上，提醒自己唔好咁貪心，乜嘢應該堅持，相對應該要捨棄啲乜。

今日有單新聞，係一個入世未深嘅男生，因好奇同滿足自己嘅快慰而加入咗SMS徵友會，五日內傳送咗二千幾個短訊，而新鮮刺激換番嚟嘅，就係萬幾銀嘅電話費。

新好平論，正正可以代入呢單嘢度。雖則，我強烈懷疑事主談情說性嘅對像，係徵友公司虛構出嚟屈錢嘅。

新、好、平，揀老婆嘅話，我會揀邊兩款呢？

潛水屈機

趁歐洲國家杯仲未開波前，交代幾句先，呢個月，睇怕都係得果兩三篇。

__________

一星期0.7篇文，我點對得住呢四十七位朋友呢？
或者，呢四十七位人兄其實係我嘅仇家，想睇我幾時死…
__________

無啦啦諗起屈機。

我開始聽見「屈機」呢兩隻字，係從快打旋風開始。

快打1裡，只要你熟手連續出昇龍拳，咁你就可以連螢光幕都唔駛望，一招就可以打爆機。懶係型識得單手出昇嘅，仲可以一邊煲煙一邊打爆機。查實機舖內麻甩仔居多，要咁型嚟做咩呢吓？

連續出昇呢個動作，當時低能仔嘅我試玩真人版，當然，連續轉咗四五個圈之後，梗係暈酡酡跌鬼咗响地下啦。今日心血來潮試玩一嘢，頂！跳起轉身轉唔到一個圈呀陰公。

到快打2加入咗新角色，屈機方式就層出不窮。譬如軍佬踎低等出腳刀，Honda水平直飛愛心頭鎚加千手，但當時我最喜愛用蘇聯佬嚟屈機。連續三嘢跳起小拳加倒頭樁，對手跟本無得擋，搞到有啲叉機友直頭想同我玩真人版快打旋風咁濟。

到後來嘅快打乜乜3/4/5/6…或X x-men呀，我開始無興趣打機囉。
__________

每個人總會有啲小小嘅壞習慣，有一樣我係好憎見到嘅，就係揭紙前用口水整濕隻手指。妖！唔覺核突架咩？唔覺唔衛生架咩？整到叠紙全部都係口水，叫人點敢睇喎？奈何，好多人都好鍾意咁做，激死！
__________

摺Blog嘅人何其多！

上星期突然又心血來潮，由頭到尾番睇呀無相達人個Blog，連留言都睇埋。幾日後，呢位無相達人突然剷Blog。好彩，我可以响無相達人自剷前記低佢嘅犯罪證據，嘿！
__________

琴日，响每日都令我失望十次嘅blog裡面發現咗一個倒數icon，令我又諗起一個關於生死哲學嘅迷團。

話說媽媽响未生我之前，曾經有過一胎，不過爸媽因為當時年紀少（但又未至於犯法）而唔將佢生落嚟，我姑且稱呢胎為「大仔」。跟住第二胎到我，我自稱「二仔」。生咗我之後，爸媽便決定唔再生。但唔知係幸抑或不幸，媽跟住有三次懷孕，頭兩次都好決絕咁話唔要就唔要，我又姑且稱呢兩胎為「三仔」同「四女」，唔好問我點解唔係「三女」「四仔」或者「三仔」「四仔」等等，因為我都唔知。而到第五胎，我稱之為「五女」，爸媽突然轉軚話要，理由係當第日爸媽遠走時，好等「二仔」都有個照應。

呢個理由，雖然對「五女」唔公平，但又合乎常理喎，因為無人會講話我生個大仔嘅原因係因為準備第時好好照顧我個細仔。

所以，「二仔」係「五女」嘅必要條件。

Well，邏輯呢家嘢，都係留番俾條件充分嘅女仔講解好。

我嘅生死哲學迷團，係如果我媽唔要「二仔」而要「三仔」嘅話，咁，「三仔」會唔會又係「我」呢？

好深，係咪？

先解釋何謂「我」。「我」，依家係用緊「二仔」嘅雙眼去睇嘢，控制「二仔」嘅雙手雙腳去活動，利用「二仔」嘅腦去思考，更利用「二仔」嘅特硬肌肉去胡作非為，「我」就係寄生响「二仔」嘅身體裡面嘅一團低等浮游物。

但如果爸媽放棄「二仔」而要「三仔」嘅話，咁「我」係唔係就會寄居响「三仔」嘅身體裡面，利用「三仔」嘅雙眼去睇嘢，控制「三仔」嘅雙手雙腳去活動，利用「三仔」嘅腦去思考，更利用「三仔」嘅特硬肌肉去胡作非為呢？

跳上一級，其實「我」，係唔係因為爸媽唔要「大仔」，所以「我」就寄居响「二仔」裡面呢？

又或，如果爸媽唔要頭四個，咁「五女」會係邊個呢？

呢個謎，一直响「二仔」個腦裡面，無法解答，更無法擺脫。
__________

生果早前推介一段關注緬甸民主領袖昂山素姬嘅短片，由Tila Tequila主演。Tila响短片嘅形象，完全同二仔早前所講嘅性幻想不謀而合：

「…一個皮膚白晳、紥咗髮髻帶住副粗框眼鏡嘅OL，身穿白色恤衫黑色半截裙加對兩吋黑色漆皮高跟鞋，低開胸口鈕，黑色喱士胸圍若隱若現… 最攞膽嘅就係，當佢除低副眼鏡再解開個髮髻，搖搖頭由得秀髮慢慢飄落…」



或者，大部份男人嘅性幻想都係咁。

Tila Tequila係雙性戀，佢有一個真人show，叫「A Shot at Love」，依家播緊第二輯，show嘅內容係一班直仔同一班叻女去爭奪Tila嘅芳心。個show，講真，真係幾無聊吓，不過二仔又會追喎，咩事呢？係咪二仔本身跟本就係好無聊呢？如果係大仔或三仔嘅話，又會唔會一樣咁無聊呢？
__________

同幾個波友閒聊，有段咁嘅對話：

「上次入去London，然後去Guelph，再踩入Windsor，再出返嚟，由朝早六點開車，返到屋企要半夜十二點呀，好彩唔駛我揸車…」

「坐車咪仲辛苦…」

「我可以瞓嘛…」

「睇吓啦，我一個人揸車落去Orlando返學都係咁…」

「嘩，你揸咗幾多個鐘呀？」

「廿二個鐘…」

「有無停呀？」

「有，中途瞓咗兩粒鐘…」

「你日日都係咁呀？」

！！！！！！
__________

潛水

早排消失，並不是我離去，而是爺爺。

爺爺和我也是木訥寡言之人，我們的相處和關愛，是建立在沉默之中。

平平靜靜地相處，雖然一言未發，但彷似已說了千句說話，這感覺是多麽的實在。

爺爺已九十歲，臥床數年，身體機能續漸衰退而去。

我們慶幸，爺爺去得並不辛苦，很安詳。

縱有不捨，但路仍要繼續行，還要笑著行。
__________

有無人記得，响八八至八九年間，維他奶有一個廣告淨係齋訪問啲過路人點解鍾意飲維他奶呢？我今晚摷嚟摷去都揾唔到段片呀，呢段片，蘊藏咗我一啲回憶。

突然內咎

春田花花

好耐無响度貼相，只因我另外開咗個相扑，唔知有幾多人發現呢？

曾經好天真且儍咁諗過，想每日貼一張相。基本上我可以做到，因為我會用存貨，但有時未必有時間去執相貼相，雖則Blogger依家可以預定出文時間，但貼相呢家嘢，有時都幾講心請，我承認，我係有啲感情用事。

春天正式來臨，四處都長出美麗嘅花兒。雖然我有花粉敏感症，一到春天眼耳鼻喉都活受罪，但係我仍愛呢個季節，天又藍草又綠花又豔麗，咁靚嘅環境，有邊個會嫌棄？

春天最好影花。相扑中打頭陣嘅櫻花已過，而第二輪嘅係鬱金香。每年五月天，全國都鬱金香盛開，聽講係百年前荷蘭女王送俾本國嘅禮物，依家响首都國會山莊，好似有鬱金香節架，但我又懶得揸車去睇，五個鐘車程，真係要好有毅力至得。不過，去植物公園都有好靚嘅鬱金香睇。所以，相扑一連數天，我都會貼鬱金香，惜花者，實在不容錯過。

OK，賣吓廣告增加收視得唔得？

總覺得，春夏天出生嘅女孩好幸福，因為四處都有花兒陪伴。

契媽別名叫花花，實在太貼切。康乃馨未有，鬱金香頂住先啦，相扑038今年第一幅鬱金香相，就送俾契媽啦，生日快樂。

緊張大師

我成日都會有一啲好殘忍嘅念頭。呢種念頭，係安全意識上嘅殘酷幻想，即係，如果一旦發生乜嘢意外，就會有乜嘢後果。我唔係變態，所以呢種念頭唔會令我得到啲咩快感，反而會令我全身毛管戙。最頻繁响我腦裡面出現嘅殘忍念頭，係關於搭電梯。概括嚟講，搭電梯係安全嘅，被困响電梯裡嘅恐懼大多數都係源於幽閉恐懼症，成部電梯跌落地下嘅機會其實好微，至多會上下移動咁。所以，被困電梯，嚇死嘅可能性應該係多過跌死。而我血淋淋嘅幻想，其實係响進出電梯門嘅時候，部電梯突然失靈，無故向上或向下移動，而咁啱個人就夾正响中間。我所講嘅夾，唔係俾道門夾，而係打橫夾响電梯同電梯大堂之間。當夾正條腰時，人就會被分開兩截，夾正個頭就會好似爆西瓜咁，紅漿四濺。電梯可乘載嘅重量好大，上昇下降嘅力，至少過萬磅。所以如果响咁嘅情況被夾，唔會有啲乜鬼遇到阻力就會反彈嘅安全裝置救命，一係就分屍，一係就爆漿，諗起都血腥。

當然，我並無恐懼到以後都唔敢搭電梯而走去行樓梯嘅心理病，呢啲只係我腦裡面一種危機意識感。以前睇血型分析話B型血嘅人會有呢種危機感，或者可以講係杞人憂天。我唔知係咪全世界所有B型血嘅人會係咁，不過我係其中一個。面對一啲突如其來嘅事情，我會手足無措兼且會向最壞嘅方向諗。咁樣嘅諗法，好處係可以對事情作出最壞嘅預算，好等自己有個心理準備去迎接最差嘅後果。對，心理準備對我嚟講，係好重要。由細到大，我都係緊張大師（希治閣）一名，面對陌生環境，我會緊張；學校旅行之前果晚，我會瞓唔著。我並無既來之則安之嘅心態，自助旅遊我一定要摷晒所有資料例如酒店位置、當地治安、景點响邊、有乜交通可以往返酒店及機場、半夜後又有乜交通選擇、邊度有嘢食等等… 或者我呢類人睇落好似好穩陣咁，但缺點係唔夠靈活變通、較為死板、轉彎比人慢、害怕遇到突變事情從而感到壓力。

公司最近安排我去on call。On call名單有七位同事，每人輪流做一個星期。On call對員工嚟講，係正面，公司信得過你有能力先至會讓你一個人响夜裡單打獨鬥。不過on call對希治閣嚟講，係一種好大嘅壓力。先前講過，心理準備對我嚟講好重要，而on call嘅性質，係要應付突發事情。雖然一星期內可能只得兩三個call，但要開著電話等唔知幾時有事揾你果種感覺，係一種煎熬。我唔怕公司早一個星期前安排我星期六凌晨兩點去做嘢，起碼我都有心理準備。但我怕隨時要我出動，儘管一星期都無一個突發事情。始終都係有嘢心掛掛，我會瞓得唔安樂，每次聽到電話聲，無論係唔係公司果個手提電話，我都會好神經質咁彈起身，心跳仲要比初次約女仔出街時仲要跳得快。

希治閣嘅另一個特性，係對時間觀念特別強，因為所有事情都要安排好嘅關係，時間就係最重要嘅因素。早前睇到zz、elizza同小雲講守時，睇得我實在太開心。我唔知道依家係咪唔識守時嘅人佔咗大多數，覺得遲到係理所當然嘅事，但只要仲有人堅持呢種美得，我覺得，原來我唔孤獨。

以前响我個私人Blog度寫過一篇關於守時嘅文，依家貼返出嚟，希望可以通過「守時同樂會」嘅入會申請。至於我個私人Blog，一早就剷走咗。


何謂正常，何謂不正常呢？

根據經驗，人通常會依照統計學數據去分辨正常和不正常。比方說，一百人當中，有九十五人的智商是大約在一百的水平左右，那麽，那九十五人就會被歸納為正常人。而其於那五人，無論他們的智商是五十，或是高至二百，他們都會被區分為不正常。高智商的被稱為天才，而底智商的就會被稱為弱智。究竟，這種區分法是否帶有主觀的思想呢？如果在一百年後，統計結論得出一百人當中有八十人的智商是大約在一百六十左右，那麼，智商在一百的人又是否要被區分為不正常而要入讀特殊學校呢？究竟，有沒有一種絕對客觀合理的方程式去區分正常及不正常呢？

待人處事，我會有某些堅持。約了人七時見面，你必定會看見我七時準時出現，或更早的時間到達。一直以來，我都覺得時間可貴，尤其投身社會做事後，可供浪費的時間就越來越少。為免浪費他人的時間，我都會保持守時的習慣，這亦是對人的一種尊重。或者，這只是我一廂情願的看法，因為我發覺，現在有很多人根本都不太重視時間觀念。當身邊的人個個都把遲到當成習慣的時候，看起來我就覺得自己很不正常了。是不是我太緊張呢？是不是我太執著呢？是不是我已經脫了節呢？究竟，在現今社會裡，一百人當中有多少人會依然執著於守時的觀念呢？如果是少於五十人的話，你可以當我是一個弱智人仕在這裡吵吵鬧鬧毫無目的地投訴社會的不公。但是，我並不會因為要做回一個所謂的正常人而放棄自己的堅持。

如果把等人遲到的時間為負數，別人等自己遲到的時間為正數，以小時為單位，那麽，粗略估計，我想我應該有負五百或以下的。這數字表示，我生命裡有五百或多個五百個小時是浪費（蝕）了給不守時的人的。而你，是（賺），還是蝕呢？

掛鈎邏輯

其實，我無睇過「一百萬人的故事」，對呢個節目嘅印象，全部都係由博客們睇完之後所寫嘅感想得番嚟，大部份都係話班明星誇張煽情不知人間疾苦咁啦。而我對上篇文，只係講我現實中嘅遭遇同感想，但就咁啱同呢一百萬個故事扯上咗關係。呢種感覺，就好似本來想買把刀返屋企劏雞，點知好衰唔衰，响回家途中遇到社團吹雞劈友事件，結果俾班古惑仔以為我都係自己友，然後就捉埋我去一齊劈友咁樣，荒誕得嚟又有啲幽默。

寫我遭遇感想果段，其實我已經寫得好小心。開首我已經寫咗我對「窮人」嘅定義係乜。唔知係咪我嘅表達解力弱呢？令到有啲人睇唔明。不如我再好簡單咁講多次啦：我係話，我對貧窮嘅定義，係要同自己比較。所以，如果有人窮得過我，大概應該係要靠行乞或以非法手段來生存嘅人。

即係，要靠行乞或以非法手段來生存嘅人，我都歸納為窮人 。

代數題做過未？

如果我將「靠行乞或以非法手段來生存嘅人」代入「窮人」，咁，靠行乞或以非法手段來生存嘅人，同罪惡掛鈎，都有90%準掛…

再加埋我對呢班靠行乞或以非法手段來生存嘅人嘅歧視（私人恩怨10%），咁，就等如100%同罪惡掛鈎。（我講嘅，並唔代表大眾立場。）

咁樣講，會唔會無咁容易對號入座？


定義講完，講思考邏輯。

如果我話，貓科類嘅動物，一定有腦袋。

咁，我嘅意思，係唔係就係話緊靈長類嘅動物（包括人），就一定無腦袋呢？


思考邏輯講完，講身份問題。

納粹黨對猶太人嘅歧視，係以野蠻行動去剝削猶太人嘅權利，包括生存嘅權利。

中國人對八國聯軍侵略嘅不滿，係啞忍、割地求和、避得就避。

文中我並無主張話要以乜嘢行動去剝削要靠行乞或以非法手段來生存嘅人嘅權利，我話我只會對呢班要靠行乞或以非法手段來生存嘅人流露厭惡目光及避之則吉。

所以，我嘅身份，係中國人，而唔係納粹黨。


如我第一段所講，我純綷路過，一百萬人嘅遊行示威，我並無參與。

黄小姐

一路食晚飯一路睇電視新聞，講航空業招聘會吸引七百多名前甘泉員工應徵，報導其間電台更訪問幾位應徵者，講到呢度，有人就自言自語：

「黃小姐？睇吓靚唔靚先…」

「嘩，空姐真係空姐，黃小姐幾得喎… 我都去應徵咯…」

及後發現生果亦有黄小姐嘅相片，我諗，傳媒响過千人之中揀人嚟做訪問，應該會揀啲上鏡嘅女仔。換轉如果俾我去揾人做訪問，我諗都唔駛諗一樣會揀個靚女，你話我歧視都係咁話架喇。

黃小姐，真係幾得。
__________

我有一對Royal Elastics波鞋，間斷地著咗差唔多十年，因為呢對波鞋著得好舒服，所以我對Royal Elastics波鞋幾有好感。十年，對舊波鞋都著到爛，新鞋已經買咗好幾對，係時候放棄對舊波鞋。但將佢親手放咗入垃圾筒之後，我發覺原來我真係唔捨得拋棄佢，始終佢陪我行咗十年人生路，翻山涉水，上刀山落油鑊亦毫無怨言。依家我仲十五十六好無拎番佢入嚟，但我知道我又唔會再著佢，屋企又無咁多位擺，點算好？

係咪我太感情用事呢？
__________

個個講窮，我又搭咀。

我屋企算窮，但我知比我哋更窮嘅，大有人在。

所以，我所講窮人嘅定義，係生活响同一個地方但又比我更窮嘅人。

貧窮與富貴，無分界線。講得人貧窮，就一定係同自己比較。

而比我更窮嘅人，大概應該係要靠行乞或以非法手段來生存嘅人。

所以我認為，貧窮，一定同罪惡掛鈎。

早幾晚去宵夜，食完後攞車，發現尾窗扑碎咗，而車內則凌亂不堪，一袋工具俾人偷去。

同樣嘅事，唔會响富裕地區發生。

無錯，窮，唔一定係苦事。窮人可以將偷番嚟嘅嘢變賣，換幾口香煙、幾杯咖啡或幾個Donut，嘆完後就可以大覺瞓，完全唔駛理聽日有無工開、有無飯食。返正，佢哋日日都係咁過。

而貧窮嘅受害者，即係架車俾人扑果個車主，該晚除咗失眠外，翌日仲要同警察局備案、報告返公司、點算財物損失、拎架車去整、買返所需嘅工具等等，精神壓力之大可想而知。

我對窮人，完全無同情心，亦無同理心。

我已經夠窮，你年青力壯有手有腳又唔係智障，但又要比我更窮，係你自己揀嘅，怨唔到人。

反貧窮示威，我只覺有人想渾水摸魚，我會眼火爆。

見到窮人，我會流露厭惡目光。

我。歧。視。窮。人。

地獄之周

呢個星期係地獄之周，七日內四日返夜兩日返早，瞓覺時間搞到亂晒，最長三十六小時無正式入睡，慘絕人寰。再下星期又嚟地獄之周，仲要開始on call。

地獄可怖之處，就係當你跌落深淵受苦時，你知道痛苦係永遠唔會完結，而且仲有更痛苦嘅折磨等緊你。
__________

「信我啦，我好人嚟架。」

「好唔好唔係自己講架。」

無言…

不過，愛唔愛國，就只有自己先知。

今年奧運年，中國係主辦國，身為中國人嘅我，幾覺自豪架。不過，亦因為咁，坊間就多咗好多愛國論及唔愛國嘅指責。其實我覺得，愛係好私人嘅感覺意識，我愛國嘅方式同你唔同，並唔等於你可以指責我唔愛國。有啲人會批評及諷刺國家嘅時弊、有啲人會唔提國家嘅醜事、有啲人會唔肯面對自己民族醜陋嘅一面、有啲人會因為維護國家嘅尊嚴而去衝擊一啲外資企業，有冷靜有衝動，各式其式。你用邊種方式愛國，唔關我事。而我用邊種方式去愛國呢，亦唔需要你嚟批核。愛唔愛國，我自己知就夠。

「信我啦，我真係好人嚟架。」
__________

一粒飛滋，已經有排你受。

三粒飛滋，簡直攞你命。

三合一，仲要比攞你命更難受。

飛滋遠去，才覺舒適安寧。

以上四句，「粒飛滋」可改作「個女人」，一樣意思。
__________

生果報今日列出十大古靈精怪恐懼症，其中一項係：

長單字恐懼症（Hippopotomonstrosesquippedalio-phobia）

睇完後，我都患上Hippopotomonstrosesquippedalio-phobia。

另，長單字恐懼症，睇落好似「單身大長今恐懼症」。
__________

樹枝長出青綠色的嫩芽，

春天真的來了。
__________

依家，一出街就已經感覺到春天嘅氣息，十八九度天，可以著短袖衫出街。開車時打開窗，享受微風輕撫面脥同身軀，不知不覺間，已達到高潮。

我愛夏天。
__________

一邊揸車一邊聽番一首舊歌，令我諗番喺十幾年前一班人一齊走堂一齊塞上一架車一齊聽歌一齊去玩嘅日子。

春日下嘅藍天白雲，同以前一樣，無變過。

六脈神劍

早幾日响契媽度提起六脈神劍同KY嘅微妙關係，諗住遲吓寫篇更精采嘅豪情文連同裸照乙幅投搞去三姑娘到碰運氣。點知，好衰唔衰，今日香蕉報就出咗篇「一陽指大戰生汁娘」。可知道六脈神劍乃係以一陽指為根基，依家條橋俾人攞埋，即係封我後路咁啫！

之後果篇，又話要初戀。

初戀？咦，邊個成日話要揾初戀呢？？

激氣呀，頂！
__________

早前呀媽番睇高陽嘅「紅頂商人」同「胡雪巖」，呀媽雖然讀書唔叻，但係佢都會睇吓醫療湯水書同小說。記得以前家貧，一家人住响一個二百幾呎嘅單位。有段時間，每當夜晚熄燈瞓覺時，媽媽就開盞小燈，坐响廚房度煲金庸小說，印象幾深架。今日，我同老豆發現咗呀媽攞咗「慈禧前傳」嚟睇，我哋都不約而同笑住咁話：「佢睇番佢嘅前半生呀。」

煮麵師傅

「雲吞麵唔該。」

侍應姐姐落單後，就向望住窗外發呆嘅煮麵師傅講聲。數秒過後，煮麵師傅先至有反應，放幾粒雲吞落鍋滾水度，再拎個生麵餅放埋落去，用筷子撩兩撩，十幾秒之後，撈起生麵放凍水過冷河，撈起雲吞放碗底，再將過完冷河嘅生麵放碗面，淋上湯兼放幾條韮黄，簡單快手一氣呵成，全無半點猶豫生硬。

煮麵師傅年少時已經好鍾意煮嘢食，發夢大個咗之後都要做廚師。憑住一股堅毅嘅決心，佢入咗一間著明嘅學院去學煮中菜同西菜。煮麵師傅其實對煮嘢食幾有天份，响學煮菜其間，已經受到導師嘅讚嘗。畢業後，煮麵師傅躊躇滿志，決心發明一啲新穎嘅食譜，進軍飲食業。煮麵師傅揾過數間大酒店或老字號餐館，由於煮麵師傅嘅新穎食譜太大膽，所以煮麵師傅都處處碰壁。一年過去，煮麵師傅仍未揾到一份可以自由發揮嘅工，而煮麵師傅嘅意志已經消磨得七七八八，最後，煮麵師傅就向現實低頭，响一間小餐館裡做一個煮麵師傅，一做就二十年。

响呢二十年裡，煮麵師傅曾經嘗試推出創意食譜，譬如牛奶士多啤梨燴麵、腐竹糖水炆羊腩、泰式酸辣涼瓜湯等等。食譜係經過煮麵師傅精心研究而成，而價錢較一般食譜貴，創意嘢，理應好好賺。可惜，日復日年復年，呢個食譜，無人肯叫。而煮麵師傅，始終都利用唔到呢個創意食譜，幫助自己同幫助餐館發圍。

煮麵師傅開始明白到，興趣同揾食，原來係兩回事，兼且唔可以混為一談。做生意嘅，一切都係顧客口味為上。顧客無論入去大酒店、老字號餐廳、抑或普通麵舖仔，佢哋心裡都會對所食到嘅食物有咗一定嘅期望。入到大酒店，佢哋唔會指望有煲湯豬骨食；去到老字號餐廳，佢哋唔會指望有新菜式試；去到普通麵舖，佢哋更加唔會指望有牛奶士多啤梨湯麵食。一碗普普通通嘅雲吞麵，保持得到水準，就已經足夠。創意，只係可以用响點樣打到啲麵彈牙啲、雲吞點樣可以整到爽啲、以及有咩可以替代果幾條畫龍點睛嘅韮黄，就係咁多。

話時話，碗雲吞麵，又幾得喎。

此時嘅煮麵師傅，又再望住窗外冷清嘅街道發呆，似乎係對自己曾經擁有過嘅天份、熱誠同執著，感到無限嘅唏噓。

粒粒辛苦

又走去唐人街食飯，坐定後，見到有兩男兩女又走入嚟餐館，坐响我前面張枱。一男一女面對住我，而另外一男一女，則背對著我。呢兩男兩女，講國語，來自國內，睇樣，一定係讀緊大學。當佢哋叫嘢食時，我又八八掛掛咁聽吓佢哋叫咩食。四碟雙拼飯加隻鹹肉糭。

望清楚面對住我果個女仔，白晳嘅皮膚，並無半粒暗瘡或雀斑。烏黑及肩嘅直髮，加對紅色粗框眼鏡，幾有氣質喎。當佢擰轉面時，見到鼻翼上有粒嘢反光，無錯，係鼻環。剔除鼻環扣黐鼻屎呢一part，女仔整隻鼻環，又幾野性嘅。

鼻環對我呢個電車仔嚟講，唔係好致命啫，不過最出事嘅，就係白晳皮膚加粗框眼鏡。呢個組合，會令我諗起一個皮膚白晳、紥咗髮髻帶住副粗框眼鏡嘅OL，身穿白色恤衫黑色半截裙加對兩吋黑色漆皮高跟鞋，低開胸口鈕，黑色喱士胸圍若隱若現，然後响公司度影印緊文件。仲有，最攞膽嘅就係，當佢除低副眼鏡再解開個髮髻，搖搖頭由得秀髮慢慢飄落時，真係有一股將佢抽上部影印機嘅衝動，然後隨住影印機出紙嘅節奏，搖動起來…

呢兩男兩女，傾吓講吓食吓，半個鐘唔夠就埋單走人。至於佢哋講咩？其實… 我聽唔到大半，北方捲脷嘅口音，我未聽慣。

佢哋走咗之後，睇睇佢哋張枱，嘩！乜食剩咁多飯呀呀女？！食唔晒嘅話點解唔叫一碗而要叫一碟呢？平兩蚊之外又無咁浪費，唔係抵啲咩？

其實，我係一個唔鍾意食剩嘢嘅人嚟，除非可以留番遲啲食，否則，如果見到有食物被浪費倒掉，我會有罪惡感。正所謂誰知盤中飧粒粒皆辛苦，你手頭上果碟飯，係經過農夫無限嘅心機同汗水種出嚟，而佢哋嘅收入，又係何等嘅卑微。而且，當我哋浪費食物嘅同時，又有無諗過，响世界某處嘅人，會視呢啲倒落垃圾桶嘅食物係寶？

唔知點解，有好多人出街食飯時，都視食剩嘢為正常。當佢哋見到有人清碟時，佢哋會投以詫異眼光，或者以嘲弄嘅語氣問句「你前世未食過嘢呀？」

細個時，我會感到好尷尬。依家？我會回應一句「下世輪到你囉。」

遊戲之夜

周不時，我同幾位朋友都會有個遊戲聚會。唔好以為遊戲係細路仔玩意，有啲遊戲嘅陰險程度，有時連玩慣辦公室政治嘅專家都攪佢唔掂。玩呢類圖版或紙牌遊戲，幾益智架，搞到我K又唱少咗，又有多啲機會同朋友交流。琴晚個遊戲聚會，我哋玩咗三個遊戲，分別係Ticket To Ride – Europe、Citadels同埋Scotland Yard。

Ticket To Ride – Europe係响一塊歐洲圖版度起鐵路。每人分發幾張鐵路起點同終點城市，然後儲顏色卡起自己條鐵路。當中會有人爭路霸路等情況發生，最好要隱藏自己嘅路線，以及預先諗定第二條路。琴晚我有條路線，只要起兩段經一個城市就到，點知俾人霸咗條路，害我兜咗個大圈經過六個城市先到。呢個遊戲唔會咁傷神，適合午夜十二點後玩。

Citadels係紙牌遊戲，目的係起夠八個總價值最高嘅地或。每人每圈可以揀做唔同嘅角色，然後順次序出場做佢揀嘅角色嘅嘢。雖然揀嘅時候你係唔知人哋揀咩，但係到你揀時，你可以睇到角色牌之中，少咗邊幾隻同剩番邊幾隻，同埋睇對手嘅牌面，估人哋會揀乜角色嚟做。角色有皇帝、殺手、小偷、商人、魔術師、法師等等… 每個角色都有唔同嘅功能，而且出場次序係經過精心安排，玩過後會拍案叫絕。呢過遊戲好玩攻心計，而且要玩得陰險，我覺得成年人玩先至玩到個趣味。

Scotland Yard係一個兵捉賊版圖遊戲，一人做賊五人做警察，警察要响二十四步內捉到賊人。賊人則暗裡行幾步，然後到某個時候就要揭露行蹤一次。而警察就要憑賊人嘅行蹤同所用嘅交通工具去圍捕佢。因警察所用嘅交通次數有限，所以要好好商量同部處。我諗過，好唔好玩無間道呢？哈哈。

玩呢類遊戲，幾健康架。
__________

有陣時，我幾佩服女人。

譬如，男人揸車。女人可以响旁邊不停咁教你點樣揸車，條路要點行點行。幾好，唔駛買GPS，慳番一筆。

男人揼木整圍欄，女人可以响旁邊不停咁講解工業安全，指定你用咩工具，教你點用鎚，跟住用咩步驟。而最好嘅，係當男人做嘢做到停唔到落嚟嘅時候，有人會到時到候叫你放Break。

男人去運動，女人可以不停咁話你知各項運動嘅危險性。去踢波？會斷腳唔得！去打籃球？會拗柴唔得！去打網球？會曬到生皮膚癌唔得！去游水？會浸親唔得！去篤波得喇掛？波樓雜又唔得！好啦好啦，就留响屋企啦！咁就乖喇。

做男人真好。
__________

有日同網友傾開，講懶剪指甲嘅問題。哈哈~

細個時我好怕剪指甲，一唔小心剪深咗就好鬼死痛。所以，到咗依家我會好怕見到指甲好細塊嘅手指，成日型住佢哋係咪剪深咗。OK，我知係天生，仲有好多人係咁，不過，心理陰影嘛…
__________

細細個時，每次同老豆呀媽呀爺呀嫲飲完茶後，總係有大事件嚟臨。不過最衰嘅係，我細細個已經慣咗要番屋企張辦公椅先至做得舒服。唔好問我點解，呢個世界有好多嘢都係無解嘅。今日同老豆呀媽出街食晏，食完後又嚟急call，於是趕快返屋企。但係星期六，條街上就充滿著只有星期六先出嚟揸車嘅人。所以，粗口響遍全程車，响車內嘅老豆同呀媽，就只有笑嘅份兒。急到我丫，頂！
__________

後加：希望在明天
終於揾到段片

深夜絮語

晏晝兩點幾，出街食飯。去到我去開果間燒臘舖，隨口就叫例牌嘅燒肉鴨飯。我成日嚟呢度嘅原因係除咗啲燒味好味外，仲有佢哋出手重，啲燒味好似唔駛錢咁，慌死你食唔飽咁。當我準備俾錢時，櫃枱姐姐話燒肉賣晒，一望，嘩！隻燒豬呢？真係唔見咗喎！好啦改叉燒啦。見師傅斬完大舊叉燒後再斬燒鴨，响鴨髀位上面斬咗舊鴨胸出嚟，然後斬隻髀俾我。好嘢有髀食，如果叫鴨髀飯，要加錢架，但如果無特別指定而佢又俾你嘅話，就唔駛加錢。响我後面果位菲律賓人，又要燒肉鴨飯。今次櫃枱姐姐同佢講話燒肉同燒鴨賣晒，吓？燒鴨又賣晒？嘩你真係好好生意喎，食到最後隻燒鴨髀，咁我咪好好彩？！再望望師傅，佢見舊鴨胸唔夠一份嘅份量，於是就斬埋俾我，睇到個菲律賓佬眼火爆咁滯，我即刻攞住碟飯鬆人，驚有人搶劫。

食食吓，諗起清明，隻豬咁早唔見咗，會唔會係有好多人買咗去拜山呢？又諗起，我口中嘅叉燒，又會唔會好似「見鬼」咁，俾啲幽靈舔過呢？

話時話，舊叉燒，又真係幾好食喎衰鬼…
__________

通常，當我獨自揸車嘅時候，會比載人時狼少少。

揸車綠燈等轉左，左軚呀呢度，到轉黄燈，預算對頭車衝黄燈尾，當佢衝完後，下意識放Brake。點知，佢後面條盲毛仲要衝紅燈，我即刻再踩Brake。當佢駛過我架車時，力啤我。咩事先盲丙？依家你衝紅燈，仲要話我唔啱？！你咁有心啤我，不如用心睇燈啦。我，無仇報，谷氣！

夜晚高速公路，快線行百三，追到前面架車，佢行百二，唔讓，貼佢尾，點知佢踩Brake行一百。頂你丫仆街玩嘢，揾到機會抽中線爬佢頭，然後以彼之道還施己身，快線行一百塞番佢。點知佢抽中線同我平排兼力啤我，當時，我又醒唔起用相機閃光燈閃佢，又無仇報，谷氣！

我氣憤，我記仇。如果我無還擊機會，我會不停咀咒佢哋，祝佢哋路上平安。
__________

今日，卒之買咗部自動相機仔，

從原始森林到繁華鬧市再到世外原野。
__________

家強同阿Paul嘅不和，
只要唔涉及佢哋嘅另一半，
要冰釋前嫌，
我睇，
問題不大。

我體會到，
要維繫一段十六年嘅友情，原來仲要計算衡量。
身為中間人，
有些小事，應為而不能為。
因為，
就算好少嘅事會有機會影響到大家嘅友誼，
我都唔希望發生。
面對一班識咗十六年嘅high school朋友，
我承擔唔起任何友情上嘅損失。
縱使，
我很內疚。

希望Beyond有重聚嘅一日。
__________

（啱啱寫完，隨機播歌嘅Winamp轉到呢道歌。駛唔駛咁呀依家？！）

貓朋戚友

呢隻惡型惡相嘅長毛摺耳貓，無錯，佢就係小虎個老豆，名字叫Sterling。虎老豆年輕時一拖四五六，快活過碌木。由於性事頻繁，現已力不從心，所以退咗休。而虎老豆就掛牌等出售等咗成年都無人要。我曾經想過拎埋佢返嚟架，不過呢，一諗到小虎咁惡，又唔知佢認唔認得佢老豆，如果小虎發起脾氣上嚟追住佢老豆嚟抦嘅話，都唔知點算好。打老豆，會俾雷劈架嘛…
__________

呢隻咁優雅高貴嘅短毛摺耳貓，唔駛講，一睇就知係同楚楚有關。其實佢係楚楚個女，名字叫Miss Congeniality。揚威好幾個貓展就係佢。Breeder到依家仲留住佢，鬼咩，幫佢揾咁多。
__________

同場回應三姑娘

Shopping精係男？！唔怪之得當優雅女生搭你同事拎花俾你果陣，你啲同事話驚俾人點相啦。

學識跳舞，要跳俾我哋睇果喎，OK？

迷失表參道（二）

市內同名大學宿舍某層的温習室內，有一名中國男與一名鬼妹正在趕功課。中國男與鬼妹原先並不相熟，只是在同一學科裡選取了相似的論文題目，所以便相約一起做資料搜集和一起撰寫論文。論文明天便要交給教授，所以今晚便要作最後衝刺，日出時把論文寫好。

半夜，中國男與鬼妹覺得肚空空，但又不想叫意大利薄餅外賣，因為先前的數個通宵已吃過數次，中國男便提議帶鬼妹去唐人街見識真正的中國餐。鬼妹來自偏遠的小鎮，沒有中國朋友，中國餐對她來說，只限於炒麵春卷厚粉炸雞球炒雜菜等等。一聽到真正的中國餐，鬼妹說了一聲好便穿起大衣，鑽進中國男的車厢，向唐人街駛去。

餐館裡，中國男與鬼妹同坐一起，可見他們已互有好感。餐桌上，放有牛肉炒河、雲吞麵、鮮蝦腸粉、奶黄飽以及珍珠雞。中國男向鬼妹解釋珍珠雞是由糯米雞演變而來，當中的材料有冬茹雞翼和中式腸，臘腸，是也。鬼妹聽了很受落，而中國男亦發現鬼妹大衣內仍穿著那件白色小背心。在這麽近距離的高角度俯瞰下，原來那奶黄飽是那麽的幼滑震撼。二人很享受這頓夜飯，彷彿坐在附近吵吵鬧鬧的夜歸青年和坐在遠處一角的夜班工人，也不屬於這個世界似的。

回到宿舍，他們繼續趕論文。但飯氣攻心，又怎能專心呢？中國男回味的，是那誘惑震撼的奶黄飽。鬼妹所思的，是中式腸何等滋味和模樣。二人對望一眼，彷似激出千萬伏特的電光火花…

剎那間，書桌上的書本論文功課，一塊兒被掉在地上。鬼妹和中國男，已相擁在書桌上，激烈地享受著屬於春青的荒唐。

明天的論文，在這一刻，還重要嗎？

獨孤九劍

唔知你有無試過，如果响街度有人向你問路，話想去某某餐廳，而你又好熟果度，你或者會咁答：

「嗱，你呢度向前行，第二個街口轉右，見到屈臣氏轉左，再行前一個街口，過馬路後轉右，之後沿住條路行，一路行就會到架喇。」

咁，如果佢再問一句：

「咁街口轉右見到屈臣氏果條街叫咩街呀？」

「咁……我唔記得喎…不過咁行就一定會到囉。」

試過未？

當初你第一次去某某餐廳時，你總會揾吓點樣去，記吓呢條咩街，然後响邊條街轉右，邊條街轉左咁咁咁。但當你行熟咗果一區嘅時候，你跟本就唔需要再記呢條係咩街果條係咩街，好隨心咁行就自然會行到目的地。

金庸小說「笑傲江湖」裡，有一套劍法叫獨孤九劍。獨孤九劍，係講求一個「悟」字，將口訣劍式融會貫通，以無招勝有招。不過，大前提係紮好根基，熟讀口訣同學會各種劍式如破劍式破刀式破槍式破鞭式破掌式等等。「等到通曉了這九劍的劍意，則無所施而不可，便是將全部變化盡數忘記，也不相干，臨敵之際，便是忘記得越乾淨徹底，越不受原來劍法的拘束。」

先前揾路嘅例子，就好似獨孤九劍嘅要旨一樣。當你熟晒所有街道，無論你好隨意咁轉左轉右轉左再轉左，抑或合埋眼咁轉右轉左轉左再轉右，你唔駛理邊條街打邊條街，你都會去到目的地，因為，你已經將果一區嘅環境融會貫通。

獨孤九劍嘅要旨，用响任何地方都一樣，包括影相。

有好多人好隨意咁拎起部相機仔就可以影到幅好簡單但好有感覺嘅snap shot，其實當中可能蘊含咗大量嘅基本功，呢啲基本功可以包含構圖燈光色調色温景深等等。佢哋响可以好隨意咁影到幅靚相之前，可能係經過好多學習同經驗，先至可以將技術融會貫通，隨手就影到靚相。野孩子、光圈先生、蔣雅文、黑米等等都係固中高手，我成日都靜靜咁走去佢哋個blog度偷師，我都知我仲係响死記基本功嘅階段，比起佢哋，我仲有排學。

楚楚動人

深夜時份，當我用緊電腦，我在乎果隻楚楚有時會走去我後面張梳化背枕上面瞓覺，好鬼可愛，呢隻貓貓真係好黐人。

大約四年前，我去接小虎返屋企時，順便响breeder間屋睇吓其他貓仔。當時，正當其他貓仔周圍攪攪震嘅時候，有一隻白毛橙紋嘅貓仔好靜咁走咗上我大脾度坐。我問breeder有關呢隻貓嘅嘢，佢話呢隻貓大過小虎廿幾日，係佢响另一個breeder度買番嚟配種嘅。由於呢隻貓好乖，所以對佢印象好深。呢隻貓，當然係楚楚啦。

「好啦楚楚，我要帶小虎走啦，同佢講聲拜拜啦好無？小虎呢？走咗去邊呀…」

「砰！」

「……」

响果日同楚楚道別後，我就無再去探過佢，只係响breeder個網頁度睇佢啲相。後來楚楚生咗一竇貓仔，好靚架佢哋，有一隻仲响幾個蘇格蘭摺耳貓貓展中大出風頭。做呀媽嘅楚楚，都可算老懷安慰囉。

我知道，breeder通常都會响貓女三歲嘅時候俾佢退休，幫佢揾番頭好人家，等佢可以安享晚年。當楚楚兩歲半時，我就聯絡breeder話希望楚楚退休後可以收養埋佢，始終，我仍念念不忘當年既天真且儍嘅佢坐過我大脾仔，我覺得同佢係有點點嘅緣份。

愛貓嘅人，大多都會提倡去愛護動物協會度領養貓貓。當年未決定買小虎之前，我曾流連愛護動物協會無數次，最後睇中咗一隻三歲大嘅灰毛貓。當我申請領養時，協會個審批員因為一個好白痴嘅理由拒絕咗。當我搞掂咗呢個白痴理由嘅時候，隻灰貓又俾人領養咗。一氣之下，我就走咗去breeder度睇貓，卒之買咗小虎返嚟。

幾個月後，breeder拎咗楚楚去做絕育手術，之後我就帶咗佢返屋企。當時嘅楚楚，又瘦，毛又疏落，鬼咩，同十幾隻貓一齊爭食，想肥想靚都幾難。楚楚嚟到後，慣性好明顯同小虎唔同。小虎三餐定時，滋油淡定。而楚楚呢，隨時行過貓兜就食，食得都幾擒青架，梗係當時迫出嚟嘅慣性啦，食得慢？等聽朝啦呀姐。

依家嘅楚楚，已經唔會坐人大脾囉，佢只係會跟住人周圍行，享受人撫摸佢，但抱抱就唔得，不過佢永遠都唔會攻擊人，純到死。有時當小虎發脾氣時，會追住佢通屋走。一日食好多餐，仲會食到啲糧周地都係。不過，佢確實係靚咗，毛又厚咗鬆軟咗，而且身體仲日漸膨脹。

「楚呀楚，你又食嘢？你睇吓你，肥到襪都著唔落啦（註）！」


註：「肥到襪都著唔落」出自賭王何生，用嚟形容地產商嘅財政狀況。

晨早幾段

見那女子，坐在吧枱前，一盞射燈照在她那微卷的頭髮上。拿起倒三角形的水晶杯，輕輕呷了一口馬天尼，緩緩地放下。手指正解開白色恤衫的第二顆鈕扣，然後從皮包裡拿出一跟香煙，用精緻的銀色打火機燃點，深深一吸，閉上眼，然後徐徐地吐出一縷輕煙，手托香腮，若有所思。黑色套裝裙下曲線玲瓏的小腿，佩上黑面紅底三吋高跟鞋，緊緊地繞著，美極了。
__________

呀三姑娘話呀契媽兵姐似利嘉兒。

但我總覺得，契媽相中的一雙眼，好似無記新聞記者方健儀。
__________

三姑娘不設留言服務，但睇完佢篇自我認識工作版後，有嘢想問。

究竟，四十五度骨嘅資信，係咪有全職或特約記者深入x穴以身試法嚟攞料嘅呢？費用又係邊個支付嘅呢？
__________

工作地點關係，辦工時間日夜顛倒。半夜嘅市中心，冷冷清清，完全係另一番景像。唐人街只有幾間餐館開到咁夜，入去食嘢，有時會唔知食乜。如果係咁嘅話，我就會記番起一啲博客朋友提起過嘅食物，跟住嚟叫。繼早前食過叉油雞飯之後，今晚我同侍應講：「叉燒飯，半肥瘦，多色，唔該。」
__________

同同事出去食飯，佢用國語點完嘢食後，到我用廣東話。我發現，突如其來嘅南北雙聲道，侍應總會窒一窒，都幾搞笑。二十年前嘅移民潮，嚟親嘅都係香港人。依家，香港環境好，嚟讀書嘅一群大部份回流晒返香港。國內開放，又有大批移民湧入。响我公司果三個國內人，做嘢幾掂，份人都幾隨和友善。我以前覺得，响呢度生活，唔識英文無問題。但依家，我就覺得如果唔識國語，生活都幾唔方便架。國內輸出嘅人材，有啲人氣美女都幾出名，鞏俐章子怡揚威荷李活，又有渣老闆極喜愛嘅熊黛琳打入模特兒界，而周迅董潔李冰冰等等咁有氣質嘅女仔，都係我嘅心頭好。隨住國內大量人材流入世界各地，都係學番啲普通話傍身好。

守門員的前半生

注意：
呢篇文超長，而且還未寫完。
080312 上半場加映：「無糖童話」，但仲係未寫完。
080312 已更新，加入聯賽篇，但都仲係未寫完。
080313 下半場加映：「兩個世界的接壤點」，都仲係死唔斷氣。
080313 已更新，加入助教篇，全文完。


早前响雅虎香港新聞看到意大利費倫天拿門將Sebastien Frey一篇訪問，佢話：

「我一直相信，選擇以守門員為職業的人，腦袋都是不正常的。不過作為把守球隊最後一關的門將，我實在很享受被皮球擊中的感覺，因為這表示自己又救出了一個攻門。我喜歡與眾不同，渴望擔任球場上獨一無二的角色，唯一令我不舒服的，就是當守門員捱冷的機會永遠比別人多。」

絕對同意。

我好鍾意踢足球，好享受呢種運動所需要嘅團結性而帶俾我歡樂同滿足感。球場上，我司職守門員。點解有前鋒唔做要做守門員呢？我嘅答案，同Frey所講嘅一樣：享受被皮球擊中的感覺，渴望擔任球場上獨一無二的角色。

不過，當我初初接觸呢種運動時，大約中一左右，我係好唔希望做守門員嘅。講真，以當時咁嘅年紀嘅波牛仔，有邊個唔想做射手丫？就算當時嘅波牛仔長大到依家嘅波牛佬，一樣都係無乜人會肯做守門員。我點知呢？從我參加咗十幾年足球聯賽嘅經驗，睇到有好多球隊都渴求一個守門員就知。咁，點解又會無乜人肯做守門員架？好簡單，話明踢波，踢，梗係要用對腳踢個波入個籠門先至係架嘛，用手接波，我不如去打籃球！所以，一班人踢波，如果無人肯做守門員，就會有條不成文嘅規舉：腳法最差果個去守籠。咁，我就好唔情願地，被人推咗去做守門員。果時我嘅心情，講真，好差架，好似俾人排斥咁，唔好受，因為，當時人人嘅心態就係：守門員，係被人睇唔起嘅位置，做得守門員，就等如同屎人、屎波，畫上等號。

後來玩玩吓，俾個波省吓省吓，又覺得呢個位幾好玩。果時，我開始明白到，踢波，唔係一定要用好好嘅腳法去踢個波入籠門先至有成功感，有時俾個波省一身，一樣都咁有成功感。而且，要贏波，一定要有一個未必有上乘腳法、更有可能係連波都未識揾腳控嘅屎人唔怕食波餅先至可以成事。

移民後，認識到一班同學仔，而呢班同學仔，有啲好鍾意踢波，放學就會走去學校個球場射吓籠門斬吓波咁，然後就去食雪糕。我哋呢班朋友，感情好好，雖然有幾個朋友對足球興趣唔大，但係我哋都會以一齊圍喂餵去食雪糕為餌誘，氹佢哋去玩。久而久之，每當我哋去踢波，都會預埋佢哋。玩得白痴唔緊要，我哋最享受嘅，係一班人一齊笑一齊分享歡樂喜悅嘅感覺。

我哋呢班朋友之中，有一位係教會中人。有一年，佢個教會搞咗個足球教會杯，問我哋參唔參加。我哋呢班未見過世面嘅後生仔，當然欲欲想試啦。我哋呢班人，夾雜住一啲識踢一啲唔係好識點踢嘅人，就憑住一股熱誠，向呢個教會杯準發。

或者，當時參加呢個教會杯嘅人，年齡相若，水準唔係咁高，我哋好好彩咁打到去第二日嘅準決賽。唯一不幸嘅，係我哋一位小個子前鋒，整傷咗隻腳，準決賽同決賽果日，佢甚至要留响屋企休養。

記得响準決賽果場比賽，我哋同對手打和，要互射十二碼分勝負。呢種分勝負方法，係最殘酷又最無可奈可嘅解決方式。一輪互射後，唔知邊度嚟嘅幸運同勇猛，我竟然被三省吾身，擋出三個波。原來，一個曾被睇唔起嘅位置，竟然會成為贏波嘅焦點。我哋呢班人，就憑住呢個氣勢，贏埋個教會杯返嚟。

我哋捧咗呢個杯之後，唔係即刻各有各散或者去食嘢慶祝之類，而係一齊擁咗去先前因傷整親腳嘅小個子前鋒屋企，同佢一齊分享呢份喜悅。而呢位小個子前鋒，之後更成為我最好嘅朋友，一直到依家。

踢完呢個教會杯幾年之後，有個uncle話佢隊波爭一個守門員，與其無人守，就叫我不如去企吓玩吓啦。我話好，就去咗玩。於是，我就第一次踏足業餘足球聯賽。


**********

上半場加映：無糖童話

（無… 七十樓改篇楊學德呢個童話嘅template，好好用咁啫…）


半夜…

動物園裡…

月當頭…

某條樹枝上…

坐咗三隻動物…

小箭豬：「火闌鶴哥哥，講個故事俾我哋聽啦，你好耐無講啦～」

扮豬狼：「係吖講啦呀鶴～」

火闌鶴：「嘿嘿，要我講故事？得～唔係唔得，不過呢～」

扮豬狼：「你又嚟？咪衰衰咁啦～」

小箭豬：「好好好，火闌鶴哥哥你又風流倜儻又玉樹臨風，你咁醒，就講個故仔俾我哋聽啦，其他人啲故仔硬係無你啲咁好聽架囉～」

火闌鶴：「好啦，見你咁口乖，就講個故仔俾你哋聽啦！

從前，有位相貌生得老成持重嘅後生仔，一畢業後就去咗一間學校度作育英材。由於佢作風嚴厲，成日痛斥啲女學生唔聽話，最後，佢就榮升咗做罰導主任。

好，講完。」

扮豬狼：「吓？就係咁？無理由嘅，呀鶴快啲講埋落去啦～」

小箭豬：「吚，好衰架，又要人講！你又風流倜儻又玉樹臨風，你咁叻，講埋落去俾我哋聽啦～」

火闌鶴：「好啦，見你哋咁乖，我繼續啦。

罰導主任經歷咗數十年嘅教鞭生涯後，發現依家嘅年青教師同班學生打成一片，而佢古舊強政勵治嘅教學方法好似好唔管用。於是，佢竟然痛斥埋果班新進嘅年青教師，仲叫啲學生唔好聽佢哋話。

好，講完。」

小箭豬：「．．．．．．」

扮豬狼：「．．．．．．哥哥，咁個故事其實有咩要旨呢？」

火闌鶴：「無，你哋有無留意有某一種人好鍾意拎住支籐條扮權威呢？」

小箭豬：「咩喎…」

扮豬狼：「．．．．．．哥哥，個故事係咪真架？」

火闌鶴：「個故事可能係真嘅，又有可能唔係。但其實我想講嘅故事又唔係呢個故事囉。」

..........

是夜，聽個呢個故事嘅動物，都發惡夢。

**********


呢個聯賽，係市內出咗名高水準嘅華人足球聯賽，大部份嘅年青球員，腳法好跑得快又夠氣力，當中，更有一啲响香港或國內曾經踢過職業嘅球員。Uncle呢支球隊，骨幹係由一班曾經响香港六七十年代吒叱一時嘅老波骨組成。呢班老鬼，體力可以話無晒，但依然有腳法，長短傳準繩，射波有腳頭，而且，仲好好火添。初頭，我以為呢班老鬼只係想落場郁吓，活動吓筋骨咁啦。點知，我錯咗。佢哋因為就係曾經風光過，所以如果輸咗俾啲後生仔，佢哋唔多唔少都會心有不甘，操口連篇，連祖宗都要挖番出嚟鞭屍咁滯。應付咁高水準嘅聯賽，缺乏經驗、技術仍幼嫩嘅我，成日失波。呢班老鬼，就不停咁將廣東話果幾隻操口字眼，靈活運用响每一句嘅說話之中向我表達不滿，場場如是，講極都仲有新詞新句新配搭。佢哋越鬧，我就越慌失失，輸多好多無謂波。越輸得多無謂波，佢哋就越多操口。响呢種環境底下，我覺得我真係好屎，每次踢完波都俾人踩一餐，然後垂頭喪氣咁返屋企，為乜呢？

被彈到一文不值，我好想放棄我呢個興趣。當時我成日思想爭扎「嗜好嚟啫，駛唔駛受氣呀？又唔係返工受人二分四，跟本就唔需要忍…」但係，我真係好鍾意玩，唔捨得放棄，所以就繼續落去，你話我犯賤都係咁話。

兩年後，有支新球隊加入，但唔夠人。終於，呢班老鬼就將我俾咗呢隊波。我，有被遺棄嘅感覺。

去到新球隊，領隊係一個好好耐性嘅人，佢明白到新球隊需要磨合，輸波從來唔會發脾氣，仲會鼓勵我哋，然後同我哋一齊檢討有乜過錯。除非你落場時唔認真，否則佢唔會鬧人。佢睇嘅，唔係輸贏，而係你有無心去踢。呢個時期，係我開始重拾信心開始成熟進步嘅階段。之後有機會再對戰班老鬼，雖然都係輸，但輸得唔難睇，起碼，佢哋都對我嘅表現感到愕然。領隊令我明白到乜嘢係熱誠，佢除咗會尊重每一位球員外，仲會教人鼓勵人進步。原來，每年嘅足球訓練營，佢都會去教小朋友踢波。

幾年之後，我踢大學杯時識咗一班新波友，就咁，我就同佢哋一齊去踢另一個本地華人聯賽，踢到依家。當然，我哋會加入新血，話晒我哋都開始老，點都要啲後生跑吓嘅。出奇地，呢班後生同我哋幾夾，無論响場內場外，可以玩到好癲。球隊嘅成績幾好，雖則我哋唔係職業，只係有興趣玩，但起碼我哋可以俾人睇到我哋係識踢、有sense、有組織。我亦知响我上面，有無數咁多人會守得好過我好多、經驗多過我好多、反應快過我好多、跳得高過我好多、出迎時間準過我好多等等… 但我同佢哋都有一個共通點，就係企咗出個球場，就算對方係咩強隊，我都唔會怯場，而且我會用盡我所能，帶領我條防守線，破壞對方嘅攻勢，唔會俾對方咁容易打倒。

响呢個聯賽裡面，我識咗好多人，依家同每隊波嘅人都係friend咁滯，响球場上打生打死，完場後就攬頭攬頸，關係幾微妙，不過又幾開心架。舊年夏天某日，同另一個球隊領隊傾偈，呢個領隊同我差唔多年紀，同佢幾啱傾架，佢呢，一路都搞開一個慈善組織，問我可唔可以幫吓佢手。我答應咗，於是，响舊年夏天，我就開始去教小朋友踢波。


**********

下半場加映：兩個世界的接壤點

（無… 怒火媽以此為題那篇文寫得好好，寫字唔係我強項，拾人牙慧我就…咁囉…）


回家上網，總會細看喜愛的博客，有些博客的文章裡，會有一些長篇留言，還有網址及照片，大概暗示高質素交流是應份的。

可是，何謂高質素交流，我不認識。終於按捺不住，到某幾位博客網址看個究竟。咦，看看名字，還好，容易記。但其實除了名字，我對他／她如何有質素並不十分清楚。我只知，合自己口味，和不合自己口味。

寫作，原來也有階級。

高質的你，成為寫作界權威，小圈子玩意，看不起同行，我不認同。你可以痛罵我爛，我可以罵你目中無人。但最根本的原因，也許是你我沉醉在同一網絡下的兩個世界。

這些網址，我曾看過，還留過言，總算應付得來。但這裡不是我的街坊鄰理，留了言，還不及留在街坊裡的一兩句佻皮話那麽親切。這一個留言，相信會成為我在這些網址內的最後一個留言。

這些博客，日吐萬字就如我向人問過好吧，今天和我在乎的說聲旅途愉快，明天不若和我偏愛的問句你還好嗎。是日常家常尋常，不是低質也不是爛。也許，這種交流方式，他們大概也會對自己偏愛在乎的人做吧？

網絡如是，房子也一樣。

豪宅別墅間間幾千萬，富豪名人只當屋子是投資工具或禮物轉贈愛人。中產或低收入人士，卻為自己的住所節衣縮食或狠下心腸或放下尊嚴，那屋子的機會成本，高得難以相信。

當然，有能力購買自己的房子，也不錯，只要那些富豪不會以本壓人就可以了。我也時常提醒自己，我跟這些富豪是同一天空下兩個世界的人。

兩個世界的接壤點，原來不過是一個網絡，幾層房子。

**********


波友個足球訓練營果度，係由一位主教練帶兩至三位助教去教導一班十歲以下嘅小朋友踢波。我所擔任嘅角色只係助教，幫手睇吓啲小朋友有乜做錯咗嘅地方，然後教番佢哋正確嘅做法。雖然我係守門員出身，但基本功夫都有，對於指導一班小朋友，我都可以應付得嚟。响教導嘅過程中，我發覺我都有所得著。有時聽吓主教練講嘅，跟小朋友練吓玩吓，我都覺得自己有進步。睇小朋友踢波，見佢哋個個都笑住嚟踢，完全係發自內心嘅歡樂，完全係真正享受足球呢種運動，雖然佢哋係踢得亂啲，無乜組織，但係佢哋有熱誠，睇佢哋玩，我真係幾開心，我更加唔覺睇佢哋踢波會令我退步。

或者，有啲人會視足球為揾錢嘅工具，我對呢樣嘢並無意見，人總係要揾食嘅。但係，如果你係靠足球為生，就請唔好睇唔起呢項運動。你唔提携、唔鼓勵啲小朋友唔緊要，你見到啲小朋友亂咁踢不堪入目內心妖聲四起都唔緊要，但請你唔好出聲踩人當幫個忙。你呢種行為，同班老鬼當初辱罵我一樣，會令一啲有熱誠嘅人好洩汽。

Sebastien Frey最後話：

「也許世上每個守門員，骨子裡總是帶點神經質吧。」

俾我講，除咗神經質外，我還會加多句：

「內心還有點火。」


（全文完）

學地球文

如果我哋要去驗証一樣嘢係好係壞，通常我哋都會去做吓實驗作全面分析。譬如，有十間餐廳，要分出邊間餐廳啲食物好食，最正規最專業嘅做法就係去每一間餐廳，試勻所有餐廳嘅招牌菜，先至作出判斷。

影評人，去評論一部戲，佢哋嘅做法係身體力行，親身去睇完某部戲，先至作出係好定壞嘅評語，佢哋唔會因為導演同幕後老細係咩人而偏心某部戲。

影評人要持平地作出「高質素」嘅評論，就必需要睇好多好多嘅戲，無論啲影片係科幻、驚慄、傳記、劇情、搞笑、無厘頭、卡通等等等等。

如果一個人咁講：
「我唔多睇搞笑無厘頭呢嘅電影，好奇怪，我從事電影行業，我好少去睇戲，皆因無乜好睇，係我認識電影工作太清楚，幕前幕後，無咗神祕感。或者覺得無乜水準，不如唔好睇，無眼屎乾淨盲。」

如果真係有人咁講，我就會咁諗，究竟呢個所謂嘅專業電影人，既然唔多睇搞笑無厘頭電影，又好少去睇戲，咁佢憑咩話自己認識電影工作太清楚呢？即係好似一個唔多食嘢嘅人，佢又憑咩斷定佢自己鍾意食嘅嘢係最高質素；而佢唔食嘅嘢，佢又點知道果啲嘢係無水準呢？

或者，佢真係有去睇搞笑無厘頭電影而自己唔認睇過。

我上兩篇講提過一個例子：
「有好多人都話無幫襯過楊生嘅產品，究竟，呢個point係想表達啲乜？說穿了，只不過係想表達自己聰明眼光獨到，並不會被既儍既天真嘅包裝呃到，而自己乃係一股污泥中嘅清泉。」

呢種人，首先會同佢哋認為低品味嘅唱片劃清線先，將自身抬高，有可能佢哋連呢啲唱片都未聽過就話低品味。然後，選兩張經典嘅唱片加以奉承表揚，做出一種好專業嘅形象，然後就睬低果啲佢哋認為低品味嘅唱片為爛唱片，多聽無益。再睬低果啲聽呢啲唱片嘅人為爛人。

又係果句，既然佢話無幫襯過呢啲唱片，咁佢又憑咩話呢啲唱片爛呢？

兩張好多人都鍾意聽嘅經典唱片，又何須佢嚟燙金呢？更何況，佢又話無比較過金同鐵嘅分別。

用專業嘅包裝去寫評論，但其實視野狹窄，目中無人，不可一世。
對，博界光怪陸離，乜嘢事乜嘢人都有，入得嚟，個個都係火星人學寫地球文，我同你，都唔例外。

遺忘之火

講開睇blog，我blogroll啲blog我真係會一日睇幾次。呢啲blog有咩咁吸引到我一日睇幾次呢，除咗見解精僻言之有物外，仲有留言版同一啲好主觀嘅因素，呢啲主觀因素包括blog主嘅生活瑣碎事呀、感受呀、幻想呀、烏龍事呀、隱喻故事呀、愛情事呀、照片呀、歌喉呀、甚至性事…咳咳…等等，睇完後，都覺得同blog主有咗好生活化嘅交流咁，姑勿論留言係長篇嘅理性討論，抑或係一兩句佻皮話或閒話家常，都會有同blog主嘅距離拉近咁嘅感覺，呢個就係blogging吸引人嘅地方。
.....

探討社會問題，無疑係高質素嘅blogging材料。但如果全個blog都淨係以此為材，感覺就好似睇報紙咁，少咗份屬於人性交流嘅温暖感。
.....

有時我諗，我欣賞人啫，或者人哋跟本就不屑有我呢一個讀者。就好似有啲大牌明星咁，明明係唱歌做戲俾人睇嚟謀生，但又睇唔起果班用真金白銀支持佢嘅觀眾粉絲。
.....

大牌明星有咁嘅心態，係因為佢哋認定咗自己係處於一個地位比大部份人高嘅位置，先至可以睇唔起人。
.....

高班嘅搖滾音樂人，除咗期待遇到真正識得玩搖滾音樂嘅高質聽眾外，仲會希望利用自己嘅音樂，去薰陶一啲唔識得音樂但又對搖滾音樂有興趣嘅樂迷，一視同仁，唔會嫌棄每一位支持佢哋嘅人。
.....

有高質素嘅音樂，但音樂人無高質素嘅心境，就係先前提過嘅大牌明星。
.....

大鐵鎚成日話自己白字連連文又寫到好似成pat屎咁，唔明點解啲人仲咁鍾意睇佢。喂，我一日睇你十次，你咁講，咪即係話我好鍾意食屎？！我好hurt果噃！
.....

我唔希望話我自己寫啲嘢爛，咁樣，我太對唔住每日都有嚟嘅朋友。
.....

希望契媽寫番「夕陽西下」。
.....

依家契媽寫啲嘢，好似睇報紙咁，好冷冰。
__________

果十個少年，上完庭後仲嬉皮笑臉，不知悔改。
呢篇，睇到我想打人，初次咁撑呢位blog主。
呢篇，睇到我想喊，初次同呢位blog主打聲招呼。

大懶神功

火賢姐，我練緊大懶神功。
__________

小朋友憶憶，我慼慼
我鬱鬱，皆因你封筆
__________

睇番自己嘅舊文，點解我以前會寫到論文嘅呢吓？
__________

寫blog對我嚟講，係互動嘅。讀到你寫乜，攞到靈感就寫。我讀，因為我想認識你。我寫，因為我不甘寂寞。
__________

咩事呀！一個二個話走就走！
__________

依家嘅後生，成日話計唔掂條數結婚生仔。回想起以前，老豆揾錢唔多，長期响貧窮線以下玩浮潛，仲要孭住一個老婆揪住兩條化骨龍，咪一樣游到上岸。咩事呢依家？
__________

自問凡人一名，早早就應該聽聖人嘅勸喻，唔好睇明星相。死啦依家，出事喇，WINAMP次次播到孖女嘅歌我都會skip，唉…

有好多人都話無幫襯過楊生嘅產品，究竟，呢個point係想表達啲乜？說穿了，只不過係想表達自己聰明眼光獨到，並不會被既儍既天真嘅包裝呃到，而自己乃係一股污泥中嘅清泉。

評論別人虛偽，無需借人哋嘅種種把自身抬高。
__________

唔要Wii，我要PS Three！
__________

暗紅月影

月亮也嫌棄我，躲了起來。

中二時看過衛斯里的「紅月亮」，內容已不太記起了。

到現在，我才第一次看到紅月亮。

很特別的年宵節。

靜夜幾句

關於虛偽嘅討論，真係多看無益。好多時踩場嘅人嘅著眼點，係响人哋嘅文字中揾破綻，然後加以抽稱，距離原本主旨十萬九千里遠。
__________

响師兄度揾到小克番，開心咗成晚。妙手熊貓勁爆笑，可能係我咁啱貼咗首蘇永康 X 黄尚偉嘅情歌啦。
__________

呢度，翻版DVD新戲賣兩蚊，但疑似藝人相片CD就賣四蚊，咁好賺？
咪以為買翻版DVD係中國人嘅專利，假日嘅唐人商場，真係好似鬼門關大開咁滯。
__________

早兩年有個女性朋友參加咗渣打馬拉松，我本來唔知架，係翌日佢見報我先知。鬼咩，著到咁性感，唔影佢就奇！

我知，响我個博客欄度，有好幾位會去跑渣打馬拉松。我覺得呢，平時有操開嘅，先好去玩囉，好多人都高估咗自己嘅體能，年年都見有人被抬出嚟，何苦呢？仲有，如果跑嘅目的唔係為咗純綷運動而另有「政治」目的，算把啦。

各位將會跑嘅朋友，請務必小心，量力而為。
__________

今年將會被人用到爛嘅詞語：疑似。
__________

打波嘅時候，見到敵方球員有挑釁性嘅舉動，都有收佢皮嘅衝動。不過，到有機會落手果刻，又會於心不忍。
__________

零晨四點半都唔想瞓，又咩事呢我？

今夜很寧靜。

迷失表參道（一）

一襲鮮紅色吊帶連身短裙

四寸高跟鞋

把那修長的美腿表露無遺

頑皮的手指

微微掀起裙端

那來的一陣清風

把一縷的金髮和裙子吹起

身驅隨風擺動

桃紅色微張的唇

呵氣如蘭

誘人的眼神

像要把靈魂攝進去

這一刻

理智已在頃刻間完全崩潰

不由自主地飛縱峽谷

只想身貼身

唇貼唇

把驅體一同溶化

.

.

.

.

.

「嘭」

此時才發覺

原來我和她

隔著一片剔透的水晶

垃垃雜雜

好耐無出文，有好多垃垃雜雜嘢，學呀微小C咁寫先，做個概括。
____________________

細細個果時要做作文功課，老師要求一百字連標點，寫滿一版十乘十格仔嘅功課簿。當時嘅我，一味死拖唔肯做，最後由老豆作文我照抄。抄到最後，發覺篇文多咗兩隻字，於是，我就唔鬼寫埋果兩粒字，工工整整寫夠一版算數。最後，當然俾老豆老母鬧咗一餐，屎懶鬼！

「咩喎！老師話寫一百隻字咋嘛，咁咪夠囉！」

當時懵盛盛，又點知爭兩隻字，成篇文就斷晒啫。

懶呢家嘢，由細個開始，一直跟到我依家。
____________________

瑞士蘇黎世，一間博物館被人強搶四幅印象派油畫嘅真跡。究竟，如果我想睇番呢幾幅畫，可以點呢？睇贋品？

為迎接零八奧運，中國政府將一眾歷史古蹟大修，包括故宮頤和園天壇，整到好似新嘅一樣。

韓國國寶祟禮門被人縱火燒毁，政府預計三年後先可復修。

究竟，將歷史古蹟復修重建，我哋睇嘅仲係唔係古蹟文物？
____________________

今年幫呀媽手整咗三次馬蹄糕，整就唔難整，不過攪勻佢呢就攪到我手軟，差啲揸唔到筷子。純馬蹄粉無糖兼超多馬蹄，街邊貨點有得比？
____________________

細個時住果度，每到新年都有好多醒獅嚟逐家逐户拜年攞利是，間中仲會有人偷雞燒炮仗，過年氣氛好到呢…
____________________

不雅相呢單嘢，睇完，嘩覺得好正喎，咁咪算囉，無乜值得講。萬9幾個觀點講道德虛偽問題，S9H啦。

呢單新聞，睇滯咗我。
____________________

噢，有篇文貼咗堂。

嗯，多謝小珠。
____________________

以前响別人個blog度留言，總係長篇大論。依家，一兩句講吓笑就算。

咩事呢我？
____________________

聰穎嘅契媽要走，留到留佢唔住，希望契媽一切安好啦。
____________________

三個星期內四場雪暴，累積了七十厘米降雪量，仲有一個嚟緊，周未就殺到，今年剷雪持別多。

香港持續寒冷咗廿幾日，距離落雪嘅日子，還遠嗎？
____________________

漏網之魚

呢段新年賀詞，係俾一班摺咗blog或休blog或唔開留言信箱嘅網（朋）友，即係呀D呀、喵呀、大鐵鎚呀、三點呀、男人呀等等。祝你哋新年行大運，事事稱心如意，如魚得水，雨過天青，百無禁忌，大吉大利，恭喜恭喜！

豺狼兄、阿思仔：
多謝提點，改咗啦。

純真歡欣

下班回家百無聊賴，在網上流連徘徊數百個圈子，喜愛的博客網誌也來回重覆細閱數十遍，在彼邦夜闌人靜時，縱使夜光珠也會與丁亥年最後一輪圓月作伴，為漆黑的夜空添上一道光芒，但愁懷慵懶的心也驅使淺淺的夜光逐漸轉淡，最後也不勝倦意，徐徐睡去。此時此刻，又有誰會為自己的花園裝飾點綴一下呢？

躺在新沙發上看電視，黃昏前的節目總是沉悶的，不知不覺中，已與周公子作伴，吟詩作對去也。

周公子此時穿上一套筆直的黑色禮服，純白色襯衣，結上黑色蝴蝶形領結，黑得發亮，神氣非常。圍著周公子的，還有一眾相識於微時的好友，個個衣冠楚楚風流倜儻，與其為伴，一丁點鶴立雞群的感覺也沒有。

那邊廂，一位穿上珍珠白紗裙的女子被一群姊妹簇擁著。也記不起該女子是不是一位大美人了，貌美與否，那又與我何干呢？

房間裡充滿著一個個色彩豔麗的氣球，姊妹們看到後興奮不已，歡欣地叫嚷著，手舞足蹈地拍起倒在地上的氣球，一刻間，千個氣球在房間裡隨著姊妹們有節奏地舞動的纖手上上下下漂浮著，充滿了美感和動感。而姊妹們臉上喜悅的笑容，是那麽的天真活潑，完全是發自內心最純真的歡欣。

此情此境，本應使這班男子看儍了眼。但這刻，我卻幽幽地對著我的友好嘆道：

「是不是經歷過太多的驚喜，麻木了，所以現在便很難投入最簡單、最純真的歡樂呢？」

未等及好友回答，周公子已和眾好友姊妹遠我而去，只留下我孤獨一人，繼續尋找答案。

周末推介

請耐心觀看以下片段，尢其你有部Wii。

買咗呢個軟件，再用喺呢度...

嘩嘩嘩!!! 正呀師兄!

虎楚近況

首先講講我在乎嘅呢隻：


自從佢病完後，就非常好胃口，一日可以食十餐，肥咗幾磅，毛又鬆咗厚咗柔軟咗。一樣都係俾另一隻恰，不過佢又俾另一隻影響到喎，學咗少少衰嘢，依家曉還拖，開始有正能量，不過就淨係對貓唔對人。肥且暖，又黐人，冬天恩物。


跟住就講我偏愛嘅呢隻：

無乜點變，一樣咁曳。任性刁蠻，唔耐煩時有樣睇。以前唔老嚟時會打人，依家就會追打另一隻。硬頸到暈，想要嘅一定要得到，想瞓响邊就一定要瞓响邊，那怕閂咗度房門，一定嘈醒你為止。見紙箱膠袋就有理無理塞入去，唔排除有日稱咗佢出街都唔知。

人在心中

「喂…」

「喂喂…」

「喂喂…」

「喂喂喂…」

「喂喂… 點呀…」

「喂喂，收唔到呀…」

「喂，咁依家呢?」

「收到啦！」


多謝。





每次我收到每份精美禮物時
我也會深感慶幸兼有份歉意
誰人在全世界慶祝之時
在戰火中逃亡等天處置
但我卻正與你
佈置派對營造細雪降下時

我已有禮物他有嗎
當我要喝便有茶
不快樂嗎
怎麼我尚要挑剔今年的煙花
誰在肚餓誰在街邊執紙箱起破陋的家
拆開紅絲帶仍念掛
哪個有禮物給予他
若然我快樂有餘可轉贈嗎
若與他分享更歡樂嗎

每次與知己暢聚小菜晚飯時
我會當一種禮物天厚待賦與
同時在遙遠處有許多人
垃圾堆中流連飢荒處處
但我卻正與你
吃喝說笑然後跳進了泳池

我已有禮物他有嗎
當我要喝便有茶
不快樂嗎
怎麼我尚要挑剔今年的煙花
誰在肚餓誰在街邊執紙箱起破陋的家
拆開紅絲帶仍念掛
個個有禮物他有嗎
休假約約下午茶
不快樂嗎
出年我或會披起珍珠色婚紗
其實每日無盡禮物多出的經已能幫他
結起紅絲帶提自己
共他分可以嗎

事不關己

由得佢死。

孝女趕上班疑亂過路被輾死 肇事重型車不顧而去 母﹕我一生完了 【明報專訊】年僅23歲的家中獨生女，半工讀夢想入大學，「讓父母過上好日子」，昨晨她在荃灣坐巴士上班時疑睡過頭遲了下車，心急下疑捨天橋和斑馬線不用，跨過欄杆沿馬路邊走回頭路，遭重型車輛撞倒捲入車底，慘被輾碎胸骨和頭顱斃命。 ...

黐線！點解有咁多人見死不救？如果事件發現喺佢哋親人身上，佢哋會點？

我好想打人！

香港，需要一個蝙蝠俠。

係警惡懲奸嘅蝙蝠俠，唔係愛情。

想妳念妳

你還好嗎？

數年前我邂逅了妳，
雖然偏見曾使我瞧妳不起，
可是，
在和你一起以後，
我已在不知不覺間對妳生了感情。
還記得，
當我興奮時，妳和我一起大叫；
當我憤怒時，妳讓我在街上全力奔馳；
當我悲哀時，妳讓我睡在妳的懷裡，
為我遮風擋雪。
妳的好，我是知道的。

在每個寂寞夜晚，
我也會偶然想起妳。
多麽希望一天能和妳街上相遇，
看看擁有妳那人的模樣，
打探他是否懂得珍惜妳。

謝謝妳，
陪伴我度過數個炎夏寒冬，
我想念妳。

忍不了口

夜半
肚子空空
吃餅乾

一不小心
咬了舌頭一口
血如泉湧

後悔
為何要吃
恨自己
忍不了口

妖

達爾文

男人與車

同朋友出嚟吹水，有時啲朋友隨口噏吓話要買乜乜房車物物跑車嘅時候，好多時都會見到佢個女朋友响度倔住個男朋友，然後插咀話買車嘥錢，不如買樓啦blah blah blah，理由係新車一落地就即刻貶值，買樓就唔同呢，市道咁好，一轉手就賺幾廿皮咁咁咁咁。其實係有道理嘅，不過呢，男人對車，唔多唔少都會有啲情意結。

男仔從細個開始，最常接觸到嘅玩具就係車仔。果陣時好興Match Box，有好多唔同型號嘅車，每架車度車門仲識開架。當時，對我嚟講印象最深嘅係一架黑色Corvette，無嘢格，黑色又型，四個轆又順，推得又遠，咪鍾意囉。到搭車搭巴士時，又鍾意坐車頭對住司機果第一個位，睇住司機扭咁大個軚盤操控成架大巴，百幾條人命响佢手任佢舞，我眞係覺得佢好型架。當時啲咩作文題目我的志願吓話，我都寫話將來要做巴士司機架，仲要指明話要揸丹拿珍寶喎。呢款巴士嘅特色係有支細細碌嘅波棍响軚盤左邊，啪上啪落，好過癮架，引擎响車尾又靜喎，唔似得勝利二型咁嘈到死，阿sir話我無大志都係咁話架喇。仲有啲又有揸車嘅親朋戚友，坐佢哋車時，又欲欲想點吓個軚盤，坐吓個司機位咁啦。好喇熄咗匙，有大人俾機會我坐一坐司機位喇，哇呵~ 我發誓，第時一到法定年齡，我就要考車牌揸靚車。睇電視時，又睇到有Formula1喎，果時嘅車手冼嗱文素保魯斯鬥到難分難解，又多人擁戴，感覺好英雄咁。响潛移默化之下，咁就做就咗男人對車嘅情意結。

當然，車囉喎，除咗有個人操控與速度嘅快感之外，仲有吸引異性嘅功能，男人心裡真係咁諗架。我哋呢啲普通人，响條街度個個都係咁嘅樣，要增加自己嘅魅力同吸引力，非要展示一吓英雄感不可。揸車，即係我養得起架車，表示我養得起你。揸快車，即係我會為你奔馳拼搏，表示我會為你死也在所不惜。唔… 簡直英雄蓋世，一個字：型。不過呢，以我所知，女人唔係咁諗喎，揸車等於型？慳啲啦，貪你有錢咋儍仔…（呢句邊個講架？咁大整蠱！）

每個男人心裡面都有架Dream Car。不過呢，Dream Car會隨年紀而改變。細個鍾意Corvette，跟住巴士，之後就鍾意陳法拉等等呢啲超班馬，成熟啲又鍾意貓巴士A4紙揸Audi揸Ben屎喎，依家又無啦啦鍾意揸SUV，貪佢夠大夠舒服… 仲有呢，大車迫位恰細車，真係幾賤幾過癮架，嘿嘿！

咁，你架Dream Car 又係咩呢？

倒數八年

八年前，我哋一邊聽住呢首歌，一邊倒數。

「二千年，做啲嘢！」

零捌高潮

（圖片來源：蘋果日報）

今晚睇香港新聞，播放全港最高嘅IFC2煙花倒數，由底層放小小煙花起，每一秒上十層，直到頂，從十倒數到零，便踏入二零零八年。隨後，白色濃密嘅煙花從IFC2頂部噴出。

點睇，都係好似高潮。

新年快樂！